Hotel Vaishali Dispute : माझी मुलगी मला परत द्या हो! 4 वर्षांच्या मुलीला घेऊन पती दोन महिन्यांपासून बेपत्ता

पुणे : गेल्या काही महिन्यांपासून पुण्यातील सुप्रसिद्ध हॉटेल वैशालीचा सुरू असलेला वाद हा दिवसेंदिवस वाढतच आहे. आता हॉटेल वैशालीच्या मालक असलेल्या निकिता शेट्टी यांनी आपल्या पतीविरोधात आरोप केले आहेत. चार वर्षांच्या मुलीला घेऊन पती मागील दोन महिन्यापासून बेपत्ता आहे. या मुलीला शोधून मला द्यावे आणि पतीला अटक करण्यात यावी, अशी मागणी निकिता शेट्टी यांनी केली आहे.

काय म्हणाल्या निकिता शेट्टी - या प्रकरणात गुन्हा दाखल असूनही पोलीस कारवाई करण्यास टाळाटाळ करत आहेत, असे देखील त्यांनी सांगितले. दोन महिन्यांपासून मी माझ्या मुलीचा चेहरा पाहिला नाही. तिची आणि माझी भेट घडून आणावी अशी विनवणी यावेळी निकिता शेट्टी यांनी पुणे पोलिसांकडे केली आहे. पुण्यातील फर्ग्युसन रस्त्यावरील प्रसिद्ध हॉटेल वैशालीचा वाद अजूनही संपताना दिसत नाही. हॉटेल वैशालीची पाॉवर ऑफ अटर्नी बंदुकीचा धाक दाखवून आपल्या पतीनेच नावावर करून घेतल्याचा आरोप हॉटेलच्या मालकीण असलेल्या निकिता शेट्टी यांनी केला होता. त्यानंतर पुण्यातील शिवाजीनगर पोलीस ठाण्यात याप्रकरणी कौटुंबिक छळाचा गुन्हाही दाखल करण्यात आला आहे.

यांच्याविरुद्ध गुन्हा दाखल : विश्वजीत विनायकराव जाधव, अभिजीत विनायकराव जाधव, विनायकराव जाधव आणि वैशाली गायकवाड-जाधव यांच्या विरोधात शिवाजीनगर पोलीस ठाण्यात गुन्हा दाखल आहे. या प्रकरणात आता नवीन ट्विस्ट निर्माण झाले आहे. आता हॉटेल वैशालीची मालक असलेल्या निकिता शेट्टी यांनी मला माझी मुलगी परत द्यावी, तसेच फरार असलेल्या पतीला शोधून पकडण्यात यावे अशी मागणी त्यांनी केली आहे.

काय म्हणाले डिसीपी - याबाबत डीसीपी संदीप गिल म्हणाले की, फिर्यादी यांनी तक्रार दाखल केल्यावर गुन्हा दाखल करण्यात आला आहे. जे आरोपी आहे त्यांचा शोध सुरू आहे. मुलगी गुन्हा दाखल होण्याच्या आधीपासून आरोपी बरोबर राहत आहे. याचा शोध सुरू असल्याचे यावेळी त्यांनी सांगितले. पुण्यात यापूर्वीही लहान मुलींचे अपहरण झाले आहे. पण, आता निकिता शेट्टी प्रकरणी पोलीस काय भूमिका घेते, याकडे नागरिकांचे लक्ष लागले आहे.

हेही वाचा: