കോട്ടയം: കൈക്കൂലി വാങ്ങുന്നതിനിടെ കടുത്തുരുത്തി ഞീഴൂർ വില്ലേജ് ഓഫിസർ പിടിയിലായി. കടുത്തുരുത്തി അറുന്നൂറ്റിമംഗലം മങ്ങാട് കമ്പനിപ്പടി കുറുമുള്ളീല്‍ ജോർജ് ജോണാണ് (52) വിജിലൻസിന്‍റെ പിടിയിലായത്. വ്യാഴാഴ്‌ച (ഏപ്രില്‍ 4) ഉച്ചയ്‌ക്ക് 1 മണിക്കാണ് ഇയാള്‍ അറസ്റ്റിലായത്.
കാനഡയില്‍ പോകുന്നതിനായി പഞ്ചായത്തില്‍ ജനനം രജിസ്റ്റർ ചെയ്യുന്നതിന് പാലാ ആർഡിഒ ഓഫിസില്‍ യുവാവ് അപേക്ഷ നല്‍കിയിരുന്നു. ഇത് പരിശോധിച്ച്‌ റിപ്പോർട്ട് നല്‍കാൻ ആർഡിഒ ഓഫിസില്‍ നിന്ന് ഞീഴൂർ വില്ലേജ് ഓഫിസർ ജോർജ് ജോണിന് കൈമാറി. ഇതില്‍ അന്വേഷണം നടത്തി റിപ്പോർട്ട് സമർപ്പിക്കുന്നതിന് ഇയാള്‍ കൈക്കൂലി ആവശ്യപ്പെടുകയായിരുന്നു. 1300 രൂപയാണ് ഇയാള്‍ യുവാവില്‍ നിന്നും കൈപ്പറ്റിയത്.
Also Read:10,000 രൂപ കൈക്കൂലി വാങ്ങി; മലപ്പുറത്ത് വിഇഒ അറസ്റ്റില്‍
വില്ലേജ് ഓഫിസിലെ വൈദ്യുതി ചാർജ് അടക്കാനെന്ന പേരിലാണ് പരാതിക്കാരനോട് തുക ആവശ്യപ്പെട്ടത്. പണം നല്‍കിയാല്‍ മാത്രമെ റിപ്പോർട്ട് ആർ.ഡി.ഒ ഓഫിസിലേക്ക് അയക്കൂവെന്നും വില്ലേജ് ഓഫിസർ പറഞ്ഞു. ഇതോടെ യുവാവ് കോട്ടയം വിജിലൻസ് ഓഫിസിലെത്തി പരാതി നല്‍കുകയായിരുന്നു.
