नागपूर - महापालिकेच्या धावत्या कचरा गाडीतून गोवंशीय प्राण्यांचे अवशेष रस्त्यावर पडल्याची धक्कादायक घटना उघडकीस आली आहे. कपिलनगर भागातील कळमना उड्डाणपुलानजीक ही घटना घडली. यावर आंतरराष्ट्रीय विश्व हिंदू परिषदेने महापालिकेच्या कचरा उचलणाऱ्या कर्मचाऱ्यांवर गौ तस्करांशी हातमिळवणी केल्याचा आरोप केला आहे. सोमवारी संध्याकाळी घडलेल्या या घटनेची दृश्ये पाहून अनेक जण हादरुन गेले होते.
महापालिकेची कचरा गाडी कामगारनगरातून कचरा उचलून भांडेवाडी डम्पिंग यार्डच्या दिशेने जायला निघाली. दरम्यान कचरा गाडीतून एकानंतर एक गायीचे कापलेले शीर आणि शरीराच्या इतर भागाचे अवयव पडले. सुमारे १०० मीटर अंतरापर्यंत हे अवशेष रस्त्यावर विखुरल्या गेले. तिथून येणाऱ्या-जाणाऱ्या वाहन चालकांनी या संदर्भात कचरा गाडी चालवणाऱ्या चालकाला जाब विचारला. मात्र, कचरा गाडीच्या चालकाने हा संपूर्ण कचरा त्याने कामगारनगर भागातून उचलला असून त्यापलीकडे कोणतीही माहिती नसल्याचे उत्तर दिले. काहींनी महापालिकेच्या अधिकाऱ्यांना याबाबतची सूचना दिली. घटनेचे गांभीर्य ओळखून महापालिकेच्या अधिकाऱ्यांनी घटनेची तक्रार जरीपटका पोलीस स्टेशनमध्ये दिली.
पोलिसांनी प्राथमिक तपास करत (रस्त्यावर पडलेले तुकडे गायचेच असल्याची खात्री झाल्यानंतर) या प्रकरणी अज्ञात आरोपी विरोधात गौ वंशीय प्राणी हत्या प्रतिबंधक कायद्यांतर्गत गुन्हा नोंदविला आहे. तसेच आरोपींचा शोध सुरु केला आहे. दरम्यान या प्रकरणावरून राजकारणही सुरु झाले आहे. प्रवीण तोगडिया प्रणित आंतरराष्ट्रीय विश्व हिंदू परिषदेने या संपूर्ण प्रकरणाच्या चौकशीची मागणी केली आहे. पोलिसांवर गौ हत्येच्या प्रकरणांकडे दुर्लक्ष केल्याचा आरोप परिषदेने केला आहे. या प्रकरणी महापालिकेसाठी कचरा उचलणाऱ्या खाजगी कंपनी कनक रिसोर्सेसच्या काही कर्मचाऱ्यांकडे बोट दाखवले. तसेच गौ रक्षकांनी त्यांच्यावर गौ तस्करांसोबत संगनमत करत कत्तल केलेल्या गोवंशीय प्राण्यांचे अवशेष नष्ट करण्याचा आरोप केला आहे.
