वर्धा - हिंगणघाट तालुक्यातील अल्लिपुर पोलीस ठाणेअंतर्गत दारू विक्री प्रकरणात एकाला अटक करण्यात आली. न्यायालयात हजर केले असता त्याला जमानत न मिळाल्याने न्यायालयीन कोठडीत पाठवण्यात आले. मात्र कोठडीत अचानक प्रकृती बिघडल्याने उपचारादरम्यान त्याचा मृत्यू झाला. शंकर खुशाल चिंचोने (वय 27) असे मृतकाचे नाव आहे.
अल्लीपुर पोलिसांनी दारू विक्री प्रकरणात शंकर चिंचोनेला अटक केली होती. त्यानंतर त्याला हिंगणघाट न्यायालयात हजर करण्यात आले. मात्र यावेळी त्याची जमानत घेण्यास कोणीच पुढे आले नाही. त्यामुळे शंकरची वर्धा येथील कारागृहात रवानगी करण्यात आली. मंगळवारी दुपारी अचानक प्रकृती बिघडल्याने जिल्हा सामान्य रुग्णालयात त्याची रवानगी करण्यात आली. यानंतरही प्रकृती बिघडत असल्याने सेवाग्राम रुग्णालयात उपचार करण्यात आले. पण अखेर बुधवारी त्याचा मृत्यू झाला.
शंकर चिंचोने याचा मृतदेह नागपूर येथे श्वविच्छेदनासाठी पाठवण्यात आला आहे. नेमके प्रकृती बिघडण्याचे कारण अद्याप कळू शकले नाही. मृत्यूनंतर तपासणी अहवालातुन मृत्यूचे कारण स्पष्ट होईल. यातुन पुढील कारवाईला होईल असे प्रशासनाकडून सांगण्यात येत आहे.