ଢେଙ୍କାନାଳ: ଜିଲ୍ଲାରେ ଅଭାବନୀୟ ଘଟଣା। ଭାରସାମ୍ୟ ହରାଇ ଓଲିଟି ପଡିଲା ଟ୍ରକ । ଦୁର୍ଘଟଣା ପରେ ଟ୍ରକରେ ନିଆଁ ଲାଗି ଡ୍ରାଇଭର ଜୀବନ୍ତ ଦଗ୍ଧ ହୋଇଯାଇଥିବା ସୂଚନା ମିଳିଛି । ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଅନ୍ତର୍ଗତ ବାରିହାପୁର ଆଦର୍ଶ ବିଦ୍ୟାଳୟ ନିକଟରେ ଏଭଳି ଘଟଣା ଘଟିଛି । ଡ୍ରାଇଭର ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି । ମୃତ ଡ୍ରାଇଭରର ପରିଚୟ ବର୍ତ୍ତମାନ ସୁଦ୍ଧା ମିଳିପାରି ନାହିଁ ।
ମିଳିଥିବା ସୂଚନା ଅନୁଯାୟୀ, ଗତକାଲି(ସୋମବାର) ତାଳଚେରରୁ କୋଇଲା ବୋଝେଇ କରି ଏହି ଟ୍ରକଟି ପାରାଦ୍ବୀପ ଯାଉଥିଲା । ଏହାପରେ ପରଜଙ୍ଗ ଥାନା ବାରିହାପୁର ଆଦର୍ଶ ବିଦ୍ୟାଳୟ ନିକଟରେ ଟ୍ରକ ଟି ଦ୍ରୁତ ବେଗ ଯୋଗୁଁ ଭାରସାମ୍ୟ ହରାଇ ରାସ୍ତା ପାର୍ଶ୍ଵକୁ ଓଲଟିପଡିଥିଲା । ଦୁର୍ଘଟଣା ପରେ ଟ୍ରକରେ ନିଆଁ ଲାଗିଯାଇଥିଲା । ଟ୍ରକରେ ଥିବା କୋଇଲା ଯୋଗୁଁ ନିଆଁ ଚାରିଆଡେ ବ୍ୟାପି ଯାଇଥିଲା । ଦୁର୍ଘଟଣା ପରେ ଟ୍ରକରେ ଡ୍ରାଇଭର ଜଣଙ୍କ ଚାପି ହୋଇ ରହିଯାଇଥିବାରୁ ବାହାରି ପାରିନଥିଲେ । ଫଳରେ ନିଆଁର ଆଁରେ ତାଙ୍କର ମୃତ୍ୟୁ ହୋଇଥିଲା।
ଏନେଇ ଖବର ପାଇ ପରଜଙ୍ଗ ପୋଲିସ ଓ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ କରିଥିଲେ । ଅଗ୍ନିଶ୍ରମ ବାହିନୀ ନିଆଁକୁ ଲିଭାଇବା ପରେ ମୃତ ଚାଳକଙ୍କ ଅର୍ଦ୍ଧଦଗ୍ଧ ମୃତଦେହକୁ ଉଦ୍ଧାର କରିଥିଲେ । ସେପଟେ ଟ୍ରକଟି ୧୪ ଚକିଆ ବିଶିଷ୍ଟ ହୋଇଥିବା ବେଳେ,ଗାଡି ନମ୍ବର OD35C0436 ଅଟେ । କିନ୍ତୁ ଚାଳକଙ୍କ ପରିଚୟ ବର୍ତ୍ତମାନ ସୁଦ୍ଧା ମିଳିପାରିନାହିଁ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପରଜଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇବା ସୂଚନା ମିଳିଛି । ଏ ସମ୍ପର୍କରେ ପରଜଙ୍ଗ ପୋଲିସ ସହ ଅଧିକ ତଦନ୍ତ ଜାରି ରଖିଛି । ଟ୍ରକଟିର ମାଲିକ କିଏ ତାହା ମଧ୍ୟ ଅସ୍ପଷ୍ଟ ରହିଛି । ତଦନ୍ତ ପରେ ମୃତକଙ୍କର ପରିଚୟ ମିଳିବା ସହ ଗାଡିର ମାଲିକାନା ବିଷୟରେ ଜଣାପଡିବ ।
ଗତ କିଛିଦିନ ତଳେ କେନ୍ଦୁଝର ପଣ୍ଡାପଡା ଥାନା ଅନ୍ତର୍ଗତ ଉକୁଚାବେଡାରେ ମର୍ମନ୍ତୁଦ ସଡକ ଦୁର୍ଘଟଣା ଖବର ସାମ୍ନାକୁ ଆସିଥିଲା । ଉକୁଚାବେଡାରେ ଭାରସାମ୍ୟ ହରାଇ ଅଟୋ ସହ ପିକଅପ୍ ଭ୍ୟାନ୍ ମୁହାଁମୁହିଁ ଧକ୍କା ହେବାରୁ ୪ଜଣଙ୍କ ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ହୋଇଥିଲେ । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରି କେନ୍ଦୁଝର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । ହରିଚନ୍ଦନପୁର ବ୍ଲକ ଅନ୍ତର୍ଗତ ବଡ଼କମଣ୍ଡରା ଗ୍ରାମର କିଛି ଲୋକ ସୋଲା ବିକିବାକୁ କେନ୍ଦୁଝର ସହରକୁ ଆସିଯାଥିଲେ । ସେଠାରୁ ଫେରିବା ସମୟରେ ସ୍ଥାନୀୟ ଉକୁଚାବେଡାରେ ଏକ ପିକ୍-ଅପ ଭ୍ୟାନ ସହ ମୁହାଁମୁହିଁ ଧକ୍କା ହେଇଥିଲା ।
ଇଟିଭି ଭାରତ, ଢେଙ୍କାନାଳ
