ETV Bharat / sports

'യശസ്വി ജയ്‌സ്വാള്‍ ബാസ്‌ബോള്‍ പഠിച്ചത് നിങ്ങളില്‍ നിന്നല്ല' ; ബെൻ ഡക്കറ്റിനെ 'പൊരിച്ച്' നാസര്‍ ഹുസൈൻ

author img

By ETV Bharat Kerala Team

Published : Feb 20, 2024, 11:38 AM IST

Yashasvi Jaiswal  Nasser Hussain Against Ben Duckett  Ben Duckett On Bazball  ഇന്ത്യ ഇംഗ്ലണ്ട് ടെസ്റ്റ് പരമ്പര  യശസ്വി ജയ്‌സ്വാള്‍
Nasser Hussain against Ben Duckett

യശസ്വി ജയ്‌സ്വാള്‍ ഉള്‍പ്പടെയുള്ള താരങ്ങള്‍ ടെസ്റ്റില്‍ അതിവേഗം റണ്‍സ് കണ്ടെത്തുന്നതിനുള്ള ക്രെഡിറ്റ് ഇംഗ്ലണ്ടിനാണെന്ന് ബെൻ ഡക്കറ്റ് അഭിപ്രായപ്പെട്ടിരുന്നു. ഇതിനെതിരെയാണ് വിമര്‍ശനവുമായി മുൻ താരം നാസര്‍ ഹുസൈൻ രംഗത്തെത്തിയത്.

മുംബൈ : ഇംഗ്ലണ്ടിനെതിരായ മൂന്നാം ടെസ്റ്റില്‍ (India vs England 3rd Test) ഇന്ത്യ 434 റണ്‍സിന്‍റെ വമ്പൻ ജയം സ്വന്തമാക്കുന്നതില്‍ നിര്‍ണായക പങ്കുവഹിച്ച പ്രകടനമായിരുന്നു ഓപ്പണര്‍ യശസ്വി ജയ്‌സ്വാള്‍ (Yashasvi Jaiswal) നടത്തിയത്. ഏകദിന ശൈലിയില്‍ ബാറ്റ് വീശിയ താരം മത്സരത്തിന്‍റെ രണ്ടാം ഇന്നിങ്‌സില്‍ 236 പന്ത് നേരിട്ട് പുറത്താകാതെ 214 റണ്‍സാണ് അടിച്ചെടുത്തത്. മത്സരത്തിന്‍റെ നാലാം ദിനത്തിലായിരുന്നു ഇന്ത്യ ജയം സ്വന്തമാക്കിയത്.

അതിന് മുന്‍പായി രാജ്‌കോട്ട് ടെസ്റ്റിന്‍റെ മൂന്നാം ദിനത്തില്‍ യശസ്വി ജയ്‌സ്വാള്‍ ഉള്‍പ്പടെയുള്ള യുവതാരങ്ങള്‍ ബാസ്‌ബോള്‍ ശൈലിയില്‍ റണ്‍സ് കണ്ടെത്തുന്നത് സന്തോഷം നല്‍കുന്ന കാര്യമാണെന്ന് ഇംഗ്ലീഷ് ഓപ്പണര്‍ ബെൻ ഡക്കറ്റ് (Ben Duckett) അഭിപ്രായപ്പെട്ടിരുന്നു. ലോക ക്രിക്കറ്റിലെ മറ്റ് ടീമുകളും ബാസ്ബോള്‍ ശൈലി പിന്തുടരുന്നതിന്‍റെ ക്രെഡിറ്റ് മുഴുവനും ഇംഗ്ലണ്ടിന് അര്‍ഹതപ്പെട്ടതാണെന്നും ഡക്കറ്റ് പറഞ്ഞിരുന്നു. എന്നാല്‍, ഈ പരാമര്‍ശത്തില്‍ ഡക്കറ്റിനെതിരെ വിമര്‍ശനവുമായി രംഗത്തെത്തിയിരിക്കുകയാണ് ഇംഗ്ലണ്ടിന്‍റെ മുൻ താരം നാസര്‍ ഹുസൈൻ (Nasser Hussain).

ഇന്ത്യയുടെ യുവതാരം യശസ്വി ജയ്‌സ്വാളിനെ ബാസ്‌ബോള്‍ പഠിപ്പിച്ചത് നമ്മള്‍ ആണെന്നാണോ പറയുന്നത്. എന്നാല്‍, ആ കാര്യത്തെ കുറിച്ചാണ് എനിക്ക് സംസാരിക്കാനുള്ളത്. ഈ ശൈലിയില്‍ ബാറ്റ് ചെയ്യാൻ അവൻ പഠിച്ചത് നിങ്ങളില്‍ നിന്നുമല്ലെന്ന് വ്യക്തമാണ്.

ഒരുപാട് കഷ്‌ടപ്പാടുകള്‍ തരണം ചെയ്‌ത് എത്തിയ താരമാണ് ജയ്‌സ്വാള്‍. ആ കഷ്‌ടപ്പാടും ബുദ്ധിമുട്ടും ഐപിഎല്‍ ക്രിക്കറ്റുമെല്ലാമാണ് അവനെ ഇന്ന് കാണുന്ന വ്യക്തിയാക്കി മാറ്റിയത്. അവനില്‍ നിന്നും കാര്യങ്ങള്‍ കണ്ട് പഠിക്കാനാണ് നമ്മള്‍ ശ്രമിക്കേണ്ടത്.

ഇതുപോലുള്ള കാര്യങ്ങള്‍ പറയുന്നതിന് മുന്‍പ് ഒന്ന് ആത്മപരിശോധന നടത്തുന്നത് നല്ലതായിരിക്കും. അതുകൊണ്ട് തന്നെ ജയ്‌സ്വാള്‍ നല്‍കുന്ന പാഠങ്ങള്‍ മനസിലാക്കാനാണ് നിങ്ങള്‍ ശ്രമിക്കേണ്ടത്. അങ്ങനെയല്ലെങ്കില്‍ വിമര്‍ശനങ്ങള്‍ക്കും അതീതമായ ഒന്നായി ബാസ്‌ബോള്‍ മാറിയേക്കാം. ബാസ്‌ബോള്‍ ശൈലി ഇനിയും കൂടുതല്‍ മെച്ചപ്പെടുത്തലുകള്‍ വേണ്ട ഒന്ന് കൂടിയാണെന്നും ഓര്‍മിപ്പിക്കുന്നു'- നാസര്‍ ഹുസൈൻ അഭിപ്രായപ്പട്ടു (Nasser Hussain On Yashasvi Jaiswal).

Also Read : 'ബാറ്റിങ് മാത്രം പോര, ഇതും ചെയ്യണം' ; യശസ്വിയ്‌ക്ക് മുന്നില്‍ വമ്പന്‍ നിര്‍ദേശം വച്ച് കുംബ്ലെ

അതേസമയം, രാജ്‌കോട്ട് ടെസ്റ്റിലെ കൂറ്റൻ ജയത്തോടെ ഇംഗ്ലണ്ടിനെതിരായ അഞ്ച് മത്സരങ്ങളുടെ പരമ്പരയില്‍ 2-1ന് മുന്നിലെത്താൻ ഇന്ത്യയ്‌ക്കായി. ഫെബ്രുവരി 23നാണ് പരമ്പരയിലെ നാലാം മത്സരം ആരംഭിക്കുന്നത് (India vs England 4th Test). ധര്‍മശാലയിലാണ് മത്സരം നടക്കുന്നത്.

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.