ନୂଆଦିଲ୍ଲୀ: ଆଖି ବୁଜିଲା କୁଖ୍ୟାତ ମାଫିଆ ମୁଖତାର ଅନସାରୀ । ଏକାଧିକ ଅପରାଧିକ ମାମଲାରେ ଦୋଷୀ ସାବ୍ୟସ୍ତ ହୋଇ ଉତ୍ତର ପ୍ରଦେଶର ବାନ୍ଦା ଜେଲରେ ଥିବା ମାଫିଆ ମୁଖତାର ଅନସାରୀ ହଠାତ ଅସୁସ୍ଥ ହୋଇପଡିଥିଲା । ସେ ହୃଦଘାତର ଶିକାର ହୋଇଥିବା ଜଣାପଡିବା ପରେ ତାକୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ବାନ୍ଦା ହସ୍ପିଟାଲରେ ତାର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ଜଣାପଡିଛି । କଡା ସୁରକ୍ଷା ମଧ୍ୟରେ ତାକୁ ଆଜି ଅପରାହ୍ନରେ ବୃନ୍ଦା ଜିଲ୍ଲା ସ୍ଥିତ ରାନୀ ଦୁର୍ଗାବତୀ ମେଡିକାଲ କଲେଜରେ ଭର୍ତ୍ତି କରାଯାଇଥିଲା । ପୋଲିସ ଉପସ୍ଥିତିରେ ତାକୁ ଡାକ୍ତରୀ ଟିମ ଚିକିତ୍ସା କରିଥିଲେ । ହେଲେ ସେ ପ୍ରାଣ ହରାଇଥିବା ହସ୍ପିଟାଲ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି ।
ତେବେ ତାର ସ୍ବାସ୍ଥ୍ୟଗତ ସମସ୍ୟା ଦେଖାଯାଇଥିବା ସୂଚନା ମିଳିବା ପରେ ତାର ଓକିଲ ମଧ୍ୟ ମେଡିକାଲରେ ପହଞ୍ଚିଥିଲେ । ହେଲେ ମୁଖତାରର ପରିବାର ସଦସ୍ୟ ଭିନ୍ନ ଓ ସଙ୍ଗୀନ ଅଭିଯୋଗ ଆଣିଛନ୍ତି । ତାଙ୍କୁ ଜେଲରେ ଖାଦ୍ୟରେ ବିଷ ଦିଆଯାଇଥିବା ଅଭିଯୋଗ କରିଛନ୍ତି ତାଙ୍କ ସାଂସଦ ଭାଇ ଅଫଜଲ ଅନସାରୀ । ହୃଦଘାତର ଶିକାର ହୋଇ ସେ ପ୍ରାଣ ହରାଇଥିବା ପ୍ରାଥମିକ ଭାବେ କୁହାଯାଉଥିଲେ ସୁଦ୍ଧା ଏପରି ଅଭିଯୋଗର ସତ୍ୟତା ସମ୍ପର୍କରେ ଜଣାପଡିନି ।
ଗାଜିପୁରରୁ ବହୁଜନ ସମାଜବାଦୀ ପାର୍ଟିରୁ ସାଂସଦ ଥିବା ମୁଖତାରର ଭାଇ ଆଫଜଲ ଅନସାରୀ କହିଛନ୍ତି, ମହମ୍ମଦାବାଦ ପୋଲିସ ଷ୍ଟେସନରୁ ସେ ଏହି ବାର୍ତ୍ତା ପାଇଥିଲେ । ଯେଉଁଥିରେ ତାଙ୍କୁ ମୁଖତାରଙ୍କ ସ୍ୱାସ୍ଥ୍ୟାବସ୍ଥା ଖରାପ ଥିବା ଅବଗତ କରାଯାଇଥିଲା । ସେ ବାନ୍ଦା ମେଡିକାଲ କଲେଜରେ ଭର୍ତ୍ତି ହୋଇଥିବା ଖବର ପାଇବା ପରେ ସେ ହସ୍ପିଟାଲରେ ପହଞ୍ଚିଥିଲେ । ହେଲେ ଏହା ଜଣାପଡୁଛି ଯେ, ତାଙ୍କୁ ଜେଲ ଭିତରେ ହତ୍ୟା କରିବା ପାଇଁ ଖାଦ୍ୟରେ ବିଷ ଦିଆଯାଇଛି । ପୂର୍ବରୁ ମଧ୍ୟ ଥରେ ତାଙ୍କୁ ହତ୍ୟା କରିବା ପାଇଁ ଉଦ୍ୟମ ହୋଇସାରିଥିବା ଭାଇ ଅଫଜଲ ଅଭିଯୋଗ କରିଛନ୍ତି ।
ହେଲେ ଏହି ଅଭିଯୋଗ ସମ୍ପର୍କରେ ପୋଲିସ କିମ୍ବା ଜେଲ କର୍ତ୍ତୃପକ୍ଷ କୌଣସି ପ୍ରତିକ୍ରିୟା ରଖିନାହାନ୍ତି । ଦୀର୍ଘବର୍ଷ ପଞ୍ଜାବର ଜେଲରେ ରହିବା ପରେ ନିକଟରେ ଉତ୍ତର ପ୍ରଦେଶ ସରକାର ଅନସାରୀକୁ ରାଜ୍ୟକୁ ଆଣିଥିଲେ । ନିକଟରେ ସେ ଗୋଟିଏ ପରେ ଗୋଟିଏ ମାମଲାରେ ଦୋଷୀ ସାବ୍ୟସ୍ତ ହୋଇଥିଲା । ଆଜି ତାର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
