തിരുവനന്തപുരം: കാട്ടാക്കടയിൽ ടിപ്പർ ലോറി ഇടിച്ച് യുവാവിന് ഗുരുതര പരിക്കേറ്റ സംഭവത്തിൽ ടിപ്പർ ഡ്രൈവറെ കാട്ടാക്കട പൊലീസ് അറസ്‌റ്റ് ചെയ്‌തു. കാട്ടാക്കട, ഗുരുമന്ദിരം റോഡിൽ അഭിലാഷ് ഭവനിൽ അഭിലാഷ് ചന്ദ്രൻ (40) നെയാണ് പൊലീസ് അറസ്‌റ്റ് ചെയ്‌തത്‌(Abhilash chandran). ഇയാൾക്കെതിരെ വധശ്രമത്തിന് കേസ് എടുത്തു. സംഭവത്തിൽ ടിപ്പർ ലോറി പൊലീസ് സ്‌റ്റേഷനിലേക്ക് മാറ്റി. മണ്ണ് മാന്തി യന്ത്രവും കസ്‌റ്റഡിയിൽ എടുക്കും എന്നാണ് വിവരം.
ഇന്നലെ ഉച്ചക്ക് കാട്ടാക്കട പൂവച്ചൽ റോഡിൽ നക്രാംചിറ മിനിനഗറിനു സമീപം മോട്ടോർ വാഹന വകുപ്പ് വാഹനം ടെസ്‌റ്റ് നടത്തുന്ന റോഡിലേക്ക് അമിത വേഗത്തിൽ വന്ന ടിപ്പർ തിരിയുമ്പോൾ നെടുമങ്ങാട്, അരശുപറമ്പ്, പനയോട് കിഴക്കുംകര വീട്ടിൽ അഖിൽ (22) ഓടിച്ച ബൈക്ക് ടിപ്പറിൽ ഇടിക്കുകയായിരുന്നു. ഇരു വാഹനങ്ങളും കാട്ടാക്കട ഭാഗത്തു നിന്ന് വരികയായിരുന്നു.
അപകടത്തിൽ ഇടതു കൈ പിൻവശത്തെ രണ്ടു ടയറിനടയിൽ കുടുങ്ങിയ അഖിലിനെ 20 മീറ്ററോളം വലിച്ചുകൊണ്ട് പോയി ആണ് ടിപ്പർ ലോറി നിന്നത്‌. അഖിൽ തിരുവനന്തപുരം മെഡിക്കൽ കോളേജിലെ ഐസിയുവിൽ കഴിയുന്നു. പൊലീസ് അറസ്‌റ്റ് ചെയ്‌ത പ്രതിയെ കാട്ടാക്കട കോടതിയിൽ ഹാജരാക്കി.
