କେନ୍ଦ୍ରାପଡା: ଗାଁ ପୋଖରୀରୁ ବୁଡି ଦୁଇ ଭଉଣୀଙ୍କ ମୃତ୍ୟୁ । ଏଭଳି ଦୁଃଖଦ ଘଟଣା ଦେଖିବାକୁ ମିଳିଛି କେନ୍ଦ୍ରାପଡା ଜିଲ୍ଲା ଜଂରା ବାରିମୂଳ ଗାଁରେ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସୂଚନା ଅନୁସାରେ,ବାରିମୂଳ ଗାଁର ବିପିନ ମଲ୍ଲିକଙ୍କ ଦୁଇ ନାବାଳିକା ଘର ନିକଟରେ ଖେଳୁଥିଲେ । ହେଲେ ହଠାତ ଗାଁ ପୋଖରୀରେ ଡଙ୍ଗା ଭାସୁଥିବା ଦେଖି ପାଣିରେ ପଶିଥିଲେ ଦୁଇ ଭଉଣୀ । ତେବେ ଦୀର୍ଘ ସମୟ ଧରି ଘରକୁ ଦୁଇ ଭଉଣୀ ନ ଫେରିବାରୁ ପରିବାର ଲୋକେ ସେମାନଙ୍କୁ ଖୋଜାଖୋଜି କରିଥିଲେ ।
ପରେ ପୋଖରୀରେ ଦୁଇ ଭଉଣୀ ବୁଡି ଯାଇଥିବା ଖବର ପାଇଥିଲେ । ଗ୍ରାମବାସୀଙ୍କ ସହାୟତାରେ ପୋଖରୀ ମଧ୍ୟରୁ ଦୁଇଜଣଙ୍କୁ ଉଦ୍ଧାର କରିଥିଲେ । ପରେ ଉଭୟଙ୍କୁ ସ୍ଥାନୀୟ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ହେଲେ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ମୃତ ଶୁଭସ୍ମିତାଙ୍କ ବୟସ ସାଢ଼େ ତିନିବର୍ଷ ହୋଇଥିଲା ବେଳେ ମଧୁସ୍ମିତାର ବୟସ ଅଢେଇ ବର୍ଷ ବୋଲି ଜଣାପଡିଛି । ଦୁଇ ଜଣଙ୍କ ମୃତ୍ୟୁକୁ ନେଇ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
