തിരുവനന്തപുരം : കരമനയിൽ യുവാവിന്‍റെ കൊലപാതകത്തിന് കാരണമായ പ്രശ്‌നങ്ങള്‍ ഉണ്ടായത് തെരഞ്ഞെടുപ്പ് ദിവസമെന്ന് ഡിസിപി നിധിൻ രാജ് ഐപിഎസ്. കൊല്ലപ്പെട്ട അഖിലിനെ(26) പ്രതികൾ ആക്രമിച്ച സ്ഥലം സന്ദർശിച്ച ശേഷമായിരുന്നു ഡിസിപിയുടെ പ്രതികരണം.
തെരഞ്ഞെടുപ്പ് ദിവസം ഉണ്ടായ പ്രശ്‌നമാണ് കൊലപാതകത്തിന് കാരണം. പ്രതികൾ സഞ്ചരിച്ച കാർ പൊലീസ് കസ്റ്റഡിയിൽ എടുത്തു. വാടകയ്ക്ക് എടുത്ത കാറാണ് പ്രതികൾ ഉപയോഗിച്ചത്. 2019-ല്‍ നടന്ന വധക്കേസുമായി ബന്ധമുള്ളവരാണ് പ്രതികൾ.
പ്രതികളെ പൊലീസ് തിരിച്ചറിഞ്ഞിട്ടുണ്ട്. നാല് പേരാണ് കൃത്യം നടത്തിയത്. ആസൂത്രിതമായ കൊലപാതകമാണ് നടന്നത്. പ്രതികാര മനോഭാവത്തിലാണ് പ്രതികൾ കൃത്യം നടത്തിയത്.
നാലുപേരിൽ കൂടുതൽ ഉണ്ടോ എന്ന കാര്യങ്ങൾ പരിശോധിച്ച് വരികയാണ്. ഗൂഢാലോചന ഉണ്ടായിരുന്നോ എന്നതും പരിശോധിക്കും. സംഭവത്തിൽ 302 വകുപ്പ് ചുമത്തിയാണ് കേസെടുത്തിരിക്കുന്നത്. പ്രതികൾ അനന്തു വധക്കേസിൽ ജാമ്യത്തിൽ ഇറങ്ങിയവരാണെന്നും ഡിസിപി നിധിൻ രാജ് വ്യക്തമാക്കി.
