മുംബൈ: ഇന്ത്യൻ പ്രീമിയർ ലീഗിന്‍റെ 17-ാം സീസണില്‍ റണ്‍മഴ പെയ്യുകയാണ്. പാതി മത്സരങ്ങള്‍ പൂര്‍ത്തിയായപ്പോള്‍ അഞ്ച് തവണയാണ് ടീമുകള്‍ 250 റൺസില്‍ ഏറെ സ്കോര്‍ ചെയ്‌തിട്ടുള്ളത്. ഇതില്‍ മൂന്ന് തവണയും 250 റണ്‍സിലേറെ നേടിയത് സൺറൈസേഴ്‌സ് ഹൈദർബാദാണ്.
ഐപിഎൽ ചരിത്രത്തിലെ ഏറ്റവും വലിയ ടോട്ടൽ എന്ന റെക്കോർഡ് രണ്ട് തവണ മറികടന്ന പ്രകടനവും സണ്‍റൈസേഴ്‌സ് ഹൈദരാബാദ് നടത്തി. ഇപ്പോഴിതാ അടിവാങ്ങിക്കൂട്ടേണ്ടി വരുന്ന ബോളര്‍മാരെ പിന്തുണയ്‌ക്കുന്ന നടപടി വേണമെന്ന് ബിസിസിഐയോട് ആവശ്യപ്പെട്ടിരിക്കുകയാണ് ഇന്ത്യയുടെ മുന്‍ താരം സുനില്‍ ഗവാസ്‌കര്‍.
ബൗണ്ടറിയുടെ നീളം കൂട്ടണമെന്നാണ് ഗവാസ്‌കറിന്‍റെ നിര്‍ദേശം. "ഒരു ക്രിക്കറ്റ് ബാറ്റിൽ ഞാൻ മാറ്റങ്ങളൊന്നും നിർദേശിക്കില്ല. കാരണം അതു നിയന്ത്രണങ്ങൾക്ക് വിധേയമാണ്. എല്ലാ ഗ്രൗണ്ടിലും ബൗണ്ടറിയുടെ വലുപ്പം വർധിപ്പിക്കുക. ഇതു ഞാന്‍ എപ്പോഴും പറയുന്ന കാര്യമാണ്.
പല ഗ്രൗണ്ടുകളിലും ബൗണ്ടറി ലൈനിന്‍റെ നീളം ഒന്നോ-രണ്ടോ മീറ്റര്‍ വര്‍ധിപ്പിക്കാന്‍ ആവശ്യത്തിന് സ്ഥലമുണ്ട്. ഇതുവഴി ഒരു ക്യാച്ചും സിക്‌സറും തമ്മിലുള്ള വ്യത്യാസം കൂടുതല്‍ പ്രകടമാവും. അതിനായി ആ എൽഇഡി അല്ലെങ്കിൽ പരസ്യ ബോർഡുകൾ പിന്നിലേക്ക് നീക്കി, ബൗണ്ടറി റോപ്പും ഒന്ന് - രണ്ട് മീറ്റര്‍ കൂടി നീട്ടിയാല്‍ മാത്രം മതി. അല്ലാത്തപക്ഷം ബോളർമാർ മാത്രമാണ് കഷ്‌ടപ്പെടുക"- ഗവാസ്‌കര്‍ പറഞ്ഞു.
ഐപിഎല്ലിലെ പവർ ഹിറ്റിങ്‌ ചില സമയങ്ങളിൽ ആവേശകരമാകുമെങ്കിലും, അത് ഒടുവിൽ വിരസമായേക്കുമെന്നും ഗവാസ്‌കർ മുന്നറിയിപ്പ് നല്‍കി. ഇത് ബാറ്റർമാരും ബോളർമാരും തമ്മിലുള്ള മത്സരം ഇല്ലാതാക്കുമെന്നാണ് അദ്ദേഹം ചൂണ്ടിക്കാണിക്കുന്നത്.
"കഴിഞ്ഞ കുറച്ച് ദിവസങ്ങളായി ടി20 ക്രിക്കറ്റിൽ നമ്മൾ കണ്ടുകൊണ്ടിരിക്കുന്നത്, 'ഇത് അവസാന റൗണ്ട്' എന്ന് കോച്ച് നെറ്റ്സിൽ പറയുന്നതുപോലെയുള്ള ബാറ്റിങ്ങാണ്. ഔട്ടോ-നോട്ടൗട്ടോ എന്നില്ല, എല്ലാവരും വമ്പന്‍ അടികള്‍ക്കായി ബാറ്റ് വീശുന്നു. ഇത് ഒരു പരിധിവരെ ആസ്വാദ്യകരമാണെങ്കിലും പിന്നീട് അങ്ങനെ ആവണമെന്നില്ല" ഗവാസ്‌കര്‍ പറഞ്ഞു നിര്‍ത്തി.
അതേസമയം ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്‌സ്- റോയല്‍ ചലഞ്ചേഴ്‌സ് ബെംഗളൂരു മത്സരത്തിന് പിന്നാലെയായിരുന്നു ഗവാസ്‌കര്‍ ഇക്കാര്യം പറഞ്ഞത്. ഈഡന്‍ ഗാര്‍ഡന്‍സില്‍ നടന്ന മത്സരത്തില്‍ കൊല്‍ക്കത്ത ഒരു റണ്‍സിന് വിജയിച്ചിരുന്നു. ആദ്യം ബാറ്റ് ചെയ്‌ത ആതിഥേയര്‍ നിശ്ചിത ഓവറില്‍ ആറ് വിക്കറ്റ് നഷ്‌ടത്തില്‍ 222 റണ്‍സായിരുന്നു നേടിയിരുന്നത്. ലക്ഷ്യം പിന്തുടരാനിറങ്ങിയ ബെംഗളൂരു 20 ഓവറില്‍ 221 റണ്‍സിന് പുറത്താവുകയായിരുന്നു.
