ଡେରାଡୁନ: ସୁଶାସନ ଓ ବିକାଶର କଥା କହି ଭାରତୀୟ ଜନତା ପାର୍ଟି ନିଜର ସମସ୍ତ ପୂର୍ବ ରେକର୍ଡ ଭାଙ୍ଗି 370ରୁ ଅଧିକ ଆସନ ସହ କେନ୍ଦ୍ରରେ ତୃତୀୟ ପାଳି ଆରମ୍ଭ କରିବା ଲକ୍ଷ୍ୟରେ ନିର୍ବାଚନ ପ୍ରଚାର ଜାରି ରଖିଛି । ମୁଖ୍ୟ ବିରୋଧୀ ଦଳ କଂଗ୍ରେସ ମଧ୍ୟ ବିଭିନ୍ନ ପ୍ରସଙ୍ଗରେ ମୋଦି ସରକାରର ଦୋଷ ଦୁର୍ବଳତାକୁ ଶାଣିତ ଟାର୍ଗେଟ କରିବା ସହ ନିର୍ବାଚନ ପ୍ରଚାର ଜାରି ରଖିଛି । କଂଗ୍ରେସର ଏହି ସମାଲୋଚନା ଏଜେଣ୍ଡା ମଧ୍ୟରେ ରହିଛି ଦେଶରେ ବେରୋଜଗାରୀ ପ୍ରସଙ୍ଗ । ବିଜେପି ଦେଇଥିବା ନିଯୁକ୍ତି ସୃଷ୍ଟି ପ୍ରତିଶୃତିକୁ ପୂରଣ କରିବାରେ ବିଫଳ ହୋଇଛି ବୋଲି ଦଳ ବିଭିନ୍ନ ସମୟରେ ଟାର୍ଗେଟ କରିଆସିଛି । ଆଜି ପ୍ରିୟଙ୍କା ଗାନ୍ଧୀ କହିଛନ୍ତି, ମୋଦି ଶାସନରେ ଦେଶରେ ଯୁବପିଢିଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବା ତ ଦୂରର କଥା, ବରଂ ଆଇଆଇଟି ପରି ପ୍ରତିଷ୍ଠିତ ଶିକ୍ଷାନୁଷ୍ଠାନରୁ ଉଚ୍ଚଶିକ୍ଷା ଗ୍ରହଣ କରିଥିବା ଯୁବକ-ଯୁବତୀମାନେ ମଧ୍ୟ ନିଯୁକ୍ତି ପାଉନାହାନ୍ତି ।
ଆଜି ଉତ୍ତରାଖଣ୍ଡର ହରିଦ୍ବାରରେ ଏକ ନିର୍ବାଚନ ସଭାକୁ ସମ୍ବୋଧିତ କରି ବିଜେପି ସରକାରକୁ ଏହି ପ୍ରସଙ୍ଗରେ ଘେରିଛନ୍ତି ପ୍ରିୟଙ୍କା । କହିଛନ୍ତି, "ମୋଦି ସରକାର ଦେଶରେ ନିଯୁକ୍ତି ସୃଷ୍ଟି କରିବା ପରିବର୍ତ୍ତେ ବେକାରୀ ବଢାଇବାରେ ଲାଗିଛି । ମୋଦି ସରକାର ନୀତି ଓ ନିଷ୍ପତ୍ତି ରୋଜଗାର ସୃଷ୍ଟି କରିବା ଦିଗରେ ଅନୁକୂଳ ନୁହେଁ । ଦେଶରେ ଏବେ ଘରୋଇକରଣର ଯୁଗ ଚାଲିଛି । ବିଭିନ୍ନ ଶିଳ୍ପ ଓ ରାଷ୍ଟ୍ରାୟତ ସଂସ୍ଥାକୁ ବିଜେପି ସରକାର ସେମାନଙ୍କ ବନ୍ଧୁ ଶିଳ୍ପପତିମାନଙ୍କ ନିୟନ୍ତ୍ରଣକୁ ଟେକି ଦେବାରେ ଲାଗିଛନ୍ତି । ଦେଶରେ ସମସ୍ତ ନିଯୁକ୍ତି ସମ୍ଭାବନା ଏବେ କର୍ପୋରେଟ କ୍ଷେତ୍ର ଅଧୀନକୁ ଚାଲିଗଲାଣି । ଏପରି ସମୟରେ ଦେଶରେ ବେରୋଜଗାରୀ ବଢିବାରେ ଲାଗିଛି । ସ୍ଥିତି ଏତେ ଉତ୍କଟ ହେଲାଣି ଯେ, ଆଇଆଇଟି ଗ୍ରାଜୁଏଟ ମଧ୍ୟ ନିଯୁକ୍ତି ଖଣ୍ଡେ ପାଇ ପାରୁନାହାନ୍ତି ।"
ପୂର୍ବରୁ ମଧ୍ୟ ରାହୁଲ ଗାନ୍ଧୀଙ୍କ ସମେତ ତମାମ କଂଗ୍ରେସ ନେତା ବିଜେପିର 2014 ସାଧାରଣ ନିର୍ବାଚନରେ ସାମ୍ନାକୁ ଆସିଥିବା ବାର୍ଷିକ 2କୋଟି ନିଯୁକ୍ତି ସୁଯୋଗ ସୃଷ୍ଟି ଘୋଷଣାକୁ କ୍ରମାଗତ ସମାଲୋଚନା କରିସାରିଛନ୍ତି । ନିକଟରେ ରାହୁଲ ମଧ୍ୟ ବେରୋଜଗାରୀ ଓ ସେନାରେ ଅସ୍ଥାୟୀ ଭର୍ତ୍ତି ପାଇଁ କେନ୍ଦ୍ର ଆଣିଥିବା ‘ଅଗ୍ନିବୀର’ ଯୋଜନାକୁ ଯୁବପିଢି ବିରୋଧୀ ବୋଲି କହି ବର୍ଷିଥିଲେ । ଏହା ସହ କଂଗ୍ରେସ ମଧ୍ୟ ସାଧାରଣ ନିର୍ବାଚନ ପାଇଁ ଜାତୀୟ ଇସ୍ତାହାରରେ ନିଯୁକ୍ତିକୁ ମୁଖ୍ୟ ମୁଦ୍ଦା କରିଛି । ଦଳ ଇସ୍ତାହାରରେ ଘୋଷଣା କରିଥିବା 5-ନ୍ୟାୟ ଓ 25-ଗ୍ୟାରେଣ୍ଟି ମଧ୍ୟରେ ନିଯୁକ୍ତି ସୁଯୋଗକୁ ବଢାଯିବ ବୋଲି ଉଲ୍ଲେଖ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
