ଭଦ୍ରକ: ଧାମନଗର (Dhamnagar Bypoll Result)ରେ ବିଜୟର ମୁକୁଟ ପିନ୍ଧିଲେ ବିଜେପି ପ୍ରାର୍ଥୀ ତଥା ପୂର୍ବତନ ବିଧାୟକ ବିଷ୍ଣୁ ସେଠୀଙ୍କ ପୁଅ ସୂର୍ଯ୍ୟବଂଶୀ ସୁରଜ (BJP winning candidate Suryavanshi Suraj) । ବିଜେପି ଶାସକ ଦଳ ବିଜେଡ଼ି ଠାରୁ ୯ ହଜାର ୮୮୧ ଭୋଟ ବ୍ୟବଧାନୀରେ ବିଜୟଲାଭ କରିଛି । ପ୍ରଥମ ରାଉଣ୍ଡରୁ ହିଁ ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୂରଜ ତାଙ୍କର ନିକଟତମ ପ୍ରତିଦ୍ଵନ୍ଦୀ ଅବନ୍ତୀ ଦାସଙ୍କଠାରୁ ଆଗରେ ରହି ଆସିଥିଲେ । ବିଜୟ ପରେ ଆସିଛି ସୁରଜଙ୍କ ପ୍ରତିକ୍ରିୟା । ଏହା ସ୍ବାଭିମାନର ବିଜୟ । ଧାମନଗରରେ ପରିବର୍ତ୍ତନ ହେବା ନେଇ ଅଞ୍ଚଳବାସୀ ସଙ୍କେତ ଦେଇସାରିଛନ୍ତି ବୋଲି କହିଛନ୍ତି ସୁରଜ ।
ଏ ନେଇ ସୂରଜ କହିଛନ୍ତି, " ଅସମୟରେ ଆମେ ନିର୍ବାଚନ ଲଢିଥିଲୁ, ଫଳରେ ଏହି ବିଜୟ ମୋ ପାଇଁ ଉତ୍ସାହିତ ନୁହେଁ । ଧାମନଗର ବାସୀ ମୋତେ ଭଲ ପାଇବା ଦେଇଛନ୍ତି । ଫଳରେ ଧାମନଗରବାସୀଙ୍କ ଆଶାକୁ ପୂରଣ କରିବା ପାଇଁ ମୋ ଆଗରେ ଏକ ଆହ୍ବାନ ରହିଛି । ଯାହା ନେତୃତ୍ବରେ ଆମେ ନିର୍ବାଚନ ଲଢିଲୁ । ତାଙ୍କୁ ବହୁତ ଧନ୍ୟବାଦ । ମୁଁ ପ୍ରାର୍ଥୀପତ୍ର ଦାଖଲ କରିବା ମୋର କାମ ଥିଲା, କିନ୍ତୁ ଧାମନଗରର ପ୍ରତିଟି ବାସୀ ଏହି ନିର୍ବାଚନ ଲଢିଥିଲେ । ଏହା ସ୍ବାଭିମାନର ବିଜୟ । ଧାମନଗରରେ ପରିବର୍ତ୍ତନ ହେବା ନେଇ ଅଞ୍ଚଳବାସୀ ସଙ୍କେତ ଦେଇସାରିଛନ୍ତି ।"
ଚଳିତ ମାସ ୩ ତାରିଖ ଦିନ ଧାମନଗର ବିଧାନସଭା ନିର୍ବାଚନମଣ୍ଡଳୀ ପାଇଁ ହୋଇଥିବା ଉପନିର୍ବାଚନ ପାଇଁ ଭୋଟ ଗ୍ରହଣ ହୋଇଥିଲା । ଆଜି ସକାଳ ୮ଟାରୁ ଆରମ୍ଭ ହୋଇଥିଲା ଭୋଟ ଗଣତି । ପ୍ରଥମ ରାଉଣ୍ଡରୁ ହିଁ ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୁରଜ ତାଙ୍କର ନିକଟତମ ପ୍ରତିଦ୍ଵନ୍ଦୀ ଅବନ୍ତୀ ଦାସଙ୍କ ଠାରୁ ଆଗରେ ଥିଲେ। ଯାହାକି ଶେଷ ରାଉଣ୍ଡ ପର୍ଯ୍ୟନ୍ତ ଜାରି ରହିଥିଲା । ଶେଷରେ ସୂର୍ଯ୍ୟବଂଶୀ ସୁରଜ ବିଜୟ ହୋଇଛନ୍ତି । ଯାହାକୁ ନେଉ ବିଜେପି କର୍ମୀ ମାନଙ୍କ ମଧ୍ୟରେ ଉତ୍ସାହ ପରିଲକ୍ଷିତ ହୋଇଛି । ଏହା ଧାମନଗର ବାସୀଙ୍କ ବିଜୟ ବୋଲି କହିଛନ୍ତି ସୂର୍ଯ୍ୟବଂଶୀ ।
ମୁଖ୍ୟ ନିର୍ବାଚନ ଅଧିକାରୀ ପ୍ରେସମିଟରେ ଦେଇଥିବା ସୂଚନା ଅନୁସାରେ ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୁରଜ ୮୦,୩୫୧ଭୋଟ ମିଳିଥିବା ବେଳେ ଶାସକ ଦଳ ବିଜେଡିର ପ୍ରାର୍ଥିନୀ ଅବନ୍ତୀ ଦାସଙ୍କୁ ମୋଟ ୭୦,୪୭୦ ଖଣ୍ଡ ଭୋଟ ମିଳିଛି । ସେହିପରି କଂଗ୍ରେସ ପ୍ରାର୍ଥୀ ବାବା ହରେକୃଷ୍ଣ ସେଠୀ ୩,୫୬୧ଟି ଭୋଟ, ସ୍ବାଧୀନ ପ୍ରାର୍ଥୀ ରାଜେନ୍ଦ୍ର ଦାସ ୮,୧୫୩ ଓ ଅନ୍ୟ ଜଣେ ସ୍ବାଧୀନ ପ୍ରାର୍ଥୀ ପବିତ୍ର ମୋହନ ଦାସଙ୍କୁ ମାତ୍ର ୪୯୭ ଖଣ୍ଡ ଭୋଟ ମିଳିଛି । ୬୫୦ ଖଣ୍ଡ ଭୋଟ ନୋଟା (NOTA ) ରେ ପଡିଥିବା କାରଣରୁ ନାକଜ ହୋଇଯାଇଛି ।
ଚଳିତ ଉପନିର୍ବାଚନ ଫଳାଫଳରେ ରାଜ୍ୟ ରାଜନୀତି ଇତିହାସରେ ପ୍ରଚଳିତ ଧାରାରେ ଏକ ବଡ ବ୍ୟତିକ୍ରମ ଦେଖିବାକୁ ମିଳିଛି । ୨୦୦୯ ମସିହା ପରେ ପ୍ରଥମ ଥର ଓ ୨୦୦୦ ମସିହା ପରେ ଶାସକ ବିଜେଡିକୁ ୩ୟ ଥର ପାଇଁ ଉପନିର୍ବାଚନରେ ପରାଜୟର ସ୍ବାଦ ଚାଖିବାକୁ ପଡିଛି । ଏହି ନିର୍ବାଚନରେ ବିଜେପିର ବାଜିମାତ ପରେ ବିଜେପି ଶିବରରେ ବେଶ ଉତ୍ସାହ ଦେଖିବାକୁ ମିଳିଛି । ମୁଖ୍ୟ ନିର୍ବାଚନ ଅଧିକାରୀ ଆନୁଷ୍ଠାନିକ ଘୋଷଣା କରିସାରିବା ପରେ ରାଜ୍ୟ ବିଜେପି ମୁଖ୍ୟ କାର୍ଯ୍ୟାଳୟରେ ଉତ୍ସବର ମାହୋଲ ଆରମ୍ଭ ହୋଇସାରିଛି ।
ଇଟିଭି ଭାରତ, ଭଦ୍ରକ
