रायगड - नवजात बालकापासून ते पाच वर्षे वयापर्यंत बालकांच्या जीवाला धोका होऊ नये, यासाठी राष्ट्रीय आरोग्य अभियानामार्फत लसीकरण कार्यक्रम देशभरात राबविला जात असतो. यासाठी प्रत्येक राज्याला, जिल्ह्याला लसीकरण लक्ष्य पूर्ण करण्याच्या सूचना केंद्राकडून दिलेल्या असतात. रायगड जिल्ह्यात कोरोना महामारी काळ सुरू असतानाही बालकांना देण्यात येणाऱ्या लसीकरण अभियान हे उत्तमपणे सुरू आहे. आतापर्यंत जिल्ह्यात 75 टक्के लसीकरण हे पूर्ण झाले असल्याचा अहवाल जिल्हा आरोग्य विभागाकडून देण्यात आला आहे. आरोग्य प्रशासनाकडे लसीचा मुबलक साठा उपलब्ध असल्याचेही आरोग्य विभागाकडून सांगण्यात आले आहे. कोरोना महामारी सुरू असताना एकही मुलगा लसीपासून वंचित राहिलेला नाही.
दिल्या जातात 'या' लसी
शून्य ते पाच वर्षीय बालकांना तसेच दहा वर्षे, सोळा वर्ष मुलांना कोणत्याही आजाराने धोका निर्माण होऊ नये, यासाठी प्रतिबंधात्मक लस दिली जाते. यामध्ये बीसीजी, हिपॅटायटीस-बी, ओपीव्ही 3, रोटा व्हायरस लस, गोवर, व्हिटॅमिन ए, पेंटा 3, डीपीटी, टीडी, मसल्स पहिला, दुसरा डोस, प्रतिबंधात्मक इंफॅट्स, विटा 1, टीडीटी ह्या लसी दिल्या जातात. ग्रामीण भागासह शहरातील बालके आणि मुलांना या लसी वयोमानानुसार दिल्या जातात.
कोरोनाकाळातही लसीकरण मोहीम जोरात
2020-21 या वर्षाचे लसीकरण उद्दिष्ट पूर्ण करण्यासाठी जिल्हा आरोग्य यंत्रणेकडून प्रयत्न सुरू आहेत. आतापर्यंत 75 टक्के उद्दिष्ट आरोग्य यंत्रणेने पूर्ण केले आहे. कोरोना महामारी मार्च महिन्यापासून सुरू झाल्यानंतर आरोग्य यंत्रणा या आजारावर मात करण्यासाठी झटत आहे. असे असले तरी राष्ट्रीय आरोग्य अभियान अंतर्गत सुरू असलेल्या लसीकरण अभियानात जिल्ह्यात आरोग्य यंत्रणा कमी पडलेली नाही. जिल्ह्यातील कोणतेही बालक आणि मूल कोरोनाकाळात लसीकरणपासून वंचित राहिलेली नाहीत. कोरोनाबाधित क्षेत्रातील बालकांना आणि मुलांना जवळच्या आरोग्य केंद्रात बोलावून त्याचे लसीकरण केले असल्याची माहिती लसीकरण विभागाचया परिचारिका विजया भोसले पाटील यांनी दिली आहे.
जिल्ह्यात 75 टक्के लसीकरण पूर्ण
राष्ट्रीय आरोग्य अभियान अंतर्गत जिल्ह्यात सुरू असलेल्या लसीकरण अभियानात जिल्ह्यामध्ये आतापर्यंत 75 टक्के लसीकरण पूर्ण झाले आहे. यामध्ये बीसीजी (74 टक्के), पेंटा 3, (80 टक्क, ओपीवी 3, (79 टक्के), विटा 1, (69 टक्के), मसल्स पहिला डोस (87 टक्के), फुल्ली प्रोटेक्ट इंफॅट्स ( 79 टक्के), डीपीटी बी (89 टक्के), ओपीवी बी (89 टक्के), मसल्स दुसरा डॉस (85 टक्के), डीपीटी 5 वर्ष बालक (77 टक्के), टीडी 10 वर्ष मुले (28 टक्के), टिटीडी 16 वर्ष मुले (27 टक्के), लसीकरण पूर्ण झाले आहे.
लसीचा आणि औषधांचा साठा मुबलक
केंद्र शासनाच्या मार्गदर्शनाखाली आरोग्य यंत्रणेकडून लसीकरण मोहीम जोरदार सुरू आहे. कोरोना काळातही कोणीही बालक आणि मुले ही लसीपासून वंचित राहिलेली नाहीत. जिल्ह्यात लसीकरण मोहीम अंतर्गत लागणाऱ्या लसीचा आणि औषधांचा मुबलक साठी उपलब्ध आहे. तसेच इतर आजाराबाबतही औषध साठा मुबलक असल्याची माहिती जिल्हा सामान्य रुग्णालयाचे निवासी वैद्यकीय अधिकारी डॉ गजानन गुंजकर यांनी दिली आहे.
आरोग्य सेविका, सेवकांना रोज ऑनलाइन लसीकरण प्रशिक्षण
शिक्षणजिल्हा प्रशिक्षण केंद्राकडून कोरोनाकाळात ऑनलाइन लसीकरण बाबत प्रशिक्षण दिले जात आहे. कशा पद्धतीने लहान बालक आणि मुलांना लस द्यायची याचे प्रशिक्षण आरोग्य सेविका आणि सेविकांना अधिकारी आणि डॉक्टरांकडून दिले जात आहे. त्यामुळे लसीकरण मोहिमेचे उद्दिष्ट पूर्ण करण्यास मदत होत आहे.
