ଭୁବନେଶ୍ବର: ରିଲିଜ ହେଲା ଓଡ଼ିଆ ଚଳଚ୍ଚିତ୍ର କହିବିନି ତତେ ଆଇ ଲଭ୍ ୟୁ । ତିତ୍ଲି ପ୍ରଡକ୍ସନ୍ ନିବେଦିତ ଓ ଏଲ୍ ପ୍ରଡକ୍ସନ୍ ସହଯୋଗରେ ନିର୍ମିତ ଓଡ଼ିଆ ସିନେମା କହିବିନି ତତେ ଆଇ ଲଭ୍ ୟୁ ଆଜି ରିଲିଜ ହୋଇଛି । ସାରା ଓଡ଼ିଶାରେ ମୋଟ୍ ୨୦ଟି ହଲ୍ରେ ଏହି ଫିଲ୍ମ ରିଲିଜ୍ ହୋଇଯାଇଛି । ଭୁବନେଶ୍ବର ସ୍ବାତୀରେ ଏବଂ କଟକ ବୃନ୍ଦାବନ ହଲରେ ଏହାର ପ୍ରିମିୟର ହୋଇଥିବାବେଳେ, ଦର୍ଶକମାନଙ୍କ ଦ୍ଵାରା ବେଶ୍ ଆଦୃତ ହୋଇଛି ।
ହଲରେ ଭରପୁର ଦର୍ଶକଙ୍କୁ ଦେଖିବାକୁ ମିଳିଛି । ଏପରିକି ହଲଟି ହାଉସଫୁଲ ରହିଥିବାବେଳେ, ଚଳଚ୍ଚିତ୍ର ଗୀତର ତାଳେ ତାଳେ ଝୁମିଥିଲେ ଦର୍ଶକ । ଆଲ୍ବମ୍ ଓ ମ୍ୟୁଜିକ୍ ଭିଡିଓ ଦୁନିଆର ଚର୍ଚ୍ଚିତ ଷ୍ଟାର୍ ଲୁବୁନ-ଟୁବୁନ ଦୁଇଭାଇ ଏହି ସିନେମା ଜରିଆରେ ବଡ଼ ପରଦାରେ ନିଜ ଦକ୍ଷତା ଦେଖାଇଛନ୍ତି । କହିବିନି ତତେ ଆଇ ଲଭ୍ ୟୁର ଚିତ୍ରନାଟ୍ୟ ସାଙ୍ଗକୁ ନିର୍ଦ୍ଦେଶନା ଦେଇଛନ୍ତି ଲୁବୁନ-ଟୁବୁନ ।
ଡିଓପିରେ ଟୁବୁନ ସେନ ଥିଲାବେଳେ କୋରିଓଗ୍ରାଫି କରିଛନ୍ତି ଦୁଇ ଭାଇ । ତେବେ ଚଳଚ୍ଚିତ୍ରର ସବୁଠୁ ବଡ଼ ଦୃଶ୍ୟ ଦେଖିବାକୁ ମିଳିଥିଲା । ପ୍ରଥମଥର ପାଇଁ ଲୁବୁନ ନାୟକ ଭୂମିକାରେ ନଜର ଆସିଛନ୍ତି । ଆଉ ଏଥିରେ ତାଙ୍କ ନାୟିକା ହୋଇଛନ୍ତି ମୁମ୍ବାଇର ସୋନା । ସିନେମାର ସୁନ୍ଦର କାହାଣୀ ସାଙ୍ଗକୁ ଲୁବୁନ ଓ ସୋନା ଉଭୟଙ୍କ ନୂଆ ଯୋଡ଼ିକୁ ଦର୍ଶକଙ୍କୁ ବାନ୍ଧି ରଖିବ । ଏହାର କାହାଣୀ ରଚନା ସାଙ୍ଗକୁ ପ୍ରଯୋଜନା କରିଛନ୍ତି ପ୍ରୀତିଶ ମହାନ୍ତି ।
ସଂଳାପ ବାପୁ ଗୋସ୍ଵାମୀ ଲେଖିଥିବା ବେଳେ ଉଭୟ ବାପୁ ଓ ଡା.ନିର୍ମଳ ନାୟକ ଗୀତ ଗୁଡ଼ିକ ଲେଖିଛନ୍ତି । ହ୍ୟୁମାନ୍ ସାଗର, ଅର୍ପିତା ଚୌଧୁରୀ ଓ ଦିପ୍ତୀରେଖା ପାଢ଼ୀଙ୍କ ଭଳି କଣ୍ଠଶିଳ୍ପୀମାନେ ଗୀତ ଗୁଡ଼ିକୁ ଗାଇଛନ୍ତି । ସମସ୍ତ ଗୀତକୁ ସଙ୍ଗୀତରେ ସଜାଇଛନ୍ତି ବୈଦ୍ୟନାଥ ଦାଶ ।
ଇଟିଭି ଭାରତ, ଭୁବନେଶ୍ବର
