ନୂଆଦିଲ୍ଲୀ: ଏୟାର ଇଣ୍ଡିଆ ବିମାନରେ ବିସ୍ଫୋରଣ କରିବାକୁ ଧମକ ଦେଇଥିବା ଖଲିସ୍ତାନୀ ଆତଙ୍କବାଦୀ ତଥା ପ୍ରତିବନ୍ଧିତ ସଂଗଠନ ‘ଶିଖ ଫର ଜଷ୍ଟିସ’ (SFJ) ମୁଖ୍ୟ ଗୁରୁପତଓ୍ବନ୍ତ ପନ୍ନୁନ ବିରୋଧରେ ମାମଲା ରୁଜୁ କଲା ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) । ଭାରତରେ ଆତଙ୍କବାଦୀ ଘୋଷିତ ପନ୍ନୁନ ଏବେ କାନାଡାରେ ଆତ୍ମଗୋପନ କରିଛି । ସେହିଠାରୁ ସେ ଚଳିତ ମାସ 9 ତାରିଖରେ ଏକ ଭିଡିଓ ଜାରି କରି ଭାରତରେ ନଭେମ୍ବର 19 ତାରିଖରେ ଏୟାର ଇଣ୍ଡିଆ ବିମାନରେ ବିସ୍ଫୋରଣ କରିବା ନେଇ ଧମକ ଦେଇଥିଲା । ନଭେମ୍ବର 4 ତାରିଖରେ ଏହି ଧମକ ଭିଡିଓଟି ସୋସିଆଲ ମିଡିଆର ସମସ୍ତ ପ୍ଲାଟଫର୍ମରେ ସର୍କୁଲେଟ କରାଯାଇଥିଲା । ଏବେ ଉପା ଆକ୍ଟ ଓ ଆଇପିସି ଅଧୀନରେ ତା’ ବିରୋଧରେ ମାମଲା ଦାଏର କରାଯାଇଥିବା ଜାତୀୟ ତଦନ୍ତକାରୀ ସଂସ୍ଥା ସୂଚନା ଦେଇଛି ।

ତେବେ ଆଜି ଜାତୀୟ ତଦନ୍ତକାରୀ ସଂସ୍ଥା ଏକ ପ୍ରେସରିଲିଜ ‘ଏକ୍ସ’ରେ ସେୟାର କରି ପନ୍ନୁନ ବିରୋଧରେ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ ହୋଇସାରିଥିବା ସୂଚନା ଦେଇଛି । ବେଆଇନ କାର୍ଯ୍ୟକଳାପ ନିରୋଧୀ ଆକ୍ଟ (UAPA) ଓ ଆଇପିସିର ଏକାଧିକ ଧାରାରେ ଏହି ମାମଲା ରୁଜୁ ହୋଇଛି ।

ଏହା ପୂର୍ବରୁ ଭାରତରେ ଆତଙ୍କବାଦୀ ଭାବେ ଘୋଷଣା ହୋଇଛି ପନ୍ନୁନ ଓ ସେ ସଞ୍ଚାଳିତ କରୁଥୁବା ଶିଖ ଫର ଜଷ୍ଟିସ ସଂଗଠନ । ଏହି ସଂଗଠନର ବହୁ ସଦସ୍ୟ କାନାଡା ଓ ବ୍ରିଟେନ ପରି ଦେଶରେ ଆତ୍ମଗୋପନ କରିଛନ୍ତି । ସେମାନଙ୍କ ମଧ୍ୟରେ ଅନ୍ୟ ଜଣେ ପ୍ରମୁଖ ଆତଙ୍କବାଦୀ ହେଉଛି ଅର୍ଶଦ୍ବୀପ ସିଂ ଡାଲା । ସେ ମଧ୍ୟ ଭାରତରେ ଆତଙ୍କୀ ହମଲା କରିବା ପାଇଁ ପଞ୍ଜାବୀ ରାପ ସିଙ୍ଗର ଓ ବ୍ୟବସାୟୀଙ୍କଠାରୁ ଅର୍ଥ ଯୋଗାଡରେ ଲାଗିଥିବା ଭାରତୀୟ ଗୁଇନ୍ଦା ସଂସ୍ଥା ନିକଟରେ ସୂଚନା ରହିଛି ।

ଏହା ମଧ୍ୟ ପଢନ୍ତୁ :-ପୁଣି 21 ଦିନିଆ ପାରୋଲରେ ଜେଲରୁ ବାହାରିବ ଦୁଷ୍କର୍ମୀ ଓ ହତ୍ୟାକାରୀ ରାମ ରହିମ

2019 ମସିହା ପରଠାରୁ ପନ୍ନୁନ ଏନଆଇଏ ତଦନ୍ତ ପରିସରରେ ରହିଛି । ସେ କାନାଡାରେ ଆତ୍ମଗୋପନ କରି ଶିଖ ଫର ଜଷ୍ଟିସ ସଂଗଠନର ନେତୃତ୍ବ ନେଉଛି । ଏହା ପୂର୍ବରୁ ମଧ୍ୟ ସେ ଭାରତରେ ଆକ୍ରମଣ କରିବା ନେଇ ଧମକ ଦେଇସାରିଛି । ‘ହମାସ’ ଆତଙ୍କୀ ସଂଗଠନ ଇସ୍ରାଏଲ ଉପରେ ଆକ୍ରମଣ କରିବା ପରେ ପନ୍ନୁନ ଏକ ଭାରତକୁ ଧମକପୂର୍ଣ୍ଣ ଭିଡିଓ ଜାରି କରିଥିଲା । ଯେଉଁଥିରେ ଇସ୍ରାଏଲ ଉପରେ ଆକ୍ରମଣ ହେବା ପରି ଭାରତରେ ଆକ୍ରମଣ କରି ପଞ୍ଜାବକୁ ମୁକ୍ତ କରିବାକୁ ଧମକ ଦେଇଥିବା ଦେଖିବାକୁ ମିଳିଥିଲା । ଉକ୍ତ ଭିଡିଓରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନାଁ ନେଇଥିଲା । ଏହା ପରେ ଗତମାସ 9 ତାରିଖରେ ଏୟାର ଇଣ୍ଡିଆ ବିମାନରେ ଆକ୍ରମଣ କରାଯିବା ନେଇ ମଧ୍ୟ ଧମକପୂର୍ଣ୍ଣ ଭିଡିଓ ଜାରି କରିଥିଲା । ଏବେ ଜାତୀୟ ତଦନ୍ତକାରୀ ସଂସ୍ଥା ତା’ ବିରୋଧରେ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ଯାଉଛି ।

ବ୍ୟୁରୋ ରିପୋର୍ଟ, ଇଟିଭି ଭାରତ