രാജ്‌കോട്ട്: ഇംഗ്ലണ്ടിനെതിരായ മൂന്നാം ടെസ്റ്റിന്‍റെ തുടക്കത്തിലേറ്റ തകര്‍ച്ചയില്‍ നിന്നും കരകയറാന്‍ ഇന്ത്യന്‍ ടീം പൊരുതുന്നു. ആദ്യ ദിവസം ഉച്ചഭക്ഷണത്തിന് പിരിയുമ്പോള്‍ 93-3 എന്ന നിലയിലാണ് ഇന്ത്യ. അര്‍ധസെഞ്ച്വറി നേടിയ ഇന്ത്യന്‍ ക്യാപ്റ്റന് രോഹിത് ശര്‍മ (74 പന്തില്‍ 52), രവീന്ദ്ര ജഡേജ (44 പന്തില്‍ 24) എന്നിവരാണ് ക്രീസില്‍.
രോഹിത് ശര്‍മ, രവീന്ദ്ര ജഡേജ സഖ്യത്തിന്‍റെ ചെറുത്ത് നില്‍പ്പാണ് ഇന്ത്യയെ മത്സരത്തിന്‍റെ തുടക്കത്തിലെ തകര്‍ച്ചയില്‍ നിന്നും കരകയറ്റിയത്. 9 ഓവറിനുള്ളില്‍ 33 റണ്‍സ് മാത്രം സ്കോര്‍ ബോര്‍ഡില്‍ ഉണ്ടായിരുന്നപ്പോഴാണ് ഇന്ത്യയ്‌ക്ക് മത്സരത്തില്‍ ആദ്യ മൂന്ന് വിക്കറ്റും നഷ്‌ടപ്പെട്ടത്. യശസ്വി ജയ്‌സ്വാള്‍ (10), ശുഭ്‌മാന്‍ ഗില്‍ (0), രജത് പടിദാര്‍ (5) എന്നിവരുടെ വിക്കറ്റുകളാണ് ഇന്ത്യയ്‌ക്ക് ആദ്യ സെഷനില്‍ നഷ്‌ടപ്പെട്ടത്.
ഇംഗ്ലീഷ് പേസര്‍ മാര്‍ക്ക് വുഡ് രണ്ട് വിക്കറ്റ് നേടി. സ്‌പിന്നര്‍ ടോം ഹാര്‍ട്‌ലിയാണ് ഒരു വിക്കറ്റ് വീഴ്‌ത്തിയത്. ഓപ്പണര്‍ യശസ്വി ജയ്‌സ്വാളിനെ മത്സരത്തിന്‍റെ നാലാം ഓവറിലാണ് ഇന്ത്യയ്‌ക്ക് നഷ്‌ടമായത്. മാര്‍ക്ക് വുഡിന്‍റെ പന്തില്‍ ജോ റൂട്ടിന് ക്യാച്ച് നല്‍കിയായിരുന്നു താരം പുറത്തായത്. പത്ത് പന്ത് നേരിട്ടായിരുന്നു ജയ്‌സ്വാള്‍ പത്ത് റണ്‍സ് നേടിയത്.
പിന്നാലെ ക്രീസിലെത്തിയ ശുഭ്‌മാന്‍ ഗില്ലിന് റണ്‍സൊന്നുമെടുക്കാന്‍ സാധിച്ചില്ല. 9 പന്ത് നേരിട്ട താരത്തെ അക്കൗണ്ട് തുറക്കും മുന്‍പ് മാര്‍ക്ക് വുഡ് തന്നെ തിരികെ പവലിയനിലെത്തിച്ചു. ബെൻ ഫോക്‌സിന് ക്യാച്ച് നല്‍കിയായിരുന്നു ഗില്ലിന്‍റെ മടക്കം.
24 റണ്‍സ് മാത്രമായിരുന്നു ആദ്യ രണ്ട് വിക്കറ്റ് പോകുമ്പോള്‍ ഇന്ത്യയുടെ സ്കോര്‍ ബോര്‍ഡില്‍ ഉണ്ടായിരുന്നത്. മത്സരത്തിന്‍റെ 9-ാം ഓവറില്‍ സ്കോര്‍ 33ല്‍ നില്‍ക്കെ രജത് പടിദാറിനെയും ഇന്ത്യയ്‌ക്ക് നഷ്‌ടമായി. 15 പന്തില്‍ 5 റണ്‍സ് നേടിയ താരത്തെ ടോം ഹാര്‍ട്‌ലിയാണ് പുറത്താക്കിയത്.
ഇന്ത്യ പ്ലേയിങ് ഇലവൻ (India Playing XI For Rajkot Test) : രോഹിത് ശർമ (ക്യാപ്റ്റന്), യശസ്വി ജയ്‌സ്വാൾ, ശുഭ്‌മാൻ ഗിൽ, രജത് പടിദാർ, സർഫറാസ് ഖാൻ, ധ്രുവ് ജുറൽ (വിക്കറ്റ് കീപ്പര്‍), രവീന്ദ്ര ജഡേജ, രവിചന്ദ്രൻ അശ്വിൻ, കുല്‍ദീപ് യാദവ്, ജസ്പ്രീത് ബുംറ, മുഹമ്മദ് സിറാജ്.
ഇംഗ്ലണ്ട് പ്ലെയിങ് ഇലവന്‍ (England playing XI for Rajkot Test): സാക്ക് ക്രോവ്‌ലി, ബെന്‍ ഡക്കറ്റ്, ഒലീ പോപ്പ്, ജോ റൂട്ട്, ജോണി ബെയര്‍സ്റ്റോ, ബെന്‍ സ്റ്റോക്‌സ് (ക്യാപ്റ്റന്), ബെന്‍ ഫോക്‌സ് (വിക്കറ്റ് കീപ്പര്‍), റെഹാന്‍ അഹമ്മദ്, ടോം ഹാര്‍ട്‌ലി, മാര്‍ക്ക് വുഡ്, ജെയിംസ്‌ ആന്‍ഡേഴ്‌സണ്‍.
Also Read : ഇന്ത്യൻ കുപ്പായത്തില്‍ സര്‍ഫറാസ് ഖാന്‍ , നിറകണ്ണുകളോടെ അച്ഛനും അമ്മയും...
