ଭୁବନେଶ୍ବର: ୨୦ରୁ କମ୍ ଛାତ୍ରଛାତ୍ରୀ ଉପସ୍ଥାନ ଥିବା ସ୍କୁଲକୁ ଅନ୍ୟ ସ୍କୁଲ ସହିତ ମିଶ୍ରଣ କରାଯାଇଛି । ଏହାର ପ୍ରତିବାଦରେ ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ କରିଥିଲେ ପଶାସିଂହ ପ୍ରାଥମିକ ବିଦ୍ୟାଳୟ ଛାତ୍ରଛାତ୍ରୀ । ଫଳରେ ଜିଲ୍ଲାପାଳଙ୍କ କାର୍ଯ୍ୟାଳୟରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା ।
ଢେଙ୍କାନାଳ ଓଡ଼ପଡା ବ୍ଲକ ଅନ୍ତର୍ଗତ ପଶାସିଂହ ପ୍ରାଥମିକ ବିଦ୍ୟାଳୟରେ କମ୍ ଉପସ୍ଥାନ ନେଇ ଗତବର୍ଷ ଠାରୁ ଶିକ୍ଷାଦାନ ବନ୍ଦ କରାଯାଇଥିଲା । ଶିକ୍ଷା ବିଭାଗର ନୂତନ ନିୟମ ଅନୁଯାୟୀ ଏହି ସ୍କୁଲକୁ ସ୍ଥାନୀୟ ରସାସିଂହ ସ୍କୁଲରେ ମିଶ୍ରଣ କରାଯାଇଛି । ତେବେ ଏହାକୁ ବିରୋଧ କରି ଛାତ୍ରଛାତ୍ରୀ ଓ ଅଭିଭାବକଙ୍କ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ଏହାକୁ ନେଇ ଆଜି(ଗୁରୁବାର) ପଶାସିଂହ ସ୍କୁଲର ଛାତ୍ରଛାତ୍ରୀ ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସମ୍ମିଳିତ ପ୍ରାର୍ଥନା କରିଥିଲେ ଏହାପରେ ଧାରଣା ବସିଥିଲେ । ପଶାସିଂହ ସ୍କୁଲ୍କୁ ପୁନଃ କାର୍ଯ୍ୟକ୍ଷମ କରିବାକୁ ଅଡି ବସିଥିଲେ । ଖବରପାଇ ଜିଲ୍ଲା ଶିକ୍ଷାଧିକାରୀ ପହଞ୍ଚି ସେମାନଙ୍କର ଦାବି ଉପରେ ପୁନଃ ବିଚାର କରାଯିବ ବୋଲି ପ୍ରତିଶ୍ରୁତି ଦେଇଥିଲେ । ଏହାପରେ ଆନ୍ଦୋଳନରୁ ଓହରିଥିଲେ ଛାତ୍ରଛାତ୍ରୀ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
