ହାଇଦ୍ରାବାଦ: ଜାତୀୟ ରାଜନୀତିରେ ପ୍ରବେଶ କଲା ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ କେସିଆରଙ୍କ ଦଳ TRS (KCR has finalized name of his new party)। ଦଳମୁଖ୍ୟ କେସିଆର ନିଜ ଜାତୀୟ ଦଳ ପାଇଁ ନାମ ଚୂଡାନ୍ତ କରିଛନ୍ତି । ପବିତ୍ର ବିଜୟା ଦଶମୀ ଦିନ ସେ ଜାତୀୟ ଦଳର ନାମ ଘୋଷଣା କରିବା ନେଇ ସୂଚନା ଦେଇଥିଲେ । ତେଲେଙ୍ଗାନାରେ ଶାସନରେ ଥିବା ତାଙ୍କ ନେତୃତ୍ବାଧୀନ ତେଲେଙ୍ଗାନା ରାଷ୍ଟ୍ର ସମିତି (TRS) ଏବେ ଭାରତ ରାଷ୍ଟ୍ର ସମିତି (BRS) ନାମରେ ପରିବର୍ତ୍ତିତ ହେବାକୁ ଯାଉଛି । ନାମ ଚୂଡାନ୍ତ ହୋଇଥିବା ନେଇ କେସିଆର ସୂଚନା ଦେଇ ସାରିଥିବା ବେଳେ ଅପରାହ୍ନରେ ଦଳୀୟ ବୈଠକ ପରେ ଆନୁଷ୍ଠାନିକ ଘୋଷଣା ମଧ୍ୟ କରିବେ ।
ଗତକାଲି ରାତିରେ ସେ ଦଳୀୟ କାର୍ଯ୍ୟକର୍ତ୍ତାଙ୍କ ସହ ଦୀର୍ଘ ସମୟ ଧରି ଆଲୋଚନା କରିଥିଲେ । ଏକାଧିକ ପ୍ରସ୍ତାବିତ ନାମ ଉପରେ ବିଚାର ବିମର୍ଶ ହେବା ପରେ ଭାରତ ରାଷ୍ଟ୍ର ସମିତି (BRS) ନାମରେ ଜାତୀୟ ଦଳ ଲଞ୍ଚ ହେବା ନେଇ ନିଷ୍ପତ୍ତିରେ ପହଞ୍ଚିଥିଲା ଦଳ । ଜାତୀୟ ଦଳ ହେଉଥିବା କାରଣରୁ ସମସ୍ତ ଭାଷାଭାଷୀ ଲୋକଙ୍କୁ ବୁଝାପଡିବା ପରି ନାମକରଣ କରାଯିବା ନେଇ ଦଳ ପକ୍ଷରୁ ସୂଚନା ମିଳିଥିଲା । ଆଜି ଅପରାହ୍ନରେ ଦଳର ସାଧାରଣ ପରିଷଦ ବୈଠକରେ ଏନେଇ ଏକ ସଙ୍କଳ୍ପ ପାରିତ ହେବାକୁ ଯାଉଛି । କେସିଆରଙ୍କ ପ୍ରସ୍ତାବକୁ 283 ସଦସ୍ୟ ଅନଔପଚାରିକ ଭାବେ ସମର୍ଥନ ଜଣାଇ ସାରିଛନ୍ତି । ଦଳୀୟ ବୈଠକରେ ସାର୍ବଜନୀନ ଭାବେ ଏହାକୁ ସଙ୍କଳ୍ପପତ୍ର ମାଧ୍ୟମରେ ଅନୁମୋଦିତ କରାଯାଇ ଔପଚାରିକତା ସମ୍ପୂର୍ଣ୍ଣ କରାଯିବ ।
ଅନ୍ୟ ଏକ ସୂଚନା ଅନୁସାରେ ଏହି ଦଳୀୟ ବୈଠକରେ ଜେଡିଏସ ନେତା ତଥା କର୍ଣ୍ଣାଟକ ପୂର୍ବତନ ମୁଖ୍ୟମନ୍ତ୍ରୀ କୁମାରସ୍ବାମୀଙ୍କ ସମେତ ଅନ୍ୟ କିଛି ବରିଷ୍ଠ ନେତା ମଧ୍ୟ ସାମିଲ ରହିବେ । ଦଳୀୟ ବୈଠକ ପରେ ଦଳ ମୁଖ୍ୟ ତଥା କେସିଆର ଗଣମାଧ୍ୟମକୁ ସମ୍ବୋଧିତ ମଧ୍ୟ କରିପାରନ୍ତି । ଏହି ପ୍ରେସମିଟରେ ଦଳର ଆଗାମୀ ରଣନୀତି ଓ କାର୍ଯ୍ୟପନ୍ଥା ସମ୍ପର୍କରେ ସେ ସୂଚନା ଦେଇପାରନ୍ତି । ପରେ ଦଳର ବରିଷ୍ଠ କାର୍ଯ୍ୟକର୍ତ୍ତାଙ୍କୁ ନେଇ ଗଠିତ ଏକ ପ୍ରତିନିଧି ମଣ୍ଡଳୀ ଦିଲ୍ଲୀ ଗସ୍ତରେ ଯାଇ ଭାରତୀୟ ନିର୍ବାଚନ କମିଶନଙ୍କ ଦୃଷ୍ଟି ଆକର୍ଷଣ କରିବ । ଆଞ୍ଚଳିକ ଦଳରୁ ଜାତୀୟ ଦଳ ଭାବେ ପଞ୍ଜୀକରଣ ପ୍ରକ୍ରିୟା ଓ ଚିହ୍ନ ଆଦି ନେଇ ଏହି ପ୍ରତିନିଧି ମଣ୍ଡଳୀ ନିର୍ବାଚନ ଆୟୁକ୍ତଙ୍କ ଦୃଷ୍ଟି ଆକର୍ଷଣ କରିବା ନେଇ ସୂଚନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
