नाशिक - भाऊबीजेसाठी मालेगाव येथे बहिणीकडे जाणाऱ्या भावाची हत्या झाल्याची घटना घडली. अज्ञात मारेकऱ्यांनी गळा आवळून आत्महत्या दाखवण्याचा बनाव केल्याचे शवविच्छेदनानंतर समोर आले आहे. याप्रकरणी नाशकातील अंबड पोलीस ठाण्यात अज्ञात व्यक्तीविरोधात हत्येचा गुन्हा दाखल करण्यात आला आहे.
रमेश वानखेडे असे मृत व्यक्तीचे नाव आहे. तो अंबड परिसरातील आशीर्वाद नगर भागातील रहिवासी आहे. तो भाऊबीजेला जाण्यासाठी निघाला होता. त्याचा भाऊ अमृत देखील बहिणीकडे जाणार होता. त्यासाठी अमृतने त्याला फोन केला. मात्र, त्याने फोन उचलला नाही. त्यानंतर बहिणीने फोन करून सांगितले की, रमेशला जिल्हा शासकीय रुग्णालयात दाखल करण्यात आले आहे. अमृत रुग्णालयात पोहोचतपर्यंत रमेशचा मृत्यू झाला होता.
जिल्हा रुग्णालयातील कर्मचाऱ्यांना विचारले असता ४ ते ५ अज्ञात व्यक्तींनी रमेशला रुग्णालयात दाखल केल्याचे सांगितले. यावेळी रमेशच्या पाठीवर जखमा होत्या. तसेच दोरीने गळा आवळ्याच्या व्रण होते. त्याच्या शर्टवर रक्ताचे डाग देखील दिसून आले. त्यानंतर त्याचे शवविच्छेदनात करण्यात आले. त्यामध्ये देखील रमेशची हत्या झाल्याचे निष्पन्न झाले.
याप्रकरणी अंबड पोलीस ठाण्यात खुनाचा गुन्हा दाखल करण्यात आला आहे. जिल्हा शासकीय रुग्णालयातील सीसीटीव्ही यंत्रणा बंद असल्याने रमेशला रुग्णालयात दाखल कोणी केले? हे तपासण्यासाठी पोलिसांना अडचणी निर्माण झाल्या आहेत. पुढील तपास अंबड पोलीस करत आहेत.
