പത്തനംതിട്ട: കോന്നിയില്‍ നടുറോഡില്‍ കെഎസ്ആർടിസി ബസ് നിർത്തിയിട്ട് ബസ് ജീവനക്കാരും യാത്രക്കാരും ഭക്ഷണം കഴിക്കാൻ പോയതായി പരാതി. പുനലൂർ - മൂവാറ്റുപുഴ സംസ്ഥാന പാതയില്‍ ചൊവ്വാഴ്‌ച രാത്രിയായിരുന്നു സംഭവം. കട്ടപ്പന ഡിപ്പോയിലെ ഡ്രൈവറായ അനില്‍ കുമാറിനെതിരെയാണ് പരാതി.
വൈകിട്ട് ആറ് മണിക്ക് കട്ടപ്പന ഡിപ്പോയില്‍ നിന്ന് പുറപ്പെട്ട തിരുവനന്തപുരം ബസ് കോന്നി ടൗണിലെത്തിയപ്പോള്‍ റോഡിന് നടുവില്‍ പാർക്ക് ചെയ്യുകയായിരുന്നു. തുടർന്ന് ഡ്രൈവറും കണ്ടക്‌ടറും ബസിലെ യാത്രക്കാരും സമീപത്തെ ഹോട്ടലില്‍ ഭക്ഷണം കഴിക്കാൻ കയറുകയായിരുന്നു.
നടുറോഡിലാണ് ബസ് കിടക്കുന്നതെന്ന് അവിടെ ഉണ്ടായിരുന്നവർ പറഞ്ഞെങ്കിലും തനിക്ക് വിശക്കുന്നെന്ന് പറഞ്ഞ് ഡ്രൈവർ ഹോട്ടലിലേക്ക് കയറുകയായിരുന്നു. സംഭവത്തില്‍ ഡ്രൈവർക്കെതിരെ നാട്ടുകാർ പരാതി നല്‍കി. പുനലൂർ - മൂവാറ്റുപുഴ സംസ്ഥാന പാത സ്ഥിരം അപകട മേഖലയാണെന്നും അങ്ങനെയുള്ള സ്ഥലത്താണ് ഇത്തരമൊരു അശ്രദ്ധ കാണിച്ചതെന്ന് പ്രാദേശ വാസികൾ പറയുന്നു. സംഭവത്തില്‍ കെഎസ്ആർടിസി ആഭ്യന്തര അന്വേഷണം തുടങ്ങിയതായാണ് വിവരം.
