ठाणे - अंधश्रद्धेतून काकाचा खून करणाऱ्या अमित नागरे याच्यासह 5 आरोपींना शिळ डायघर पोलिसांनी अटक केली आहे. पुतण्या अमित नागरे, निहाल हांडोरे, अविनाश वानखेडे, शुभम ढबाले, अमर शर्मा अशी अटकेत असलेल्या आरोपींची नावे असल्याची माहिती उपायुक्त सुभाष बुरसे यांनी दिली. अमितने त्याच्या काकाचे शीर 10 किलोमीटर लांब असलेल्या दिवा क्षेपणभूमीत फेकले असल्याचे पोलिसांनी सांगितले आहे.
हेही वाचा - रायगडमध्ये तिहेरी तलाकचा गुन्हा दाखल
शिळ डायघर येथील पिंपरी गाव परिसरात 15 नोव्हेंबरला एका डोंगराजवळ शीर नसलेले धड पोलिसांना सापडले होते. त्यामुळे संपूर्ण शहरात खळबळ उडाली होती. हा मृतदेह कोणाचा याचा तपास पोलिसांकडून सुरू होता. याच दरम्यान, विष्णु नागरे नावाचे व्यक्ती हरवल्याची तक्रार शिळ डायघर पोलीस ठाण्यात दाखल केली होती. पोलिसांनी विष्णु यांच्या नातेवाईकांना बोलावून मृतदेह दाखविला. त्यावेळी विष्णू यांचाच हा मृतदेह असल्याचे नातेवाईकांनी सांगितल्यानंतर याप्रकरणी गुन्हा दाखल करून चौकशीस सुरुवात केली.
दरम्यान पोलिसांनी विष्णु यांचा पुतण्या अमित नागरे याची चौकशी सुरू केली असता, त्याच्याकडून समाधानकारक उत्तरे पोलिसांना मिळत नव्हती. पोलिसांनी त्याची सखोल चौकशी करून ताब्यात घेतल्यानंतर त्याने खुनाच्या गुन्ह्याची कबूली दिली. त्यानंतर पोलिसांनी तांत्रिक तपास करून त्याच्या इतर चार साथिदारांनाही अटक केल्याची माहिती पोलीस उपायुक्त सुभाष बुरसे यांनी दिली .
अमित याच्या वडिलांचा 2016 मध्ये आजारपणात मृत्यू झाला होता. मात्र, वडिलांवर मृत विष्णु नागरे यांनी करणी केल्याचा संशय अमितच्या मनात होता. एक दिवस विष्णु यांचा खून करण्याचा विचार त्याच्या मनामध्ये आल्यानंतर त्याने याची माहिती त्याच्या इतर चार साथिदारांना दिली. या पाच जणांनी विष्णु यांना डोंगर पायथ्याजवळ मद्यपार्टी करण्यासाठी बोलावले. तिथे गेल्यावर त्यांच्यावर कोयता आणि तलवारीने वार करण्यात आले. त्यानंतर कोयत्याने अत्यंत निर्घुणपणे त्यांचे शिर धडावेगळे केले. यानंतर अमित आणि अविनाशने दुचाकीवरून हे शीर बॅगेत भरून 10 किलोमीटर लांब असलेल्या दिवा क्षेपणभूमीत फेकून दिले. अशी माहिती पोलीस उपायुक्त सुभाष बुरसे यांनी दिली.
हेही वाचा - अवैधरित्या वाहतूक करणाऱ्या २ टिप्परवर कारवाई; वाहन मालकांना ठोठावला लाखोंचा दंड