ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରଣାଳୟ ଏବଂ ଅଷ୍ଟ୍ରେଲିଆ ସରକାରଙ୍କ ସ୍ବାସ୍ଥ୍ୟ ଓ ବୟସ୍କ ଯତ୍ନ ବିଭାଗ ମଧ୍ୟରେ କ୍ରୀଡ଼ା କ୍ଷେତ୍ରରେ ସହଯୋଗ ସମ୍ପର୍କିତ ବୁଝାମଣାପତ୍ର (ଏମଓୟୁ)କୁ ଅନୁମୋଦନ କରିଛନ୍ତି ।
ଭାରତ ଓ ଅଷ୍ଟ୍ରେଲିଆ ମଧ୍ୟରେ କ୍ରୀଡା କ୍ଷେତ୍ରରେ ଦ୍ବିପାକ୍ଷିକ ବିନିମୟ କାର୍ଯ୍ୟକ୍ରମ କ୍ରୀଡା ବିଜ୍ଞାନ, ପ୍ରଯୁକ୍ତି ବିଦ୍ୟା ଏବଂ ଭିତ୍ତିଭୂମି କ୍ଷେତ୍ରରେ ଜ୍ଞାନ ଓ ଦକ୍ଷତା ବୃଦ୍ଧି କରିବାରେ ସହାୟକ ହେବ । କ୍ରୀଡାବିତ ଏବଂ ପ୍ରଶିକ୍ଷକ ମାନଙ୍କୁ ପ୍ରଶିକ୍ଷଣ ଏବଂ ବିକାଶ, କ୍ରୀଡା ଶାସନ ଓ ସଚ୍ଚୋଟତା, କ୍ରୀଡାରେ ତୃଣମୂଳ ସ୍ତରର ଅଂଶଗ୍ରହଣ, ପ୍ରମୁଖ କ୍ରୀଡା ପ୍ରତିଯୋଗିତା, କ୍ରୀଡାରେ ବିବିଧତା ଏବଂ ଅନ୍ତର୍ଭୁକ୍ତୀକରଣ ଫଳରେ ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟ ଆୟୋଜିତ ହେବ । ଭାରତ ଓ ଅଷ୍ଟ୍ରେଲିଆ ମଧ୍ୟରେ ଦ୍ବିପାକ୍ଷିକ ସମ୍ପର୍କ ସୁଦୃଢ ହେବ । ଅଷ୍ଟ୍ରେଲିଆ ସହ କ୍ରୀଡା କ୍ଷେତ୍ରରେ ଦ୍ବିପାକ୍ଷିକ ସହଯୋଗରୁ ମିଳିଥିବା ଲାଭ ଜାତି, ବର୍ଣ୍ଣ, ଅଞ୍ଚଳ, ଧର୍ମ ଓ ଲିଙ୍ଗ ନିର୍ବିଶେଷରେ ସମସ୍ତ କ୍ରୀଡାବିତଙ୍କ ପାଇଁ ସମାନ ଭାବରେ ଲାଗୁ ହେବ ।
ସେହିପରି କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ (ସିବିଆଇସି), ଭାରତ ସରକାରଙ୍କ ରାଜସ୍ବ ବିଭାଗ ଓ ଅଷ୍ଟ୍ରେଲିଆ ସରକାରଙ୍କ ଅଷ୍ଟ୍ରେଲିଆ ସୀମା ବଳକୁ ଅନ୍ତର୍ଭୁକ୍ତ କରି ଗୃହ ବ୍ୟାପାର ବିଭାଗ ମଧ୍ୟରେ ପାରସ୍ପରିକ ମାନ୍ୟତା ବ୍ୟବସ୍ଥା ବୁଝାମଣାକୁ ମଧ୍ୟ କେନ୍ଦ୍ର କ୍ୟାବିନେଟ ଅନୁମୋଦନ ଦେଇଛି ।
ଏହି ବ୍ୟବସ୍ଥାର ଉଦ୍ଦେଶ୍ୟ ହେଉଛି ଆମଦାନୀକାରୀ ଦେଶର ସୀମା ଶୁଳ୍କ କର୍ତ୍ତୃପକ୍ଷଙ୍କ ଦ୍ବାରା ସାମଗ୍ରୀ କ୍ଲିୟରାନ୍ସରେ ଉଭୟ ସ୍ବାକ୍ଷରକାରୀ ରାଷ୍ଟ୍ରର ସ୍ବୀକୃତିପ୍ରାପ୍ତ ଏବଂ ବିଶ୍ବସ୍ତ ରପ୍ତାନିକାରୀ ମାନଙ୍କୁ ପାରସ୍ପରିକ ଲାଭ ପ୍ରଦାନ କରିବା । ଅନୁମୋଦିତ ଅର୍ଥନୈତିକ ଅପରେଟର ମାନଙ୍କୁ ପାରସ୍ପରିକ ସ୍ବୀକୃତି ବିଶ୍ବ ସୀମା ଶୁଳ୍କ ସଂଗଠନର ସେଫ ଫ୍ରେମୱାର୍କ ଅଫ ଷ୍ଟାଣ୍ଡାର୍ଡର ଏକ ପ୍ରମୁଖ ଉପାଦାନ ଯାହା ଯୋଗାଣ ଶୃଙ୍ଖଳାର ଶେଷରୁ ଶେଷ ସୁରକ୍ଷାକୁ ସୁଦୃଢ କରିବା ସହିତ ବିଶ୍ବ ସ୍ତରରେ ବାଣିଜ୍ୟକୁ ଅଧିକ ସୁବିଧା ପ୍ରଦାନ କରିବା ପାଇଁ ବିଶ୍ବ ବାଣିଜ୍ୟକୁ ସୁରକ୍ଷିତ ଏବଂ ସୁବିଧା ପ୍ରଦାନ କରିବ । ଏହି ବ୍ୟବସ୍ଥା ଅଷ୍ଟ୍ରେଲିଆକୁ ରପ୍ତାନି କରୁଥିବା ଦେଶର ରପ୍ତାନିକାରୀ ମାନଙ୍କୁ ଲାଭ ପ୍ରଦାନ କରିବ । ଏହା ଦ୍ବାରା ଦୁଇ ଦେଶ ମଧ୍ୟରେ ବାଣିଜ୍ୟିକ ସମ୍ପର୍କ ପ୍ରୋତ୍ସାହିତ ହେବ ।
ଅଷ୍ଟ୍ରେଲିଆରେ ଅଷ୍ଟ୍ରେଲୀୟ ବିଶ୍ବସ୍ତ ବ୍ୟବସାୟୀ କାର୍ଯ୍ୟକ୍ରମର ପାରସ୍ପରିକ ସ୍ବୀକୃତି ଏବଂ ଭାରତରେ ଅନୁମୋଦିତ ଅର୍ଥନୈତିକ ଅପରେଟର କାର୍ଯ୍ୟକ୍ରମ ଉଭୟ ଦେଶର ଅଧିକୃତ ପ୍ରତିନିଧି ମାନଙ୍କ ଦ୍ବାରା ସ୍ବାକ୍ଷରିତ ହେବା ତାରିଖରୁ କାର୍ଯ୍ୟକାରୀ ହେବ । ଉଭୟ ଦେଶର ସୀମା ଶୁଳ୍କ ପ୍ରଶାସନର ସହମତିକ୍ରମେ ପ୍ରସ୍ତାବିତ ପାରସ୍ପରିକ ମାନ୍ୟତା ବ୍ୟବସ୍ଥାର ଲେଖା ଚୂଡାନ୍ତ ହୋଇଛି । ଏନେଇ କେନ୍ଦ୍ର ସରକାରଙ୍କ ପକ୍ଷରୁ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ସୂଚନା ଦେଇଛନ୍ତି ।
