ନୂଆଦିଲ୍ଲୀ: ଉତ୍ତର ପୂର୍ବ ରାଜ୍ୟ ମଣିପୁରେ ଜାରି ରହିଥିବା ହିଂସା ପ୍ରସଙ୍ଗରେ ସଂସଦର ମୌସୁମି ଅଧିବେଶନ ଆରମ୍ଭରୁ ଅଚଳ ହୋଇପଡିଛି । ରାଜ୍ୟରେ ସ୍ଥିତି ଅଣାୟତ । ସରକାରଙ୍କ ଅବହେଳାକୁ ଦାୟୀ କରି କଂଗ୍ରେସ ସମେତ ଅନ୍ୟ ବିରୋଧୀ ଦଳ ସରକାରଙ୍କୁ ସମାଲୋଚନା ଜାରି ରଖିଛନ୍ତି । ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସଦନରେ ବିବୃତ୍ତି ରଖନ୍ତୁ ବୋଲି ବରୋଧୀ ଦାବି କରି ଗୃହ ଚଳାଇ ଦେଉନାହାନ୍ତି । ଆଜି ଏହାରି ମଧ୍ୟରେ ପ୍ରଧାନମନ୍ତ୍ରୀ ମୋଦି ମଧ୍ୟ ବିରୋଧୀ ମହାମେଣ୍ଟକୁ ସମାଲୋଚନା କରିବାକୁ ପଛାଇନାହାନ୍ତି । ବିରୋଧୀ ମହାମେଣ୍ଟର ନାମ ‘ଇଣ୍ଡିଆ’ ହେବା ନେଇ କଟାକ୍ଷ କରିଛନ୍ତି ପ୍ରଧାନମନ୍ତ୍ରୀ । ଆତଙ୍କବାଦୀଙ୍କ ସଗଂଠନର ନାମରେ ମଧ୍ୟ ‘ଇଣ୍ଡିଆ’ ଶବ୍ଦ ରହିଛି ବୋଲି ପ୍ରଧାନମନ୍ତ୍ରୀ କହିଛନ୍ତି ।
ତେବେ ପ୍ରଧାନମନ୍ତ୍ରୀଙ୍କ ଏପରି ମନ୍ତବ୍ୟରେ ସମାଜବାଦୀ ପାର୍ଟି ସାଂସଦ ଜୟ ବଚ୍ଚନ କୌଣସି ପ୍ରତିକ୍ରିୟା ରଖିବାକୁ ମନା କରିଛନ୍ତି । ଜୟା କହିଛନ୍ତି, ସେ ପ୍ରଧାନମନ୍ତ୍ରୀଙ୍କୁ ଆସନକୁ ସମ୍ମାନ କରନ୍ତି । ତେଣୁ ସେ ପ୍ରଧାନମନ୍ତ୍ରୀଙ୍କ ମନ୍ତବ୍ୟ ସମ୍ପର୍କରେ କୌଣସି ପ୍ରତିକ୍ରିୟା ରଖିବାକୁ ଆଗ୍ରହ ପ୍ରକାଶ କରୁନାହାନ୍ତି । ହେଲେ 2014 ରୁ ଯଦି ଆଜି ପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ ଭାଷଣକୁ ତର୍ଜମା କରାଯାଏ, ତେବେ ସବୁକିଛି ସ୍ପଷ୍ଟ ହୋଇଯିବ ।
ଆଜି ଦଳର ସଂସଦୀୟ ପାର୍ଟି ମିଟିଂକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, ଟେରର ଆଉଟଫିଟର ନାମରେ ମଧ୍ୟ ‘ଇଣ୍ଡିଆ’ ଶବ୍ଦ ବ୍ୟବହାର ହୋଇଛି । ଉଦାହରଣ ହେବାକୁ ଯାଇ ପ୍ରଧାନମନ୍ତ୍ରୀ ନିକଟରେ ଦେଶ ବିରୋଧୀ କାର୍ଯ୍ୟକଳାପ ପାଇଁ ବ୍ୟାନ ଘୋଷିତ ହୋଇଥିବା ପପୁଲାର ଫ୍ରଣ୍ଟ ଅଫ ଇଣ୍ଡିଆ ବା ପିଏଫଆଇର ନାମ ମଧ୍ୟ ଉଲ୍ଲେଖ କରିଥିଲେ । ସେହିପରି ବ୍ରିଟେନରୁ ଭାରତକୁ ବ୍ୟବସାୟ ପାଇଁ ଆସି ଭାରତକୁ ଶାସନ କରିଥିବା ଇଂରେଜଙ୍କ ପ୍ରଥମ ଉପନିବେଶବାଦର ନାମ ମଧ୍ୟ ‘ ଇଣ୍ଟ-ଇଣ୍ଡିଆ କମ୍ପାନୀ’ ଥିଲା । ଏବେ ଏକାଠି ହୋଇଥିବା ବିରୋଧୀଙ୍କ ଏହି ମହାମେଣ୍ଟ ଏକ ଦିଗହରା ମେଣ୍ଟ ବୋଲି ପ୍ରଧାନମନ୍ତ୍ରୀ କହିଥିଲେ ।
ଆଜି ଦିଲ୍ଲୀରେ ଭାରତୀୟ ଜନତା ପାର୍ଟିର ସଂସଦୀୟ ଦଳ ବୈଠକ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିଲା । ଏଥିରେ ଦଳର ସଂସଦୀୟ କମିଟି ସଦସ୍ୟଙ୍କୁ ପ୍ରଧାନମନ୍ତ୍ରୀ ସମ୍ବୋଧିତ କରିଥିଲେ । କାର୍ଯ୍ୟକ୍ରମ ଶେଷ ହେବା ପରେ ବରିଷ୍ଠ ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ରବି ଶଙ୍କର ପ୍ରସାଦ, ଗଣମାଧ୍ୟମରେ ପ୍ରତିକ୍ରିୟା ରଖି କହିଥିଲେ ପ୍ରଧାନମନ୍ତ୍ରୀ କହିଛନ୍ତି, ଏକାଧିକ ଭାରତ ବିରୋଧୀ ସଂଗଠନ ଓ ଆତଙ୍କୀ ସଂଗଠନର ନାମରେ ଇଣ୍ଡିଆ ଶବ୍ଦ ବ୍ୟବହାର ହୋଇଛି । କୁଖ୍ୟାତ ଆତଙ୍କୀ ସଂଗଠନ ଇଣ୍ଡିଆନ ମୁଜାହିଦ୍ଦିନ, ପିଏଫଆଇ ଓ ବ୍ରିଟଶ ଇଣ୍ଡିଆ କମ୍ପାନୀ ମଧ୍ୟ ଏହି ଶବ୍ଦକୁ ବ୍ୟବହାର କରିଛନ୍ତି । ତେଣୁ ଇଣ୍ଡିଆ ନାମରେ ଏକାଠି ହୋଇଥିବା ଏହି ମେଣ୍ଟର ବର୍ତ୍ତମାନ ସମୟରେ କୌଣସି ପ୍ରାସଙ୍ଗିକତା ନାହିଁ । ଏହା ଏକ ଦିଗହରା ମେଣ୍ଟ ବୋଲି ପ୍ରଧାନମନ୍ତ୍ରୀ କହିଥିବା ରବିଶଙ୍କର ପ୍ରସାଦ ଗଣମଧ୍ୟମରେ ସ୍ପଷ୍ଟ କରିଥିଲେ ।
ଚଳିତମାସ 18 ତାରିଖରେ ବେଙ୍ଗାଲୁରୁରେ ଏକାଠି ହୋଇଥିବା 26ଟି ବିରୋଧୀ ରାଜନୈତିକ ଦଳ ଭାରତୀୟ ଜାତୀୟ ପ୍ରଗତିଶୀଳ ସମାବେଶୀ ମେଣ୍ଟ ବା ‘ଇଣ୍ଡିଆ’ ବ୍ୟାନରରେ ଆସନ୍ତା 2024 ସାଧାରଣ ନିର୍ବାଚନ ଲଢିବା ନେଇ ଘୋଷଣା କରିଥିଲେ । ଏହି ମେଣ୍ଟର ନାମକରଣ ‘ଇଣ୍ଡିଆ’ ହେବା ପରେ କ’ଣ ଭାରତୀୟ ଜନତା ପାର୍ଟି ଇଣ୍ଡିଆ ବିରୋଧରେ ଲଢିପାରିବ ବୋଲି ଏକାଧିକ ବିରୋଧୀ ନେତା ରଣହୁଙ୍କାର ଦେଇଥିଲେ । ଏବେ ଏହାର ନାମକରଣକୁ ନେଇ ବିରୋଧୀ ଭାଜପା ବିରୋଧରେ ରଣହୁଙ୍କାର ଦେଉଥିବା ବେଳେ ଭାଜପା ଓ ପ୍ରଧାନମନ୍ତ୍ରୀ ଏହି ନମକରଣର ଇତିହାସକୁ ନେଇ ବିରୋଧୀଙ୍କୁ ସମାଲୋଚନା ଆରମ୍ଭ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
