ମୁମ୍ବାଇ: ମହାରାଷ୍ଟ୍ରରେ ବିଜେପି କ୍ଷମତାରୁ ଯାଉ ଯାଉ ଏବେ ଦେଖାଦେଇଛି ରାଜ୍ୟ ବିଜେପିରେ ଗୋଷ୍ଠୀ କନ୍ଦଳ । ଖୁବଶୀଘ୍ର ଦଳକୁ ଲାଗିପାରେ ଆଉ ଏକ ଶକ୍ତ ଝଟକା । ରାଜ୍ୟ ଶାଖାର ଚର୍ଚିତ ମହିଳା ଚେହେରା କୁହାଯାଉଥିବା ପଙ୍କଜା ମୁଣ୍ଡେ ଦଳ ଛାଡିବେ ବୋଲି ଏବେ ସବୁଠି ଚାଲିଛି ଚର୍ଚ୍ଚା । ଆଉ ଖୋଦ ପଙ୍କଜାଙ୍କ ଆଚରଣ ଓ ଉଚାରଣ ମଧ୍ୟ ଏହି ଚର୍ଚ୍ଚାକୁ ଖୋରାକ ଯୋଗାଉଛି ।
ତେବେ ଏହି ସବୁ ଚର୍ଚ୍ଚାକୁ ନେଇ ସୋମବାର ରାଜ୍ୟ ବିଜେପି ମୁଖ୍ୟ ଚନ୍ଦ୍ରକାନ୍ତ ପାଟିଲ ଏହା ଏକ ଗୁଜବ ବୋଲି କହିଥିଲେ । ଏଥିରେ କୌଣସି ସତ୍ୟାସତ୍ୟ ନଥିବା ସେ କହିଛନ୍ତି ।
କିନ୍ତୁ ଆଜି ଖୋଦ ପଙ୍କଜା ମୁଣ୍ଡେ କହିଛନ୍ତି ସେ ଦଳର ଏକ ଶୃଙ୍ଖଳିତ ସଚ୍ଚୋଟ କାର୍ଯ୍ୟକର୍ତା । ଦଳ ପାଇଁ କାମ କରୁଛନ୍ତି। ତାଙ୍କ ଉପରେ ଲାଗିଥିବା ଅଭିଯୋଗକୁ ନେଇ ସେ ବ୍ୟଥିତ। ଦଳ ଛାଡିବା ନଛାଡିବା ଉପରେ ସେ ଏବେ କିଛି କହିପାରିବେ ନାହିଁ । ଯାହା କିଛି କହିବେ ଡିସେମ୍ବର 12ରେ କହିବେ ବୋଲି ସ୍ପଷ୍ଟ କରିଛନ୍ତି । ରାଜନୈତିକ ପଣ୍ଡିତଙ୍କ ଆକଳନ ଅନୁସାରେ ପଙ୍କଜା ସେହିଦିନ ବିଜେପି ଛାଡି ଶିବସେନାରେ ଯୋଗଦେବେ । ଯଦି ଏହା ହୁଏ ଖାଲି ରାଜ୍ୟ ନୁହେଁ ସାରା ଦେଶରେ ବିଜେପି ପାଇଁ ଶକ୍ତ ଧକ୍କା ହେବାକୁ ଯାଉଛି।
ସୂଚନାଯୋଗ୍ୟଯେ ଡିସେମ୍ବର 12 ହେଉଛି ପଙ୍କଜା ମୁଣ୍ଡେଙ୍କ ବାପା ତଥା ଦିବଂଗତ ନେତା ଗୋପୀନୀଥ ମୁଣ୍ଡେଙ୍କ ଜନ୍ମଦିନ । ସେହିଦିନ ପଙ୍କଜା ନିଜ ସମର୍ଥକଙ୍କୁ ନେଇ ଏକ ବିରାଟ ସଭାର ଆୟୋଜନ କରିଛନ୍ତି । ସେହି ସଭାରେ ବୋଧହୁଏ ବିଜେପି ଛାଡିବା ଘୋଷଣା କରିପାରନ୍ତି ପଙ୍କଜା ।
