ଗଞ୍ଜାମ: ଅଶାନ୍ତ ଗଞ୍ଜାମ । କାଜୁ ଜଙ୍ଗଲରେ ପୁଣି ଫୁଟିଲା ଗୁଳି । ଗଞ୍ଜାମ ଜିଲ୍ଲାର ବୁଗୁଡା ଥାନା ଅନ୍ତର୍ଗତ ପୋକସୁଙ୍ଗା ଗ୍ରାମର କାଜୁ ଜଙ୍ଗଲରେ ଗୁଳିମାଡ ହୋଇଛି । ଏଥିରେ ୨ ଜଣ ଗୁରୁତର ଆହତ ହୋଇଛନ୍ତି । ଦୁଇ ଜଣ ଆହତଙ୍କୁ ପ୍ରଥମେ ବୁଗୁଡା ମେଡିକାଲ ଓ ପରେ ବ୍ରହ୍ମପୁର ଏମ୍.କେ.ସି.ଜି ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ତେବେ କିଏ ଏବଂ କେଉଁ କାରଣରୁ ଏଭଳି ଗୁଳିମାଡ କରିଛି ତାହାର କାରଣ ଏବେ ସୁଦ୍ଧା ଜଣାପଡିନଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ, ଗଞ୍ଜାମ ଜିଲ୍ଲାର ପୋକସୁଙ୍ଗା ଗ୍ରାମର ରଘୁନାଥ ଜାନି ଦୀର୍ଘ ଦିନ ଧରି ଆନ୍ଧ୍ରପ୍ରଦେଶରେ ରହୁଥିବା ବେଳେ ଚଳିତ ନିର୍ବାଚନରେ ମତସାବ୍ୟସ୍ତ କରିବା ପାଇଁ ଭୋଟିଂର କିଛି ଦିନ ପୂର୍ବରୁ ଗ୍ରାମକୁ ଆସିଥିଲେ । ଶନିବାର ଦିନ ପୋକସୁଙ୍ଗା ଗ୍ରାମରେ ଥିବା କାଜୁ ଜଙ୍ଗଲକୁ ରଘୁନାଥ ଜାନି ଓ ଅବକାଶ ଜାନି ଯାଇଥିବା ବେଳେ ଅତର୍କିତ ଭାବେ ଗୁଳିମାଡ ହୋଇଥିଲା । ଉଭୟଙ୍କ ଗୋଡରେ ଗୁଳି ବାଜିଥିବାବେଳେ ସେମାନେ ଗୁରୁତର ଆହତ ହୋଇପଡିଥିଲେ । ସ୍ଥାନୀୟ ଲୋକେ ଆମ୍ବୁଲାନ୍ସରେ ଉଭୟଙ୍କୁ ପ୍ରଥମେ ବୁଗୁଡା ମେଡିକାଲରେ ଭର୍ତ୍ତି କରିଥିଲେ । ପରେ ସେମାନଙ୍କୁ ବ୍ରହ୍ମପୁର ଏମ୍.କେ.ସି.ଜି ମେଡିକାଲ ସ୍ଥାନାନ୍ତର କରାଯାଇଛି ।
ଏହାମଧ୍ୟ ପଢନ୍ତୁ..ନିର୍ବାଚନ ବେଳେ ଗଞ୍ଜାମରେ ହିଂସାକାଣ୍ଡ, ୨୫ ଗିରଫ - Poll Violence
ଗୁରୁତର ରଘୁନାଥ ଜାନିଙ୍କ ସମ୍ପର୍କୀୟଙ୍କ କହିବା ମୁତାବକ, "ନିର୍ବାଚନର କିଛି ଦିନ ପୂର୍ବରୁ ସେ ଘରକୁ ଆସିଥିବା ବେଳେ ତାଙ୍କର କାହା ସହ କୌଣସି ଶତ୍ରୁତା ନାହିଁ । କେଉଁ କାରଣଙ୍କୁ ଏହି ଗୁଳିକାଣ୍ଡ ଘଟିଲା ତାହା ଜଣାନାହିଁ ।"
ଅନ୍ୟପଟେ କିଏ କେଉଁ କାରଣରୁ ଏଭଳି ଗୁଳିମାଡ କରିଛି ତାହା ଏବେସୁଦ୍ଧା ଜଣାପଡିନଥିବା ବେଳେ ପୋଲିସ ଘଟଣାର ତଦନ୍ତ ଆରମ୍ଭ କରିଛି । ଗତ କିଛି ମାସ ଧରି ଗଞ୍ଜାମ ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ପୁଣିଥରେ ଅପରାଧୀମାନେ ସକ୍ରିୟ ହୋଇପଡ଼ିଥିବା ବେଳେ ନିର୍ବାଚନ ପୂର୍ବରୁ ଏବଂ ପରେ ଏପରି ବିଭିନ୍ନ ସ୍ଥାନରେ ଅପରାଧିକ ଘଟଣା ବୃଦ୍ଧି ପାଇଥିବା ଦେଖିବାକୁ ମିଳିଛି । ପୋଲିସର ତଦନ୍ତ ପରେ ଏହି ଗୁଳିକାଣ୍ଡର କାରଣ ସ୍ପଷ୍ଟ ହେବ ବୋଲି କୁହାଯାଇଛି ।
ଇଟିଭି ଭାରତ, ଗଞ୍ଜାମ
