କେନ୍ଦୁଝର: ରାଜ୍ୟରେ ଜାରି ରହିଛି ଗ୍ରୀଷ୍ମ ପ୍ରବାହ । ସେଥିରେ ପୁଣି ଦାଉ ସାଧୁଛି ଜଳକଷ୍ଟ । ପାଣି ମୁନ୍ଦେ ପାଇଁ ଡହଳ ବିକଳ ହେଉଛନ୍ତି କେନ୍ଦୁଝର ସହରବାସୀ । ସହରର ଭୂତଳ ଜଳସ୍ତର ଦିନକୁ ଦିନ ହ୍ରାସ ପାଇବାରେ ଲାଗିଛି । ଅନ୍ୟପଟେ ବିଭିନ୍ନ ୱାର୍ଡରେ ଥିବା ପୋଖରୀଗୁଡ଼ିକ ମଧ୍ୟରୁ କିଛି ରୂପାନ୍ତରିତ କାର୍ଯ୍ୟ ନେଇ ବନ୍ଦ ହୋଇପଡ଼ିଥିବା ବେଳେ କିଛି ନଷ୍ଟ ହୋଇଗଲାଣି ।ଫଳରେ ସହରରେ ଜଳ ସଙ୍କଟ ମୁଣ୍ଡ ଟେକିଛି । ଅନ୍ୟପଟେ ଗତ ଏକ ମାସ ହେବ ସହରର ବିଭିନ୍ନ ୱାର୍ଡକୁ ଜଳ ଯୋଗାଣ ହେଉନଥିବା ଅଭିଯୋଗ କରିଛନ୍ତି ସହରବାସୀ । ଯାହାଫଳରେ କେନ୍ଦୁଝରରେ ଏହି ଗ୍ରୀଷ୍ମ ପ୍ରବାହ ବୃଦ୍ଧି ଠାରୁ ଅଧିକ ଦାଉ ସାଧୁଛି ଜଳକଷ୍ଟ ।
କେନ୍ଦୁଝରରେ ପ୍ରବାହିତ ହେଉଛି ମାଛକାନ୍ଦଣା ନଦୀ । ଏହି ନଦୀ ଉପରେ ରାଜାରାଜୁଡ଼ା ଅମଳରେ ଏକ ନଦୀବନ୍ଧ ବନ୍ଧାଯାଇ ସହରବାସୀଙ୍କ ପାଇଁ ପାନୀୟ ଜଳ ଯୋଗାଣ ବ୍ୟବସ୍ଥା ହୋଇଥିଲା । ସେବେଠାରୁ କେନ୍ଦୁଝର ସହରକୁ ଦୀର୍ଘ ଦିନ ଧରି ସାନମାଛକାନ୍ଦଣା ନଦୀରୁ ପାନୀୟ ଜଳ ଯୋଗାଣ ହୋଇଆସୁଛି । କିନ୍ତୁ ଏହି ନଦୀବନ୍ଧରେ ଜଳଧାରଣ କ୍ଷମତା କମି କମି ଆସୁଛି । ଏହା ଫଳରେ ସହରରେ ପାନୀୟ ଜଳ ସମସ୍ୟା ବୃଦ୍ଧି ପାଇବାରେ ଲାଗିଛି । ଦିନ ଦିନ ଧରି ସହରର ବିଭିନ୍ନ ୱାର୍ଡକୁ ଜଳ ଯୋଗାଣ ବାଧାପ୍ରାପ୍ତ ହେଉଛି । ଏହା ଫଳରେ ସହରବାସୀ ନାହିଁ ନଥିବା ଜଳକଷ୍ଟର ସମ୍ମୁଖୀନ ହେଉଛନ୍ତି । ବିଶେଷ କରି ଏକ ନମ୍ୱର ୱାର୍ଡରୁ ଦଶ ନମ୍ବର ୱାର୍ଡ ପର୍ଯ୍ୟନ୍ତ ଲୋକମାନେ ଅସୁବିଧାର ସମ୍ମୁଖୀନ ହେଉଛନ୍ତି ।
ପିଇବା ପାଣି ପାଇଁ ଦୂରରେ ଥିବା ନଳକୂପ ହିଁ ସାହାରା ପାଲଟିଛି । ଗାଧୋଇବା ଓ ଶୌଚ ପାଇଁ ମଧ୍ୟ ଲୋକେ ହଇରାଣ ହେଉଛନ୍ତି । ତେବେ ପୁରୁଷମାନେ ତ କେଉଁଭଳି ଭାବରେ ବାହାରେ ଗାଧୋଇବା କିମ୍ବା ଅନ୍ୟ କାମ କରିନେଉଛନ୍ତି କିନ୍ତୁ ଏସବୁ ମଧ୍ୟରେ ହଇରାଣ ହେଉଛନ୍ତି ମହିଳା । ଏହି ସମୟରେ ସହର ପାନୀୟ ଜଳ ଯୋଗାଣ ବିଭାଗର ଟ୍ୟାଙ୍କର ହିଁ ସାହାରା ପାଲଟିଛି । ତେବେ ଏହି ଟ୍ୟାଙ୍କ ମଧ୍ୟ ସବୁଦିନ ଆସୁନଥିବା ଅଭିଯୋଗ କରିଛନ୍ତି ଅଞ୍ଚଳବାସୀ । ଏହି ଟ୍ୟାଙ୍କରରୁ ପାନୀୟ ଜଳ ନେବା ପାଇଁ ଲାଇନ୍ ଲଗାଇ ଘଣ୍ଟା ଘଣ୍ଟା ଧରି ଛିଡା ହେବାକୁ ପଡୁଛି । ଯେତିକି ପାଣି ହେଉଛି ସେତିକିରେ ସନ୍ତୁଷ୍ଟ ହେବାକୁ ପଡୁଛି ସହରବାସୀଙ୍କୁ । ଏନେଇ ପୌରପାଳିକା ପକ୍ଷରୁ କିଛି ଟ୍ୟାଙ୍କର ଯୋଗାଇ ଦିଆଯାଉଥିବା ବେଳେ ବହୁ ସମୟରେ ପାଣି ନପାଇ ସହରବାସୀ ଅସନ୍ତୋଷ ବ୍ୟକ୍ତ କରିଛନ୍ତି । ଏନେଇ ଜଳ ଯୋଗାଣ ବିଭାଗ କିମ୍ବା ପୌରପାଳିକାର କୌଣସି ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ ।
ଇଟିଭି ଭାରତ, କେନ୍ଦୁଝର
