മുംബൈ : ഇന്ത്യ-ഇംഗ്ലണ്ട് (India vs England Test) ടെസ്റ്റ് പരമ്പര ആവേശകരമായി പുരോഗമിക്കുകയാണ്. അഞ്ച് മത്സര പരമ്പരയിലെ മൂന്ന് ടെസ്റ്റുകള്‍ കഴിഞ്ഞപ്പോള്‍ അതിഥേയര്‍ 2-1ന് മുന്നിലാണ്. ഹൈദരാബാദില്‍ നടന്ന ആദ്യ ടെസ്റ്റില്‍ ഇന്ത്യയെ 28 റണ്‍സിന് തോല്‍പ്പിക്കാന്‍ സന്ദര്‍ശകര്‍ക്ക് കഴിഞ്ഞിരുന്നു.
എന്നാല്‍ പിന്നീട് നടന്ന രണ്ട് ടെസ്റ്റുകളും വിജയിക്കാന്‍ ഇന്ത്യയ്‌ക്കായി. വിശാഖപട്ടണത്ത് നടന്ന രണ്ടാം ടെസ്റ്റില്‍ 106 റണ്‍സിനും രാജ്‌കോട്ടില്‍ നടന്ന മൂന്നാം ടെസ്റ്റില്‍ 434 റണ്‍സിനും വിജയം നേടിയായിരുന്നു രോഹിത് ശര്‍മയുടെ സംഘത്തിന്‍റെ തിരിച്ചടി. ഇതിന് പിന്നാലെ ടെസ്റ്റില്‍ ഇംഗ്ലണ്ടിന്‍റെ ആക്രമണോത്സുക രീതിയായ ബാസ്ബോളിന് എതിരെയും ചോദ്യങ്ങള്‍ ഉയരുന്നുണ്ട്.
ഇപ്പോഴിതാ പരമ്പരയില്‍ ഇംഗ്ലീഷ് ടീമിന്‍റെ തിരിച്ചുവരവിനെക്കുറിച്ച് സംസാരിച്ചിരിക്കുകയാണ് ഇന്ത്യയുടെ മുന്‍ ക്യാപ്റ്റനും സെലക്ഷന്‍ കമ്മിറ്റി ചെയര്‍മാനുമായിരുന്ന കൃഷ്‌ണമാചാരി ശ്രീകാന്ത് (Kris Srikkanth). ഇംഗ്ലണ്ടിന്‍റെ ബാസ്‌ബോള്‍ (Bazball) വിലപ്പോയില്ലെന്നും പരമ്പരയില്‍ സന്ദര്‍ശകര്‍ക്ക് ഇനിയൊരു തിരിച്ചുവരവില്ലെന്നുമാണ് കൃഷ്‌ണമാചാരി ശ്രീകാന്ത് പറഞ്ഞുവയ്‌ക്കുന്നത്.
"സാധ്യമെങ്കിൽ, അടുത്ത വിമാനം പിടിച്ച് അവര്‍ നാട്ടിലേക്ക് തിരികെ പോകുന്നതാണ് നല്ലത്. പക്ഷെ, ശേഷിക്കുന്ന രണ്ട് ടെസ്റ്റുകൾ കളിക്കേണ്ടതുണ്ട്. ബാസ്‌ബോളും പിന്നെ അവര്‍ പറഞ്ഞ മറ്റ് കാര്യങ്ങളും ഇവിടെ നടപ്പായിട്ടില്ല. എവിടെയാണ് ബാസ്‌ബോള്‍ പ്രവര്‍ത്തിച്ചത്. ആഷസിൽ പ്രവർത്തിച്ചോ?.
സത്യസന്ധമായി പറയുകയാണെങ്കില്‍ അവര്‍ ഇതുപോലെ കളിക്കുന്നത് തുടർന്നാൽ ഒരു സ്‌ട്രാറ്റജിയും നടപ്പിലാകാന്‍ പോകുന്നില്ല എന്നാണ് എനിക്ക് തോന്നുന്നത്. ഈ ബാസ്ബോളിനെക്കുറിച്ച് വളരെയധികം ഹൈപ്പ് ഉണ്ടായിരുന്നു. തങ്ങളുടെ വാദങ്ങളെ പിന്തുണയ്‌ക്കുന്നതിനായി ഈ സാഹചര്യങ്ങളിൽ ബാറ്റുചെയ്യാനുള്ള വൈദഗ്‌ധ്യം അവർക്ക് ആവശ്യമാണെന്നാണ് ഞാൻ കരുതുന്നത്. കൂടാതെ സാഹചര്യത്തിന് അനുസരിച്ച് പന്തെറിയുകയും വേണം"- കൃഷ്‌ണമാചാരി ശ്രീകാന്ത് പറഞ്ഞു.
ഇംഗ്ലണ്ടിന്‍റെ ബാസ്ബോൾ സമീപനത്തിന് അധികം ആയുസ് ഉണ്ടെന്ന് കരുതുന്നില്ലെന്നും കൃഷ്‌ണമാചാരി ശ്രീകാന്ത് കൂട്ടിച്ചേര്‍ത്തു. "ബാസ്ബോളിന് ഏറെക്കാലം ആയുസില്ലെന്നാണ് എനിക്ക് തോന്നുന്നത്. ക്രീസിലെത്തിയ ശേഷം നേരിടുന്ന ഓരോ പന്തും അടിച്ചകറ്റാനാണ് അവര്‍ ശ്രമിക്കുന്നത്.
ബ്രണ്ടൻ മക്കല്ലത്തിന് അങ്ങനെ ബാറ്റ് ചെയ്യാൻ കഴിയുമെന്ന് ഞാൻ കരുതുന്നു, ബെൻ സ്റ്റോക്സിനും അങ്ങനെ ബാറ്റ് ചെയ്യാൻ കഴിയും. എന്നാല്‍ എല്ലാവർക്കും ആ രീതിയില്‍ ബാറ്റ് ചെയ്യാന്‍ കഴിയില്ല. സാഹചര്യത്തിന് അനുസരിച്ച് കളിക്കുന്നതാവും നല്ലത്" - അദ്ദേഹം പറഞ്ഞുനിര്‍ത്തി. അതേസമയം പരമ്പരയില്‍ ബാക്കിയുള്ള രണ്ട് മത്സരങ്ങള്‍ ഫെബ്രുവരി 23-ന് റാഞ്ചിയിലും മാര്‍ച്ച് ഏഴിന് ധര്‍മ്മശാലയിലുമായാണ് ആരംഭിക്കുന്നത്.
