ନୂଆଦିଲ୍ଲୀ: ବ୍ରିଜଭୂଷଣ ଶରଣ ସିଂଙ୍କ ସହଯୋଗୀ ସଞ୍ଜୟ ସିଂ ଭାରତୀୟ କୁସ୍ତି ମହାସଂଘ (WFI)ର ସଭପତି ନିର୍ବାଚିତ ହେବା ପରେ କୁସ୍ତିକୁ କ୍ବିଟ୍ କରିଛନ୍ତି ଅଲିମ୍ପିକ୍ ପଦକ ବିଜେତା ସାକ୍ଷୀ ମଲ୍ଲିକ । ସଞ୍ଜୟ ସିଂ ଭାରତୀୟ କୁସ୍ତି ମହାସଂଘର ନୂଆ ସଭାପତି ହେବା ପରେ, ଏହାକୁ ପ୍ରତିବାଦ କରି କୁସ୍ତିରୁ ସନ୍ନ୍ୟାସ ଘୋଷଣା କରିଛନ୍ତି ସାକ୍ଷୀ । ନୂଆ ସଭାପତିଙ୍କ ନାଁ ଘୋଷଣା ପରେ ଭାଙ୍ଗି ପଡ଼ିଥିଲେ ସାକ୍ଷୀ । ସେ କାନ୍ଦି ପକାଇବା ସହିତ ସବୁଦିନ ପାଇଁ କୁସ୍ତି ଖେଳକୁ ବାଏ ବାଏ କରିଛନ୍ତି ।
ଏସ୍ ରେସଲର୍ ସାକ୍ଷୀ ମଲ୍ଲିକ ଆଜି ଦିଲ୍ଲୀରେ ସାମ୍ବାଦିକ ସମ୍ମିଳନୀରେ କୁସ୍ତିରୁ କ୍ବିଟ୍ କରିବା ସଂପର୍କରେ ଘୋଷଣା କରିଛନ୍ତି । ସାମ୍ବାଦିକ ସମ୍ମିଳନୀକୁ ସମ୍ବୋଧନ ସମୟରେ ଭାବବିହ୍ବଳ ହୋଇ ପଡ଼ିଥିଲେ ସାକ୍ଷୀ । ସେ ସାମ୍ବାଦିକମାନଙ୍କ ଆଗରେ ଭାଙ୍ଗି ପଡ଼ିବା ସହ କାନ୍ଦି ପକାଇଥିଲେ । ପ୍ରେସ୍ କନଫରେନ୍ସରେ ସାକ୍ଷୀ ନିଜ ଜୋତାକୁ ଟେବୁଲ ଉପରେ ରଖିବା ସହିତ କ୍ଷୋଭ ପ୍ରକାଶ କରିଥିଲେ । ପରେ ବିବ୍ରତ ଏବଂ ଭାବ ପ୍ରବଣ ହୋଇ ପ୍ରେସ କନଫରେନ୍ସରୁ ପଳାଇ ଯାଇଥିଲେ ସାକ୍ଷୀ ।
ଏହାମଧ୍ଯ ପଢ଼ନ୍ତୁ: ବ୍ରିଜଭୂଷଣଙ୍କ ସହଯୋଗୀ ସଞ୍ଜୟ ସିଂ କୁସ୍ତି ମହାସଂଘର ସଭାପତି ନିର୍ବାଚିତ
ବିଜେପି ସାଂସଦ ତଥା WFIର ପୂର୍ବତନ ସଭାପତି ବ୍ରିଜଭୂଷଣ ଶରଣ ସିଂଙ୍କ ବିରୋଧରେ ମହିଳା କୁସ୍ତିଯୋଦ୍ଧା ଯୌନ ନିର୍ଯାତନା ଅଭିଯୋଗ ଆଣିଥିଲେ । ମହିଳା କୁସ୍ତିଯୋଦ୍ଧାଙ୍କ ସପକ୍ଷରେ ବାହାରି ଥିଲେ ସାକ୍ଷୀ ମଲ୍ଲିକଙ୍କ ସମେତ ବହୁ କୁସ୍ତିଯୋଦ୍ଧା । ସେମାନେ ଦିଲ୍ଲୀର ଜନ୍ତର ମନ୍ତରରେ ଧାରଣାରେ ବସିଥିଲେ । ପରେ ସରକାର ଏକ ଏସଆଇଟି ଗଠନ କରି ଏହାର ତଦନ୍ତ କରିଥିଲେ । ମାତ୍ର କୌଣସି ପରିସ୍ଥିତିରେ ସେ କାର୍ଯ୍ୟକାଳ ଶେଷ ହେବା ପୂର୍ବରୁ କୁସ୍ତି ମହାସଂଘର ସଭାପତି ପଦ ଛାଡିବେ ନାହିଁ ବୋଲି ସ୍ପଷ୍ଟ କରିଥିଲେ ବ୍ରିଜଭୂଷଣ । ତେବେ କାର୍ଯ୍ୟକାଳ ଶେଷ ହେବା ପରେ ହୋଇଥିବା ସଂଘ ନିର୍ବାଚନରେ ତାଙ୍କ ଅନୁଗତ ଗୋଷ୍ଠୀର ସଦସ୍ୟମାନେ ବିଜୟ ଲାଭ କରିଛନ୍ତି ।
ଏହାମଧ୍ଯ ପଢ଼ନ୍ତୁ: ମୁଖ୍ୟ ନିର୍ବାଚନ କମିଶନ ଓ କମିଶନର ନିଯୁକ୍ତି ବିଲ୍ ଲୋକସଭାରେ ପାସ୍
ଆଜି WFI ସଭାପତି ସମେତ ମହାସଂଘ ବିଭିନ୍ନ ପଦ ପାଇଁ ନିର୍ବାଚନ ହୋଇଥିଲା । ଏଥିରେ ବ୍ରିଜଭୂଷଣଙ୍କ ଘନିଷ୍ଠ ସହଯୋଗୀ ସଂଜୟ ସିଂ ସଭାପତି ଭାବେ ନିର୍ବାଚିତ ହୋଇଛନ୍ତି । ନିର୍ବାଚନରେ ମୋଟ 47 କାର୍ଯ୍ୟକର୍ତ୍ତାଙ୍କ ଭୋଟ ମଧ୍ୟରୁ ସଞ୍ଜୟ 40 ଭୋଟ ପାଇଥିବା ବେଳେ ତାଙ୍କ ପ୍ରତିଦ୍ବନ୍ଦ୍ବୀ ଅନିତାଙ୍କୁ ମାତ୍ର 7 ଖଣ୍ଡ ଭୋଟ ମିଳିଛି । ବ୍ରିଜଭୂଷଣଙ୍କ ସମର୍ଥିତ କ୍ୟାମ୍ପକୁ ସମସ୍ତ ଆସନ ଯାଇଛି । 4 ଉପସଭାପତି ପଦ ପାଇଁ ଦିଲ୍ଲୀର ଜୟପ୍ରକାଶ, ପଶ୍ଚିମବଙ୍ଗର ଅଶିତ କୁମାର ଶାହ, ପଞ୍ଜାବର କରତାର ସିଂ ଓ ମଣିପୁରର ଏନ.ଫନି ବିଜୟୀ ହୋଇଛନ୍ତି । ସେହିପରି ଉତ୍ତରାଖଣ୍ଡର ସତ୍ୟପାଲ ସିଂ ଦେଶଓ୍ବାଲ ନୂଆ କୋଷାଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି । ସେ ଜମ୍ମୁ କାଶ୍ମୀରର ଦୁଷ୍ଯନ୍ତ ଶର୍ମାଙ୍କୁ ପରାଜିତ କରିଛନ୍ତି । ଏହି ସମସ୍ତ ନବନିର୍ବାଚିତ ସଦସ୍ୟ ବ୍ରିଜଭୂଷଣଙ୍କ ଅନୁଗତ ଭାବେ ଜଣାଶୁଣା ।
ବ୍ୟୁରୋ ରିପୋର୍ଟ, ଇଟିଭି ଭାରତ
