ଢେଙ୍କାନାଳ:ଏମିତି ବି ଆସେ ମୃତ୍ୟୁ । ଖେଳ ହେଲା କାଳ । ଦୁନିଆ କଣ ଜାଣିବା ଆଗରୁ ଚାଲିଗଲା ନାବାଳକର ଜୀବନ । ଖେଳୁଥିବା ସମୟରେ କୂଅରେ ପଡି ଆଠବର୍ଷ ନାବାଳକର ମୃତ୍ୟୁ ହୋଇଛି । ଏପରି ଅଭାବନୀୟ ଘଟଣା ଘଟିଛି ଢେଙ୍କାନାଳ ଜିଲ୍ଲା ଭୁବନ ଏନଏସି ଅନ୍ତର୍ଗତ ଓ୍ବାର୍ଡ-୧୪ରେ ।
ସୂଚନାଅନୁସାରେ, ଶନିବାର ଅପରାହ୍ନରେ ସାଙ୍ଗମାନଙ୍କ ସହିତ ଖେଳୁଥିବା ସମୟରେ ଘର ନିକଟରେ ଥିବା ଏକ ପରିତ୍ୟକ୍ତ କୂଅରେ ବାଳକ ଜଣକ ପଡିଯାଇଥିଲା । ମୃତ ବାଳକଟି ହେଲା ମୋହନ ମଳିକଙ୍କ ପୁଅ ପବିତ୍ର ମଳିକ । ବାଳକଟି କୂଆରେ ପଡିଥିବା ସମୟରେ କାହାର ନଜର ପଡିନଥିଲା । ବିଳମ୍ବ ହେବାରୁ ଘରଲୋକେ ବହୁ ଖୋଜାଖୋଜି କରିଥିଲେ । ବହୁତ ସମୟ ହେବା ଯାଏଁ ପିଲାଟିର କିଛି ଖବର ପାଇ ନଥିଲେ ।
ସନ୍ଦେହ ହେବାରୁ ଘର ନିକଟରେ ଥିବା ପରିତ୍ୟକ୍ତ କୂଅରେ ଘରଲୋକ ଦେଖିଥିଲେ । ସେହି କୂଅ ମଧ୍ୟରେ ପବିତ୍ରର ଚପଲ ଭାସୁଥିବା ଦେଖି ପରିବାର ଲୋକେ କୂଅରୁ ତାକୁ ଉଦ୍ଧାର କରି ଭୁବନ ଡାକ୍ତରଖାନାରେ ଭର୍ତ୍ତି କରିଥିଲେ । ଏହା ପରେ ଡାକ୍ତର ପବିତ୍ରକୁ ମୃତ ଘୋଷଣା କରିଥିଲେ।
ଘଟଣାସ୍ଥଳରେ ଭୁବନ ପୋଲିସ ପହଞ୍ଚି ଶବକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ଏ ସଂକ୍ରାନ୍ତରେ ଭୁବନ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି।
ଢେଙ୍କାନାଳରୁ ଉର୍ମିଳା ପାତ୍ର, ଈଟିଭି ଭାରତ
