लॉरेन्स बिष्णोई गँगमधील रोहित गोदारा कोण आहे? सलमान खानच्या घराबाहेर गोळीबार केल्यानंतर चर्चेत आलं नाव - Salman Khan house firing

अभिनेता सलमान खानच्या घराबाहेर गोळीबार करणारा एक संशयित हल्लेखोर हा गुरुग्राममधील असल्याची शक्यता दिल्ली पोलिसातील सूत्रानं व्यक्त केली. हल्लेखोर गोळीबार करत असतानाच्या सीसीटीव्हीत दोन संशयित हल्लेखोर दिसून आले आहेत. या हल्लेखोरांचे बिष्णोई गँगशी कनेक्शन समोर आलं आहे.

नवी दिल्ली- अभिनेता सलमान खान हा वांद्रे येथील गॅलक्सी अपार्टमेंटमध्ये कुटुंबासह राहतो. रविवारी पहाटे पाच वाजता त्याच्या घराबाहेर दोन अज्ञात व्यक्तींनी गोळीबार केल्यानं मोठी खळबळ उडाली. वांद्रे पोलीस अधिकाऱ्याच्या माहितीनुसार अज्ञात व्यक्तींविरोधात गुन्हा दाखल करण्यात आला.

सलमान खानच्या घराबाहेर गोळीबार प्रकरणात बिष्णोई गँगचा सहभाग असल्याचा मुंबईपाठोपाठ दिल्ली पोलिसांनाही संशय आहे. सलमान खानच्या घराबाहेर गोळीबार झाल्यानंतर काही तासातच अनमोल बिष्णोईनं सोशल मीडियावर कथित पोस्ट करत हल्ल्याची जबाबदारी स्वीकारली. हा फक्त ट्रेलर होता, अशी पोस्ट करत गँगस्टर अनमोलनं अभिनेता सलमान खानला पुन्हा हल्ला करण्याचा इशारा दिला. दिल्ली पोलिसातील सूत्राच्या माहितीनुसार दोघांपैकी एक संशयित हा गुरुग्रामधील आहे. त्याच्यावर खुनासह दरोडे टाकल्याचे विविध गुन्हे हरियाणामधील पोलीस स्टेशनमध्ये दाखल आहेत. सलमानच्या घराबाहेर गोळीबार करणारा संशयित आरोपी हा रोहित गोदाराच्या टोळीमधील आहे. रोहित गोदारा हा लॉरेन्स बिष्णोई, त्याचा भाऊ अनमोल आणि गोल्डी ब्रार यांच्या अत्यंत जवळचा आहे.

कोण आहे रोहित गोदारा? करणी सेनेचे अध्यक्ष सुखदेव सिंह गोगामेडी यांची राहत्या घरी ५ डिसेंबर २०२३ मध्ये हत्या केली होती. या हत्येची जबाबदारी रोहित गोदारानं घेतली होती. त्याचबरोबर हरियाणामधील स्क्रॅप व्यापारी सचिन गोदाच्या हत्येची जबाबदारी घतेली होती. रोहित गोदाराच्या वाढत्या गुन्हेगारीनं पोलिसांची डोकेदुखी वाढली आहे. कॅनडामध्ये राहून तो लॉरेन्सचा साथीदार गोल्डी ब्रारसाठी काम करत असल्याचा पोलिसांना संशय आहे. गोदारा हा राजस्थानमधील बिकानेरच्या कपूरीसर गावचा रहिवासी आहे. त्याच्यावर राजस्थानमध्ये खंडणीसह विविध प्रकरणात ३३ गुन्हे दाखल आहे. लॉरेन्सच्या इशाऱ्यावरून त्यानं सीकरमध्ये राजू ठेहट यांची हत्या केली होती. लॉरेन्स हा तुरुंगातून त्याचा भाऊ अनमोल आणि साथीदार रोहित यांच्याकडून टोळी चालवित असल्याचा आरोप आहे. लॉरेन्स तुरुंगात असूनही त्याची टोळी कार्यरत असल्यानं आश्चर्य व्यक्त होत आहे. पोलीस आणि एनआयएच्या टीमला या टोळीच्या गुन्हेगारी कृत्यावर पूर्णपणं अंकुश लावता आला नाही.

लॉरेन्सच्या संपर्कात आल्यानंतर गुन्ह्यांत वाढ- रोहित गोदारा हा हा लॉरेन्सच्या अत्यंत जवळचा व्यक्ती आहे. रोहित गोदाराला बिकानेरमध्ये अट्टल गुन्हेगार म्हणून जाहीर करण्यात आलं आहे. तो १३ वर्षांमध्ये किमान १५ वेळा तुरुंगात गेला आहे. तुरुंगात असताना त्याचा लॉरेन्सबरोबर संपर्क आला. लॉरेन्सचा संपर्क आणि गुन्ह्यात प्रत्येकवेळी जामिन मिळाल्यानं त्याची गुन्हेगारी वाढतच गेली. लोकांना धमकी देऊन त्यांच्याकडून खंडणी उकळल्याचे रोहित गोदारावर आरोप आहेत.

यापूर्वीही सलमान खानला मिळाली होती धमकी- गेल्या वर्षी मार्चमध्ये अभिनेता सलमान खानला धमकी देणारा ई-मेल मिळाला होता. या प्रकरणी कलाकारांचे व्यवस्थापन करणारे प्रशांत गुंजाळकर यांनी वांद्रे पोलिसात तक्रार दिली होती. मिळालेल्या धमकीची पोलिसांनी गांभीर्यानं दखल घेत लॉरेन्स बिष्णोई आणि गोल्डी ब्रार यांच्यासह एका व्यक्तीविरोधात गुन्हा नोंद केला. "लॉरेन्सनं वृत्तवाहिन्यांना दिलेली मुलाखत सलमाननं पाहावी," असं ई-मेलमध्ये म्हटलं होतं. "जर प्रकरण मिटवायचे असेल तर 'गोल्डी भाई'ला समोरासमोर बोलावं. अजूनही वेळ आहे. पुढच्या वेळेस झटका पाहायला मिळेल," असा ई-मेलमधून इशारा देण्यात आला होता. जून २०२२ मध्येदेखील सलमान खानला अज्ञात व्यक्तीकडून हस्तलिखित पत्रातून धमकी देण्यात आलं होतं.

हेही वाचा-