കോഴിക്കോട് : പന്തീരാങ്കാവിന് സമീപം ചിറക്കലിൽ നാഷണൽ ഹൈവേയുടെ സർവീസ് റോഡ് ഇടിഞ്ഞ് വീണതിൽ പ്രതിഷേധിച്ച് നാട്ടുകാർ. പ്രദേശവാസികള്‍ ദേശീയപാത ഉപരോധിച്ചു. അഞ്ച് വീടുകളും ക്ഷേത്രവും അങ്കണവാടിയും തകരാൻ കാരണമായതിൽ പ്രതിഷേധിച്ചാണ് നാട്ടുകാർ നാഷണൽ ഹൈവേ ഉപരോധിച്ചത്.
ജനങ്ങളുടെ ആശങ്ക പരിഹരിക്കാതെ അശാസ്ത്രീയമായ രീതിയിൽ നാഷണൽ ഹൈവേയുടെ സർവീസ് റോഡ് നിർമ്മിച്ചതാണ് റോഡ് തകരാൻ കാരണമായതെന്നാണ് നാട്ടുകാർ ആരോപിക്കുന്നത്. നിരവധി തവണ മുന്നറിയിപ്പ് നൽകിയിട്ടും അതൊന്നും ചെവിക്കൊള്ളാതെയാണ് നാഷണൽ ഹൈവേയുടെ നിർമ്മാണം നടത്തിയതെന്നും നാട്ടുകാര്‍ പറയുന്നു.
ഇക്കാര്യം ഉയർത്തി കാണിച്ചാണ് നാട്ടുകാരുടെ നേതൃത്വത്തിൽ നാഷണൽ ഹൈവേ ഉപരോധിച്ചത്. ഉപരോധം 10 മിനിറ്റ് നീണ്ടുനിന്നു. ഇതുവഴിയുള്ള വാഹന യാത്ര ഉപരോധത്തെ തുടർന്ന് തടസപ്പെട്ടു. യാത്രക്കാരുടെ ബുദ്ധിമുട്ട് കണക്കിലെടുത്ത് പ്രതിഷേധക്കാർ തന്നെ 10 മിനിറ്റിനുശേഷം ഉപരോധം അവസാനിപ്പിക്കുകയായിരുന്നു.
