ନିର୍ବାଚନ ତାରିଖ ଯେତିକି ପାଖଉଛି ବେଗୁନିଆ ନିର୍ବାଚନ ମଣ୍ଡଳୀରେ ଉଭୟ ବିଜେପି, ବିଜେଡି ଓ କଂଗ୍ରେସ ପ୍ରାର୍ଥୀ ନିଜ ଦମ ଦେଖାଉଛନ୍ତି । ସମସ୍ତ ପ୍ରାର୍ଥୀ ନିଜ ସପକ୍ଷରେ ଭୋଟ ହାତେଇବା ପାଇଁ ଜୋରଦାର ଉଦ୍ୟମ କରୁଥିବା ଦେଖିବାକୁ ମିଳୁଛି । ସେହିଭଳି ବେଗୁନିଆ ନିର୍ବାଚନ ମଣ୍ଡଳୀରେ ବିଜେପି ଅଧିକ ମଜଭୁତ ହେବାରେ ଲାଗିଛି । ବୁଧବାର ଅପରାହ୍ନରେ ବାଘମାରିରେ ବିଜେପି ପକ୍ଷରୁ ଏକ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା ।
ମିଶ୍ରଣ ପର୍ବକୁ ନେଇ ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି, '' ଓଡ଼ିଶାରେ ଏଥର ବିଜେପି ସରକାର କରିବାକୁ ଯାଉଛି ଏବଂ ଏହାର ଶୁଭାରମ୍ଭ ବେଗୁନିଆରୁ ହେବ । ଜଣେ ଓଡ଼ିଆ ଲୋକ ମୁଖ୍ୟମନ୍ତ୍ରୀ ହେବେ ଯିଏ ଓଡ଼ିଆରେ କହି ପାରୁଥିବେ ଓ ସୁସ୍ଥ ଥିବେ । ଏହି ମିଶ୍ରଣ ପର୍ବ ବିଜେପିକୁ ଆହୁରି ମଜଭୁତ କରିବା ସହ ବେଗୁନିଆ ନିର୍ବାଚନ ମଣ୍ଡଳୀରେ ବିଜେପିର ବିଜୟ ହେବ । ''ବିଜେଡି ଛାଡି ବିଜେପିରେ ସାମିଲ ହୋଇଥିବା ଚକ୍ରଧର ପାଇକରାୟ କହିଛନ୍ତି, ''ଗତ ପଞ୍ଚାୟତ ନିର୍ବାଚନରେ ମୁଁ ବିଜେଡିର ସରପଞ୍ଚ ପ୍ରାର୍ଥୀ ହୋଇ ଅଳ୍ପ ଭୋଟ ବ୍ୟବଧାନରେ ପରାଜିତ ହୋଇଥିଲି କିନ୍ତୁ ବିଜୁ ଜନତା ଦଳର ନେତାଙ୍କ ଅତ୍ୟାଚାର ଓ ମନମୁଖୀ କାର୍ଯ୍ୟରେ ଅତିଷ୍ଠ ହୋଇ ବିଜେପିରେ ସାମିଲ ହୋଇଛି । ଗତ ସନ୍ଧ୍ୟାରେ ଅପରାଜିତା ଷଡ଼ଙ୍ଗୀ ରାଜସୁନାଖଳା ବଜାରରେ ବିରାଟ ବାଇକ ଶୋଭାଯାତ୍ରା କରି ଜନସାଧାରଣଙ୍କ ନିକଟରେ ଭୋଟ ଭିକ୍ଷା କରିବା ସହ ଆଶୀର୍ବାଦ କାମନା କରିଥିଲେ ।
ଇଟିଭି ଭାରତ, ଖୋର୍ଦ୍ଧା
