ଅନୁଗୋଳ: ବିଚାରଧୀନ କଏଦୀ ଭାବେ ଜେଲରେ ଥିବା ଡାକ୍ତରଙ୍କ ମୃତ୍ୟୁ । ମୃତ ଡାକ୍ତର ହେଉଛନ୍ତି ପ୍ୟାରୀମୋହନ ପ୍ରଧାନ । ଗତ ମାସରେ ଏକ ପୋକ୍ସୋ ମାମଲାରେ ଡାକ୍ତରଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିଲା । ଜେଲରେ ଡାକ୍ତରଙ୍କ ମୃତ୍ୟୁକୁ ନେଇ ଉତ୍ତେଜନା ଦେଖାଦେଇଛି ।
ନିଜ କ୍ଲିନିକରେ ଡାକ୍ତର ପ୍ୟାରୀମୋହନ ଜଣେ ନାବାଳିକାଙ୍କ ସହ ଅସଦାଚରଣ କରିଥିବା ନେଇ ଅଭିଯୋଗ ହୋଇଥିଲା । ଏହାପରେ ଡାକ୍ତରଙ୍କୁ ଗିରଫ କରିଥିଲା ଅନୁଗୋଳ ଜିଲ୍ଲା ତାଳଚେର ପୋଲିସ । ତେବେ ଘଟଣାର ତଦନ୍ତ ନକରି ତରବରିଆ ଭାବେ ଡାକ୍ତରଙ୍କୁ ଗିରଫ କରାଯାଇଥିବା ଅଭିଯୋଗ ଆଣିଛନ୍ତି ଲୋକେ । ଗତକାଲି ରାତିରେ ପ୍ୟାରୀମୋହନଙ୍କ ଦେହ ଖରାପ ହେବାରୁ ଅନୁଗୋଳ ଜେଲରୁ ଡାକ୍ତରଖାନା ନିଆଯାଇଥିଲା । ସେଠାରେ ତାଙ୍କର ମୃତ୍ୟୁ ଘଟିଛି ।
ଏହାପରେ ପୋଲିସର ତଦନ୍ତ ପ୍ରକ୍ରିୟାକୁ ନେଇ ଲୋକେ ଥାନା ଘେରାଉ କରିବା ସହ ଏସ୍ପି ଅଫିସ ଘେରାଉ କରିଛନ୍ତି । ମୃତ ଡାକ୍ତର ପ୍ୟାରୀମୋହନ ହେଉଛନ୍ତି ତାଳଚେର ବିଧାୟକ ବ୍ରଜକିଶୋର ପ୍ରଧାନଙ୍କ ଦାଦା । ତେଣୁ ରାଜନୈତିକ ଆକ୍ରୋଶ ରଖି ତାଙ୍କୁ ଗିରଫ କରାଯାଇଥିବା ଅଭିଯୋଗ ଆଣିଛନ୍ତି ବିଧାୟକଙ୍କ ସମର୍ଥକ । ଯାହାକୁ ନେଇ ତାଳଚେର ଓ ଅନୁଗୋଳରେ ପୋଲିସ ବିରୋଧରେ ଅସନ୍ତୋଷ ବଢ଼ିବାରେ ଲାଗିଛି । ସେପଟେ ମୃତ ଡାକ୍ତରଙ୍କ ପତ୍ନୀ ଓ ପୁଅ ମଧ୍ୟ ମୃତ୍ୟୁ ପାଇଁ ଜିଲ୍ଲା ଓ ପୋଲିସ ପ୍ରଶାସନକୁ ଦାୟୀ କରି ନ୍ୟାୟ ପାଇଁ ଧାରଣାରେ ବସିଛନ୍ତି ।
ଇଟିଭି ଭାରତ, ଅନୁଗୋଳ
