ରାଉରକେଲା: ରାହୁଲ ଗାନ୍ଧୀଙ୍କ ଗସ୍ତ ପରେ ରାଉରକେଲା ଜିଲ୍ଲା କଂଗ୍ରେସରେ ହଟଚମଟ । ଭାରତ ଯୋଡ଼ ନ୍ୟାୟ ଯାତ୍ରା ଶେଷହେବା ପରେ ଗୋଟିଏ ପଟେ ରାଉରକେଲା ଜିଲ୍ଲା କଂଗ୍ରେସ ସଭାପତିଙ୍କୁ ପଦରୁ ବାହାର କରି ନୂତନ ଜିଲ୍ଲା କଂଗ୍ରେସ ସଭାପତି ଚୟନ କରାଯାଇଛି । ଅନ୍ୟପଟେ ଜିଲ୍ଲାର ମହିଳା କଂଗ୍ରେସ ସଭାପତି ମଧ୍ୟ ଦଳରୁ ଇସ୍ତଫା ଦେଇଛନ୍ତି । ବର୍ତ୍ତମାନ ରାଉରକେଲାରେ କଂଗ୍ରେସ ଦଳର ସଠିକ ନେତୃତ୍ବ ନଥିବା ଯୋଗୁଁ ଦଳ ଛାଡିଥିବା କହିଛନ୍ତି ଜିଲ୍ଲା ମହିଳା କଂଗ୍ରେସ ସଭାପତି ନିରୂପମା ବଳିୟାରସିଂହ । ନିର୍ବାଚନ ପୂର୍ବରୁ ଦଳରେ ଏପରି ସ୍ଥିତି କର୍ମୀମାନଙ୍କୁ ନିରାଶ କରିଥିବାବେଳେ ଆଗକୁ ଏହି ପରିସ୍ଥିତି ନୂଆ ସଭାପତିଙ୍କ ପାଇଁ ଚ୍ୟାଲେଞ୍ଜିଂ ହେବ ବୋଲି କୁହାଯାଉଛି ।
ପ୍ରଥମେ ଗତକାଲି (ରବିବାର) ରାତିରେ ରାଉରକେଲା ଜିଲ୍ଲା କଂଗ୍ରେସ ସଭାପତି ରଶ୍ମି ପାଢ଼ୀଙ୍କୁ ସଭାପତି ପଦରୁ ମୁକ୍ତ କରିଥିଲେ ପିସିସି ସଭାପତି ଶରତ ପଟ୍ଟନାୟକ । ଏହାପରେ ପୂର୍ବତନ ସଭାପତି ରବି ରାୟଙ୍କୁ ପୁଣିଥରେ ଜିଲ୍ଲା ସଭାପତି ପଦ ଦିଆଯାଇଛି । ରାଉରକେଲାରେ ରାହୁଲ ଗାନ୍ଧୀଙ୍କ ଭାରତ ଯୋଡ଼ ନ୍ୟାୟ ଯାତ୍ରାରେ ବହୁ ତ୍ରୁଟି ଥିବା ସହିତ ବିଭିନ୍ନ କନ୍ଦଳ ଏବଂ ଜନ ସମର୍ଥନ ବ୍ୟବସ୍ଥା ହୋଇନଥିବାରୁ ଜିଲ୍ଲା ସଭାପତିଙ୍କୁ ପିସିସି ସଭାପତି ଗାଳି ଗୁଳଜ କରିଥିବା ଶୁଣିବାକୁ ମିଳିଥିଲା । ଏପରିକି ରାହୁଲ ଗାନ୍ଧୀଙ୍କ ଗାଡି ଉପରୁ ଜିଲ୍ଲା ସଭାପତିଙ୍କ ଉପରେ ବିରକ୍ତି ଭାବ ପ୍ରଦର୍ଶନ କରି ଓଡ଼ିଶା କଂଗ୍ରେସ ପ୍ରଭାରୀ ଅଜୟ କୁମାର ରଶ୍ମିଙ୍କୁ ଗାଡ଼ିରୁ ଓହ୍ଲାଇବାକୁ କହିଥିଲେ ବୋଲି ସୂତ୍ରରୁ ସୂଚନା ମିଳିଛି । ଏହା ହିଁ ତାଙ୍କୁ ଜିଲ୍ଲା ସଭାପତି ପଦରୁ ବାହାର କରାଯାଇଥିବା କାରଣ ହୋଇପାରେ ବୋଲି କୁହାଯାଉଛି ।
ଏହା ମଧ୍ୟ ପଢ଼ନ୍ତୁ...ନିର୍ବାଚନ ପୂର୍ବରୁ କଂଗ୍ରେସର ପ୍ରସ୍ତୁତି, 13ଟି ଜିଲ୍ଲାର ସଭାପତି ପରିବର୍ତ୍ତନ
ଅନ୍ୟପଟେ ମହିଳା କଂଗ୍ରେସ ସଭାପତି ମଧ୍ୟ ଆଜି ଏକ ସାମ୍ବାଦିକ ସମ୍ମିଳନୀ କରି ନିଜ ଇସ୍ତଫା ନେଇ ସୂଚନା ଦେଇଛନ୍ତି । ସେ ଅଭିଯୋଗ ଆଣିଛନ୍ତି ଯେ, ରାହୁଲ ଗାନ୍ଧୀଙ୍କ ଗସ୍ତକୁ ନେଇ ସମ୍ପୂର୍ଣ୍ଣ ପ୍ରଦେଶ କଂଗ୍ରେସ ରାଉରକେଲାରେ ଥିବାବେଳେ ରାଉରକେଲା ସହରର କଂଗ୍ରେସ ନେତାମାନେ ରାହୁଲଙ୍କ ଗସ୍ତକୁ ପ୍ରାଥମିକତା ନଦେଇ କେବଳ ନିଜର ଟିକେଟ ଫାଇନାଲରେ ମଜି ରହିଥିଲେ । ଏପରିକି ପ୍ରଦେଶ କଂଗ୍ରେସ କମିଟି ଏବଂ ଜିଲ୍ଲା କଂଗ୍ରେସ କମିଟିର ଅବହେଳା ଯୋଗୁଁ ଏହି ନ୍ୟାୟ ଯାତ୍ରା ବିଫଳ ହୋଇଛି ବୋଲି ସେ କହିଛନ୍ତି । ଦଳରେ ନେତୃତ୍ବର ଅଭାବ ଏବଂ ରାଜନୈତିକ ଇଚ୍ଛାଶକ୍ତିର ଅଭାବ ଦେଖିବାରୁ ସେ ଦଳ ଛାଡିବାକୁ ନିଷ୍ପତ୍ତି ନେଇଥିବା କହିଛନ୍ତି । ସେପଟେ ଏନେଇ ମିଡିଆ ସମ୍ମୁଖରେ କୌଣସି ପ୍ରତିକ୍ରିୟା ଦେଇ ନାହାନ୍ତି ଜିଲ୍ଲା ସଭାପତି ପଦରୁ ବହିଷ୍କୃତ ନେତା ରଶ୍ମି ପାଢ଼ୀ ।
ଇଟିଭି ଭାରତ, ରାଉରକେଲା
