ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ ବାସଭବନ ଉପରେ ଉଡିଲା ଡ୍ରୋନ । ଆଜି(ସୋମବାର) ସକାଳ 5ଟା 30 ମିନିଟରେ ଦିଲ୍ଲୀ ସ୍ଥିତ ପ୍ରଧାନମନ୍ତ୍ରୀଙ୍କ ବାସଭବନ ଉପରେ ଡ୍ରୋନ ଉଡିଥିବା ଖବର ସାମ୍ନାକୁ ଆସିଛି । ଏନେଇ ସ୍ପେଶାଲ୍ ପ୍ରୋଟେକ୍ସନ୍ ଗ୍ରୁପ ଦିଲ୍ଲୀ ପୋଲିସକୁ ସୂଚନା ଦେବା ପରେ ତଦନ୍ତ ଆରମ୍ଭ ହୋଇଥିଲା । ତଦନ୍ତ କରାଯାଇଥିଲେ ମଧ୍ୟ ମୋଦିଙ୍କ ବାସଭବନ ନିକଟରୁ ସେମିତି କୌଣସି ଡ୍ରୋନ ଠାବ ହୋଇନାହିଁ ।
ଏନେଇ ଏୟାର ଟ୍ରାଫିକ କଣ୍ଟ୍ରୋଲ ରୁମ (ATC)କୁ ମଧ୍ୟ ଯୋଗାଯୋଗ କରାଯାଇଥିଲା । ସେମାନେ ମଧ୍ୟ ପ୍ରଧାନମନ୍ତ୍ରୀଙ୍କ ବାସଭବନ ଏପର୍ଯ୍ୟନ୍ତ କୌଣସି ଡ୍ରୋନକୁ ଚିହ୍ନଟ କରିପାରି ନଥିବା ଦିଲ୍ଲୀ ପୋଲିସ ତରଫରୁ ସୂଚନା ଦିଆଯାଇଛି । ପ୍ରଧାନମନ୍ତ୍ରୀଙ୍କ ବାସଭବନ ନୋ ଫ୍ଳାଇଂ ଜୋନରେ ଅନ୍ତର୍ଭୁକ୍ତ । ଡ୍ରୋନ ଉଡିବା ଖବରକୁ ୪ ଘଣ୍ଟା ବିତିଯାଇଥିଲେ ମଧ୍ୟ ବର୍ତ୍ତମାନ ସୁଦ୍ଧା ଡ୍ରୋନର ସନ୍ଧାନ ମିଳିପାରିନାହିଁ । ସୁରକ୍ଷାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀଙ୍କ ବାସଭବନ ଚାରିପଟେ ପୋଲିସ ଫୋର୍ସ ମୁତୟନ କରାଯାଇଛି ।
ଦିଲ୍ଲୀ ପୋଲିସର ସୂଚନା ଅନୁସାରେ, ‘‘ସକାଳ 5ଟା 30 ସମୟରେ ସ୍ପେଶାଲ୍ ପ୍ରୋଟେକସନ୍ ଗ୍ରୁପ୍ (SPG) ଲୋକ କଲ୍ୟାଣ ମାର୍ଗ ଅଞ୍ଚଳରେ ପ୍ରଧାନମନ୍ତ୍ରୀଙ୍କ ବାସଭବନ ଉପରେ ଡ୍ରୋନ ଉଡୁଥିବା ଖବର ଆମକୁ ଦେଇଥିଲେ । ଏହାପରେ ଆମେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲୁ । ବର୍ତ୍ତମାନ ସୁଦ୍ଧା କୌଣସି ଡ୍ରୋନ ଠାବ ହୋଇନାହିଁ ।’’ ପ୍ରଧାନମନ୍ତ୍ରୀଙ୍କ ବାସ ଭବନ ନୋ-ଫ୍ଲାଏ' ଜୋନ୍ ଅନ୍ତର୍ଭୁକ୍ତ । ନୋ ଫ୍ଲାଏ ଜୋନ ସୁରକ୍ଷାକୁ ଭେଦି କିପରି ଡ୍ରୋନ ଉଡିବା ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । କିଏ ଏହି ଡ୍ରୋନ ଉଡାଇଲା ସେ ନେଇ ତଦନ୍ତ ଆରମ୍ଭ କରିଛି ଦିଲ୍ଲୀ ପୋଲିସ । ସେପଟେ ଡ୍ରୋନ ଉଡୁଥିବା ସମୟରେ ପ୍ରଧାନମନ୍ତ୍ରୀ ବାସଭବନରେ ଥିଲେ ନା ନାହିଁ ସେନେଇ ସୂଚନା ହସ୍ତଗତ ହୋଇପାରିନାହିଁ ।
ପ୍ରଧାନମନ୍ତ୍ରୀଙ୍କ ବାସଭବନ ଓ ଏହାର ଆଖାପାଖ ଅଞ୍ଚଳ ନୋ ଫ୍ଲାଇଂ ଜୋନ୍ । ଏହା ସତ୍ତ୍ବେ ମଧ୍ୟ ସୁରକ୍ଷାକୁ ଭେଦ କରି କିପରି ଏକ ଡ୍ରୋନ ବାସଭବନ ଉପରେ ଉଡିଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ବର୍ତ୍ତମାନ ସୁଦ୍ଧା କୌଣସି ଡ୍ରୋନ ଠାବ ହୋଇନଥିବା ବେଳେ ଏହା ପଛରେ କଣ ରହିଛି ଉଦ୍ଦେଶ୍ୟ ତାହା ପୋଲିସର ତଦନ୍ତ ପରେ ସ୍ପଷ୍ଟ ହେବ । ତେବେ ନୋ ଫ୍ଲାଇଂ ଜୋନରେ ଡ୍ରୋନ ଉଡିବା ଘଟଣା ଏବେ ପୋଲିସ ପାଇଁ ଚିନ୍ତାଜନକ ବିଷୟ ପାଲଟିଛି ।
