ନୂଆଦିଲ୍ଲୀ: ମହମ୍ମଦ ମୁଇଜୁ ଆଜି (ଶନିବାର) ମାଲଦ୍ୱୀପର ନୂତନ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଛନ୍ତି । ଶପଥ ଗ୍ରହଣ ସମାରୋହରେ ଭାରତ ପକ୍ଷରୁ କେନ୍ଦ୍ରମନ୍ତ୍ରୀ କିରଣ ରିଜଜୁ ଯୋଗ ଦେଇଥିଲେ । ଭାରତୀୟ ପ୍ରତିନିଧି ଭାବେ କେନ୍ଦ୍ର ମନ୍ତ୍ରୀ କିରଣ ରିଜିଜୁ ମୁଇଜୁଙ୍କ ସହ ସାକ୍ଷାତ କରିଥିଲେ । ଉଭୟଙ୍କ ମଧ୍ୟରେ ଆଲୋଚନା ମଧ୍ୟ ହୋଇଥିଲା । ମାଲଦ୍ୱୀପ ରାଷ୍ଟ୍ରପତିଙ୍କ କାର୍ଯ୍ୟାଳୟରୁ ଜାରି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ଯେ ମାଳଦ୍ୱୀପରୁ ସୈନ୍ୟ ପ୍ରତ୍ୟାହାର କରିବାକୁ ମାଲଦ୍ୱୀପ ସରକାର ଆନୁଷ୍ଠାନିକ ଭାବେ ଭାରତ ସରକାରଙ୍କୁ ଅନୁରୋଧ କରିଛନ୍ତି । ରାଷ୍ଟ୍ରପତି ମୁଇଜୁ ଆଜି (ଶନିବାର) ଏ ବାବଦରେ କିରଣ ରିଜିଜୁଙ୍କ ଆଲୋଚନା କରିବା ସହ ଆନୁଷ୍ଠାନିକ ଭାବେ ଅନୁରୋଧ ମଧ୍ୟ କରିଛନ୍ତି ।

ନୂତନ ରାଷ୍ଟ୍ରପତି ମୁଇଜୁ ମାଳଦ୍ୱୀପର ନାଗରିକମାନଙ୍କୁ ଭାରତୀୟ ହେଲିକପ୍ଟର ଓ ବିମାନ ଯୋଗାଇ ଆସୁଥିବା ଚିକିତ୍ସା ସହାୟତାକୁ ସ୍ୱୀକାର କରିଛନ୍ତି । ସେହିପରି ଦେଶରେ ଜାରି ରହିଥିବା ଡ୍ରଗ୍ କାରବାର ଉପରେ ନଜର ରଖିବା ଓ ନିଶା କାରବାରକୁ ପ୍ରତିହତ କରିବା ଦିଗରେ ସେ ସେଠାରେ ନିୟୋଜିତ ଭାରତୀୟ ସୈନିକଙ୍କ ଭୂମିକାକୁ ମଧ୍ୟ ପ୍ରଶଂସା କରିଥିଲେ । ତଥାପି ମାଳଦ୍ବୀପ ଭାରତକୁ ସୈନ୍ୟ ଅପସାରଣ ପାଇଁ ନିବେଦନ କରିଛି ।

ସୂଚନାଯୋଗ୍ୟ ଯେ, ପ୍ରାୟ 70 ଭାରତୀୟ ସୈନିକ ମାଳଦ୍ୱୀପରେ ରାଡାର ଷ୍ଟେସନ ଓ ସର୍ଭିଲାନ୍ସ ବିମାନରେ ନିୟୋଜିତ ରହିଛନ୍ତି । ନିର୍ବାଚନ ପ୍ରଚାର ସମୟରେ ମହମ୍ମଦ ମୁଇଜୁ ଦେଶବାସୀଙ୍କୁ ପ୍ରତିଶୃତି ଦେଇଥିଲେ ଯେ ସେ ମାଳଦ୍ବୀପରୁ ଭାରତୀୟ ସେନାକୁ ପ୍ରତ୍ୟାହାର କରିବେ । ତେବେ ଅନ୍ୟ ଏକ କୂଟନୈତିକ ସୂଚନା ଆଧାରରେ ଏବେ ମାଳଦ୍ବୀପ କମାଣ ସମ୍ଭାଳିଥିବା ମୁଇଜୁ ଚୀନ୍‌ର ନିକଟବର୍ତ୍ତୀ ବୋଲି ବିବେଚନା ମଧ୍ୟ କରାଯାଏ । ସେ ଦୃଷ୍ଟିରେ ସେ ଭାରତ ପ୍ରତି ଏପରି ଆଭିମୁଖ୍ୟ ଗ୍ରହଣ କରିଥାଇ ପାରନ୍ତି ବୋଲି ମଧ୍ୟ ଚର୍ଚ୍ଚା ମଧ୍ୟ ହୁଏ । ତେବେ ନିକଟରେ ଏପରି ଚର୍ଚ୍ଚାକୁ ନେଇ ସେ ଏକ ସ୍ପଷ୍ଟୀକରଣ ମଧ୍ୟ ରଖିଥିଲେ । ଭାରତୀୟ ସୈନ୍ୟ ପ୍ରତ୍ୟାହାର ହେବା ପରେ ସେ ଚୀନ କିମ୍ବା ଅନ୍ୟ କୌଣସି ଦେଶଠାରୁ ସାମରିକ ସାହାଯ୍ୟ ମାଗିବେ ନାହିଁ ବୋଲି ମଧ୍ୟ ସେ ସ୍ପଷ୍ଟ କରିଥିଲେ । ଆଜି ସେ ବିଧିବଦ୍ଧ ଭାବେ ଶପଥ ନେଇଛନ୍ତି । ଏହି ବସରରେ ସେ ଭାରତୀୟ ପ୍ରତିନିଧି ତଥା କେନ୍ଦ୍ର ମନ୍ତ୍ରୀ କିରଣ ରିଜିଜୁ ସହ ଆଲୋଚନା କରିବା ସହ ପ୍ରଥମେ ଏହି ପ୍ରସଙ୍ଗ ଉଠାଇଛନ୍ତି । ଯାହା ସେ ନିର୍ବାଚନ ସମୟରେ ପ୍ରତିଶୃତି ଦେଇଥିଲେ ।

ବ୍ୟୁରୋ ରିପୋର୍ଟ, ଇଟିଭି ଭାରତ