सोलापूर - मोठ्या भावाच्या लग्नाची पत्रिका वाटून दुचाकीवरून परतणाऱ्या नातू आणि आजोबा यांना पिकअप गाडीने समोरासमोर धडक दिल्याने भीषण अपघात घडला आहे. या अपघातात नातू आणि आजोबा या दोघांचा जागीच मृत्यू झाला. ही घटना रविवारी सांयकाळच्या सुमारास कुर्डू गावाच्या हद्दीत घडली. अभिजीत रमेश मोरे (वय 22 रा. कन्हेरगाव ता. माढा), महादेव नामदेव डांगे (वय 70 रा. पिंपळनेर ता. माढा), असे मृत नातू आणि आजोबाचे नाव आहे.
हेही वाचा - कार - टँकरचा भीषण अपघात, 5 जण जागीच ठार
अभिजीत मोरे हा माढा तालुक्यातील बारलोणी येथील नातेवाईकांना आपल्या भावाच्या लग्नाची पत्रिका वाटून कन्हेरगावकडे परतत होता. यावेळी कुर्डू गावाच्या हद्दीत समोरून भरधाव येणाऱ्या पिकअपने दुचाकीला समोरासमोर धडक दिली. यात दुचाकीवरील आजोबासह नातवाला जोरदार मार लागला. यामध्ये ते दोघेही ठार झाले.
हेही वाचा - पंढरपुरात विठ्ठल रुक्मिणीचा विवाह सोहळा संपन्न
कन्हेरगाव येथील रमेश मोरे यांचा मुलगा किशोरचा 14 फेब्रुवारीला विवाह असल्याने घरात लग्नाची तयारी सुरू होती. कुटुंबीयाचा भार कमी करण्यासाठी किशोरचा भाऊ अभिजीतने नातेवाईकांना पत्रिका वाटण्याचे काम हाती घेतले होते. त्यानुसार अभिजीत त्याच्या आईचे वडील महादेव डांगे यांना आपल्यासोबत घेऊन गेला होता.
हेही वाचा - पंढरपुरात विठ्ठल रुक्मिणीचा विवाह सोहळा संपन्न
बारलोणी येथील नातेवाईकांना पत्रिका वाटून माघारी परतत असताना अभिजीतच्या दुचाकीला समोरून भरधाव आलेल्या पिकअपने (एम.एच 24 ए.बी. 6325) अभिजितच्या दुचाकीला (एम.एच. 45 डब्ल्यु 9943) जोराची धडक दिली. यात दुचाकीवरील अभिजीत आणि आजोबाचा जागीच मृत्यू झाला. अपघात झाल्यानंतर पिकअप चालकाने घटनास्थळावरून पळ काढला. या घटनेने संपूर्ण गावावर शोककळा पसरली आहे.
