नांदेड - भारतीय पोलीस दलातील (IPS) अधिकारी सोमय मुंडे यांनी काही दिवसांपूर्वी गडचिरोली जिल्ह्यातील मरदीन टोला परिसरात तब्बल नऊ तास नक्षल्यांशी झुंज दिली. यावेळी नक्षली नेता मिलिंद तेलतुंबडेसह 26 जणांना कंठस्नान घालण्यात आले. ही कारवाई करणारे सोमय विनायक मुंडे हे नांदेड जिल्ह्यातील देगलूर येथील मूळ रहिवासी आहेत.
आयआयटीमध्ये झाले शिक्षण -
31 वर्षीय सोमय विनायक मुंडे यांनी आयआयटी पवईमधून एमटेक (M.tech.) पूर्ण केले. सोमय यांचे प्राथमिक शिक्षण हे देगलूर येथील साधना हायस्कूलमध्ये झाले आहे. तर माध्यमिक शिक्षण-सातारा सैनिकी शाळा आणि ८ वी ते १० वी हे माध्यमिक शिक्षण राष्ट्रीय मिलिटरी कॉलेज, देहराडून येथे झाले आहे. त्यानंतर सोमय यांनी 11वी आणि 12वीचे शिक्षण हैदराबाद येथे पूर्ण केले. सोमेय यांनी 2016 केंद्रीय लोकसेवा आयोगाची परीक्षा उत्तीर्ण होत भारतीय पोलीस दलात रुजू झाले.
पहिली पोस्टींग होती औरंगाबादमध्ये -
सोमय मुंडे यांची पहिली पोस्टींग ही औरंगाबाद जिल्ह्यातील वैजापूर येथे झाली होती. त्यानंतर ते अतिरीक्त पोलीस अधिक्षक (ASP) अमरावती जिल्ह्यातील अंजनगाव सुरजी येथे रुजू झाले. सद्या ते गडचिरोली जिल्ह्यातील आहेरी येथे अतिरीक्त पोलीस अधीक्षक म्हणून कार्यरत आहेत.
आतापर्यंतच्या कार्यकाळात धाडसी कामे -
सोमय मुंडे यांनी आतापर्यंतच्या कार्यकाळात अनेक धाडसी कार्यवाही केल्या आहेत. ज्यात मार्च 2021 छत्तीसगड परिसरातील अबुजमाळ येथे नक्षली परिसरात जाऊन त्यांचा अड्डा उद्धवस्त करणे, जून 2021 रोजी गडचिरोली येथील अटापल्ली येथे 13 नक्षलींना कंठस्नास घालणे, अशा अनेक कारवायांचा समावेश आहे.
कुटुंबियांनी दिली प्रतिक्रिया -
आयपीएस अधिकारी सोमय मुंडे हे देगलूर येथील डॉक्टर दांपत्य डॉ. मुक्ता विनायक मुंडे व डॉ.विनायक चंद्रसेन मुंडे यांचे चिरंजीव आहेत. वडील विनायक मुंडे मूळचे बीड जिल्ह्यातील अंबाजोगाई येथील असून गेल्या 40 वर्षांपासून देगलूर येथे स्थायिक आहेत. डॉ. विनायक मुंडे हे जनरल सर्जन तर आई डॉ. मुक्ता या स्त्रीरोग तज्ञ आहेत. सोमय यांनी केलेल्या धाडसी कारवाईनंतर आई-वडील आणि कुटुंबियांनी मुलाचा अभिमान असल्याची प्रतिक्रिया दिली.
हेही वाचा - परमबीर सिंह यांना फरार घोषित करा; मुंबई पोलिसांच्या अर्जावर आज निर्णय
