ଭୁବନେଶ୍ବର: ବିଜେପିର ବାରମ୍ବାର ଆଦର୍ଶ ଆଚରଣ ବିଧି ଉଲ୍ଲଙ୍ଘନ ନେଇ ମୁଖ୍ୟ ନିର୍ବାଚନ ଅଧିକାରୀଙ୍କ ପାଖରେ ଫେରାଦ ହେଲା ବିଜେଡି । ବିଜେଡିର ଏକ ଟିମ୍ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ନିର୍ବାଚନ ପ୍ରଚାର କାର୍ଯ୍ୟରେ ବିଜେପି ଛୋଟ ପିଲାଙ୍କୁ ବ୍ୟବହାର କରୁଥିବାର ଅଭିଯୋଗ କରିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ବାରମ୍ବାର ପିଲାମାନଙ୍କୁ ପ୍ରଚାର କାର୍ଯ୍ୟରେ ବ୍ୟବହାର କରୁଥିବା ବେଳେ ଏବେ ବ୍ରହ୍ମପୁର ସାଂସଦ ପ୍ରାର୍ଥୀ ପ୍ରଦୀପ ପାଣିଗ୍ରାହୀ ଶିଶୁମାନଙ୍କୁ ବ୍ୟବହାର କରୁଛନ୍ତି । ଯାହା ଆଚରଣ ବିଧିର ଖୋଲା ଖୋଲି ଉଲ୍ଲଙ୍ଘନ କରୁଛି ବିଜେପି ।
ବିଜେଡି ମୁଖପାତ୍ର ତୁମ୍ବନାଥ ପଣ୍ଡା କହିଛନ୍ତି ଯେ, ଆଜି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ବ୍ରହ୍ମପୁର ଗସ୍ତ କାର୍ଯ୍ୟକ୍ରମ ରହିଥିବାରୁ ଗତକାଲି ରାତିରେ ବ୍ରହ୍ମପୁର ସହରରେ ଛୋଟ ଛୋଟ ପିଲାମାନେ ବିଜେପି ପୋଷ୍ଟରେ ମାରୁଥିବା ଦେଖିବାକୁ ମିଳିଥିଲା । ନବମ ଦଶମ ଶ୍ରେଣୀରେ ପଢ଼ୁଥିବା ପିଲାମାନଙ୍କୁ ପ୍ରଦୀପ ପାଣିଗ୍ରାହୀ ଅର୍ଥ ଦେଇ ନିର୍ବାଚନୀ କାର୍ଯ୍ୟରେ ବ୍ୟବହାର କରୁଛନ୍ତି । ଯାହା ଆଦର୍ଶ ଆଚରଣ ବିଧି ଉଲ୍ଲଙ୍ଘନ ହୋଇଛି ।
ସେ ଆହୁରି ମଧ୍ୟ କହିଛନ୍ତି,"ବିଜେପି ନେତାମାନେ ନିଜ ଭିତରେ ପ୍ରତିଯୋଗିତା କରୁଛନ୍ତି ଆଚରଣ ବିଧିର ଉଲ୍ଲଙ୍ଘନ ନେଇ । ଏପରି ଜାରି ରହିଲେ ରାଜ୍ୟରେ ମୁକ୍ତ ଅବାଧ ନିରପେକ୍ଷ ନିର୍ବାଚନ ହୋଇପାରିବ ନାହିଁ । ତେଣୁ ବିଜେପିର ଏହି ବିଶୃଙ୍ଖଳିତ ନେତାମାନଙ୍କ ପାଇଁ ଏକ ଗାଇଡ଼ ଲାଇନ ସ୍ଥିର କରିବାକୁ ବିଜେଡି ମୁଖ୍ୟ ନିର୍ବାଚନ ଅଧିକାରୀଙ୍କୁ ଅନୁରୋଧ କରିବା ସହ ଆଚରଣ ବିଧି ଉଲ୍ଲଙ୍ଘନ ପାଇଁ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛୁ ।
ପ୍ରକାଶ ଯୋଗ୍ୟ,ସେହିପରି ଗତକାଲି ମଧ୍ୟ ବିଜେଡି ନିର୍ବାଚନ ଅଧିକାରୀଙ୍କ ଦ୍ବାରସ୍ଥ ହୋଇଥିଲା । ବଲାଙ୍ଗୀର ବିଜେପି ବିଧାୟକ ପ୍ରାର୍ଥୀ ଗୋପାଳଜୀ ପାଣିଗ୍ରାହୀ ବିରୋଧରେ ନିର୍ବାଚନ ଅଧିକାରୀଙ୍କ ଦ୍ବାରସ୍ଥ ହୋଇଥିଲା ବିଜେଡି । ଗୋପାଳଜୀ ପାଣିଗ୍ରାହୀଙ୍କ ବିରୁଦ୍ଧରେ ଆଚରଣ ବିଧି ଉଲ୍ଲଙ୍ଘନ ଅଭିଯୋଗ ଆଣିଥିଲା ବିଜେଡି । ଗୋପାଳଜୀ ପାଣିଗ୍ରାହୀ ଏପ୍ରିଲ 23 ତାରିଖରେ ରାମଜୀ ମଣ୍ଡପ ସାରସପିଠ, ବଲାଙ୍ଗୀରରେ ପିଲାମାନଙ୍କୁ ନେଇ ନିର୍ବାଚନ ପ୍ରଚାରରେ ବ୍ୟବହାର କରିଥିଲେ । ପିଲାମାନଙ୍କୁ ବିଜେପି ପତକା ଓ ଉତ୍ତରୀୟ ପକାଉଥିବା ଫଟୋ ସାମନାକୁ ଆସିଥିଲା ।
ଇଟିଭି ଭାରତ,ଭୁବନେଶ୍ବର
