बारामती : दि.२३ मार्च २०२१ रोजी रोजी दुपारी तीनच्या सुमारास पिडीत अल्पवयीन एक मुलगी किराणा मालाच्या दुकानात मेहंदीची पुडी आणण्यासाठी गेली होती. त्यावेळी आरोपी प्रकाश अडागळे याने त्या पीडित मुलीला गोड बोलून स्वतःच्या घरी नेले आणि तेथे तिच्यावर लैंगिक अत्याचार केला. या संबंधिची तक्रार पिडीतेच्या आईने यवत पोलीस स्टेशनमध्ये दाखल केली होती. या प्रकरणाचा तपास पोलीस उपनिरिक्षक एस.ए.नागरगोजे यांनी केला आणि आरोपीच्या विरुध्द बाल लैंगिक अत्याचार प्रतिबंधक कायद्या अंतर्गत गुन्हा दाखल केला.
आरोपी हा न्यायालयीन बंदी होता. या खटल्यामध्ये सरकार पक्षातर्फे विशेष सरकारी वकील सुनिल वसेकर यांनी सरकार पक्षातर्फे ९ साक्षीदार तपासले. यामध्ये फिर्यादी व पिडीतेची आई यांनी न्यायालयात साक्ष दिली. पिडीत मुलगी ही ६ वर्षाची अल्पवयीन आहे. तीने तीच्या सोबत घटलेली संपुर्ण घटना न्यायालयात सविस्तर सांगितली. यावेळी डॉक्टरांचीही साक्ष घेण्यात आली. ही साक्ष खटल्यात महत्वपुर्ण ठरली.
या प्रकरणातील साक्ष व न्याय वैदयकीय पुरावा व इतर साक्षीदारांच्या साक्षी महत्वाच्या ठरल्या, विशेष सरकारी वकील वसेकर यांनी या खटल्याचे कामकाजात केलेला युक्तिवाद ग्राह्य धरत न्यायालयाने आरोपी प्रकाश अडागळे यांस बाल लैंगिक अत्याचार प्रतिबंधक कायदा कलम ६ प्रमाणे २० वर्षे शिक्षा व १० हजार रुपये दंड व दंड न भरल्यास दोन महिने साध्या कारावासाची शिक्षा सुनावली.
तसेच भा.द.वि. कलम ५०६ प्रमाणे तीन महिने व एक हजार रूपये दंड व दंड न भरल्यास दहा दिवस साधा कारावास अशी शिक्षा सुनावली.पिडीतेस मनोधैर्य योजनेअंतर्गत तीस दिवसामध्ये नुकसान भरपाई देण्याचा जिल्हा विधी सेवा प्राधिकरण यांना आदेश केला आहे. या खटल्यामध्ये सरकार पक्षाला यवतचे पोलिस उपनिरीक्षक एस.ए. नागरगोजे यांच्या मार्गदर्शनाखाली कोर्ट अमलदार संतोष ढोपरे व न्यायालयीन कोर्ट पैरवी नामदेव नलवडे व सरकारी वकील कार्यालयाचे लिपिक वर्षा सुतार यांनी सहकार्य केले.
