ଜଗତସିଂହପୁର: ଜିଲ୍ଲାର ଇଷ୍ଟଦେବୀ ମା' ଶାରଳାଙ୍କ ମନ୍ଦିରରେ ଷୋଡଶ ଦିନାତ୍ମକ ପାର୍ବଣ ପୂଜାର ଗୁରୁବାର ପରିସମାପ୍ତି ଘଟିଛି। ଚଳିତ ବର୍ଷ 14 ଦିନ ପୂଜା ଅନୁଷ୍ଠିତ ହୋଇଥିଲା । ଆଜି ବିଜୟା ଦଶମୀରେ ଅପରାଜିତା ପୂଜା କରାଯାଇ ଘଟ ଚନ୍ଦନ ପୁଷ୍କରିଣୀରେ ବିସର୍ଜନ କରାଯିବ।
ଆଜି ବିଜୟା ଦଶମୀ
ବୁଧବାର ଦିନ ମହାନବମୀ ପୂଜା କରାଯାଇ ଥିବା ବେଳେ ଗୁରୁବାର ରାତ୍ରରେ ପୂର୍ଣ୍ଣାହୁତି ଅନୁଷ୍ଠିତ ହୋଇଛି । ଗୁରୁବାର ମା'ଙ୍କ ବିଶ୍ରାମ ଦିନ ରହିଥିବାରୁ ମନ୍ଦିରର ମୁଖ୍ୟ ଦ୍ବାର ବନ୍ଦ ରହିଥିଲା । ବିଶ୍ରାମ ଦିନରେ ମା'ଙ୍କୁ ପଞ୍ଚପୋଚାର ପୂଜା କରାଯାଇଥାଏ ।
ଘଣ୍ଟ, ଘଣ୍ଟା, କାହାଳୀ, ମୃଦଙ୍ଗ ଆଦି ବାଜି ନଥାଏ । ମନ୍ଦିର ନିସ୍ତବ୍ଧ ଥାଇ ମା' ବିଶ୍ରାମ ନେବାର ପରମ୍ପରା ରହି ଆସିଛି । ଆଜି (ଶୁକ୍ରବାର) ଦିନ ବିଜୟା ଦଶମୀ ଉତ୍ସବ ପାଳନ ସହ ଦହି ପଖାଳ ଭୋଗ ଲାଗି କରାଯିବ । ମଧ୍ୟାହ୍ନ ୧୨ ଟା ପରେ ଶ୍ରାବଣା ନକ୍ଷେତ୍ର ଆସୁଥିବାରୁ ସେହି ସମୟରେ ଘଟ ବିସର୍ଜନର କାର୍ଯ୍ୟକ୍ରମ ରହିଛି।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
