ଫୁଲବାଣୀ: କେରଳରେ ପ୍ରେମିକାକୁ ହତ୍ୟା କରିବା ପରେ କନ୍ଧମାଳରେ ଆସି ଲୁଚିଥିଲା ଅଭିଯୁକ୍ତ ପ୍ରେମିକ । ବିଶେଷ ସୂତ୍ରରୁ ଖବର ପାଇ କେରଳ ପୋଲିସ କନ୍ଧମାଳ ଆସି କୋଟଗଡ ଅଞ୍ଚଳରୁ ଅଭିଯୁକ୍ତକୁ ଗିରଫ କରିଛି । ଅଭିଯୁକ୍ତର ନାମ ସାମୁଏଲ ବଡ଼ ମାଝୀ ଓ ତା' ଘର ରାମନିଗୁଡାରେ । ସେ ନିଜ ପ୍ରେମିକା ସହ ଦାଦନ ଖଟିବାକୁ ଯାଇଥିବା ବେଳେ ସେଠାରେ ପ୍ରେମିକାକୁ ହତ୍ୟା କରିଥିଲା । ଏହାପରେ କନ୍ଧମାଳ ଜିଲ୍ଲାକୁ ଚାଲି ଆସି ନିଜ ଶ୍ବଶୁର ଘରେ ଆତ୍ମଗୋପନ କରିଥିଲା । ଓଡ଼ିଶା ପୋଲିସ ସହାୟତାରେ କେରଳ ପୋଲିସ ତାକୁ ଧରିବାରେ ସକ୍ଷମ ହୋଇଛି ।
ସୂଚନା ମୁତାବକ, କେରଳକୁ ଦାଦନ ଖଟିବାକୁ ଯାଇଥିଲେ ରାମନିଗୁଡାର ସାମୁଏଲ ବଡ଼ ମାଝୀ ଓ ରାଇକିଆ ଥାନା ଅନ୍ତର୍ଗତ ଚାଞ୍ଚେଡ଼ିର ରୀତିକା ସାହୁ । ଦୀର୍ଘ ଦିନ ଧରି ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା । କିନ୍ତୁ ପ୍ରେମିକା ସାମୁଏଲ ପୂର୍ବରୁ ବିବାହିତ ଥିବା ଜାଣିବା ପରେ ଦୁହିଁଙ୍କ ମଧ୍ୟରେ ଫାଟ ସୃଷ୍ଟି ହୋଇଥିଲା । ଏହାକୁ ନେଇ ସାମୁଏଲ ଓ ରୀତିକାଙ୍କ ଭିତରେ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ସାମୁଏଲ ଏକ ଛୁରୀରେ ରୀତିକାଙ୍କୁ ମରଣାନ୍ତକ ଆକ୍ରମଣ କରିଥିଲା । ଏଥିରେ ତାଙ୍କର ମୃତ୍ୟୁ ଘଟିଥିଲା ।
ଏନେଇ କେରଳର ପିଚୁଲା ଥାନାରେ କେସ ନଂ ୨୬୮/ ୨୪ରେ ଏକ ହତ୍ୟା ମାମଲା ରୁଜୁ ହୋଇଥିଲା । ସେପଟେ ଏହି ହତ୍ୟାକାଣ୍ଡ ଘଟାଇ ଅଭିଯୁକ୍ତ ପ୍ରେମିକ ଜଣକ କେରଳରୁ ଚାଲିଆସି କୋଟଗଡ ସୁବର୍ଣ୍ଣଗିରୀ ପଞ୍ଚାୟତର ରଙ୍ଗାପଙ୍ଗା ଗାଁରେ ଥିବା ନିଜ ଶ୍ୱଶୁର ଘରେ ଆତ୍ମଗୋପନ କରିଥିଲା । ଏନେଇ ବିଶେଷ ସୂତ୍ରରୁ ସୂଚନା ପାଇଥିଲା କେରଳ ପୋଲିସ । ଏହାପରେ କେରଳ ପୋଲିସର ଏକ ଟିମ୍ ଓଡ଼ିଶା ଆସି କନ୍ଧମାଳ ଜିଲ୍ଲାର କୋଟଗଡ ଆଇଆଇସି ଦୀପ୍ତି ରଞ୍ଜନ ବେହେରା, ଏସଆଇ ରଜନୀକାନ୍ତ ଦାସ, ହୋମଗାର୍ଡ ଅଜୟ ନାୟକ, ହୋମଗାର୍ଡ ଜିତ ପ୍ରଧାନଙ୍କ ସହ ମିଳିତ ଭାବେ ଅଭିଯୁକ୍ତର ଶ୍ବଶୁର ଘର ଗାଁରେ ଚଢାଉ କରି ସାମୁଏଲକୁ ଧରିବାରେ ସକ୍ଷମ ହୋଇଛି । ଏନେଇ ଥାନା ଅଧିକାରୀ ଦୀପ୍ତି ରଞ୍ଜନ ବେହେରା ସୂଚନା ଦେଇଛନ୍ତି ।
ଇଟିଭ ଭାରତ, କନ୍ଧମାଳ
