पुण्यात कोयता गँगचा पुन्हा उच्छाद, दोन वेगवेगळ्या घटनांमध्ये तिघे गंभीर जखमी

पुणे - गुन्हा करण्यासाठी गुन्हेगारांकडून सर्रासपणे कोयत्याचा वापर होताना दिसून येत आहे. रविवारी (12 मे) झालेल्या दोन वेगवेगळ्या घटनांमध्ये आरोपींनी तिघांवर कोयत्याने वार केले. या घटनेत एका महिलेसह तिघे गंभीर जखमी झाले आहेत. पुण्यातील हडपसर आणि दत्तवाडी पोलीस स्टेशनच्या हद्दीत या घटना घडल्या. गुन्हेगारी कारवायांमध्ये कोयत्यांचा होणारा सर्रास वापर पाहून पोलिसांनी काही महिन्यांपूर्वी पुण्यातील जुना बाजार परिसरातून शंभरहून अधिक कोयते जप्त केले होते. परंतु काल झालेल्या घटनांमध्ये कोयत्यांचा वापर झाल्याने पोलिसांची कारवाई थंडावली की काय? असा प्रश्न उपस्थित झाला आहे.

हडपसर येथील मांजरी परिसरात पूर्ववैमनस्यातून एका मासे विक्री करणाऱ्या दाम्पत्यावर दहा ते अकरा जणांच्या टोळक्याने भर रस्त्यात कोयत्याने सपासप वार केले. रविवारी रात्री नऊ वाजण्याच्या सुमारास ही घटना घडली. याप्रकरणी रेणुका दिलीप ढिले यांनी फिर्याद दिली आहे. या घटनेत त्यांचे पती दिलीप ढिले गंभीर जखमी झाले आहे. हडपसर पोलीस स्टेशनमध्ये या प्रकरणी अकरा जणांविरोधात गुन्हा दाखल करण्यात आला आहे.

दुसरी घटना दत्तवाडी पोलीस स्टेशनच्या हद्दीतील वसंत बागुल उद्यानाजवळ घडली. एका महिन्यापूर्वी तळजाई पठारावर झालेल्या भांडणाचा राग मनात धरून फिर्यादी धनंजय उर्फ सुरज अडागळे (वय 18) आणि त्याच्या दोन मित्रांना 9 ते 10 जणांच्या टोळक्याने कोयत्याने मारहाण केली. यात सूरज गायकवाड या तरुणाच्या पाठीवर आणि गालावर कोयत्याने वार करण्यात आले असून तो गंभीर जखमी आहे. दत्तवाडी पोलीस स्टेशनमध्ये या प्रकरणी गुन्हा दाखल करण्यात आला आहे.

या दोन गुन्ह्यात कोयत्याचा झालेला खुलेआम वापर पाहता गुन्हेगारांना कायद्याची भीती राहिली नसल्याची दिसून येते. यापूर्वी जानेवारी महिन्यात झालेल्या गुन्हेगारी घटनांमध्ये कोयत्यांचा वापर वाढला होता. त्यानंतर पोलिसांनी पुण्यातील जुना बाजार परिसरातील कोयते विक्रेत्यांवर धडक कारवाई करत 232 कोयते, सततुर जप्त केले होते. यात पाच जणांवर आर्म ऍक्टनुसार गुन्हे दाखल केले होते.