पुणे - जम्मू काश्मीरमधून कलम 370 रद्द करण्यात आले आहे. भारतीयांमध्ये विचारांची, संस्कृतीची देवाण-घेवाण करण्याची मानसिकता आहे. त्यामुळेच जम्मू-काश्मीरमध्ये गणेश उत्सव साजरा केला जावा, यासाठी पुण्यातील पुणे-काश्मीर सांस्कृतिक मंच प्रयत्न करत आहे.
आता काश्मीरमध्ये घुमणार 'गणपती बाप्पा मोरया'! पुणे-काश्मीर सांस्कृतिक मंच कडून प्रयत्न
महाराष्ट्राची खास ओळख असलेला गणेशोत्सव यावर्षी दोन सप्टेंबरपासून सुरू होत आहे. या विघ्नहर्त्याच्या आशीर्वादाने काश्मीरमध्ये सुख-शांती वाढावी. तेथील विकासाची गती वाढावी म्हणून महाराष्ट्राचा हा गणेशोत्सव काश्मीरमध्ये देखील साजरा व्हावा,अशी सांस्कृतिक मंचाची इच्छा आहे. काश्मीरमध्ये गणेशोत्सव साजरा करता यावा यासाठी महाराष्ट्राचे मुख्यमंत्री, शिवसेना पक्ष प्रमुख उद्धव ठाकरे यांची मदत घेतली जाणार आहे. पंतप्रधान कार्यालय, गृहमंत्रालय आणि स्थानिक प्रशासनाकडून रीतसर परवानगी घेण्यासाठी प्रयत्न सुरू आहेत, असे श्याम देशपांडे यांनी सांगितले.
गणेशोत्सव करण्याची परवानगी मिळाल्यास महाराष्ट्राचे मुख्यमंत्री, शिवसेनेचे पक्षप्रमुख व काश्मीरचे राज्यपाल यांच्या हस्ते या उत्सवाची सुरुवात करण्याचे सांस्कृतिक मंच नियोजन आहे. संस्कृतीत मंचासोबत 'पनून काश्मीर' संस्थेचे राहुल कौल हे देखील काश्मीरमध्ये गणेशोत्सव व्हावा यासाठी प्रयत्न करत आहेत.
