Sanjay Raut On Devendra Fadanvis : 'मिस्टर फडणवीस हिम्मत असेल तर...', संजय राऊतांचं ओपन चॅलेंज

मुंबई Sanjay Raut On Devendra Fadanvis : येरवडा कारागृहात शिक्षा भोगत असलेला आणि उपचाराच्या नावाखाली ससून रुग्णालयातून पळून गेलेला कुख्यात अमली पदार्थ तस्कर ललित पाटील याला अमली पदार्थ निर्मिती आणि तस्करीच्या गंभीर आरोपाखाली मुंबई पोलिसांनी चेन्नई येथून अटक केली आहे. यानंतर राज्याचे उपमुख्यमंत्री तसंच गृहमंत्री देवेंद्र फडणवीस यांनी माध्यमांशी संवाद साधला. ते म्हणाले की,'आता ललित पाटील पकडला गेला आहे. यातून आता अनेकांचे संबंध समोर येणार आहेत. अनेकांची तोंडे बंद होणार आहेत.' दरम्यान, यावरुन आता ठाकरे गटाचे खासदार संजय राऊत यांनी फडणवीसांवर जोरदार टोलेबाजी केली आहे.

नेमकं काय म्हणाले संजय राऊत : संजय राऊत यांनी आपल्या निवासस्थानी माध्यमांशी संवाद साधला. यावेळी बोलत असतांना ते म्हणाले की, सोलापूर, नाशिक, मुंबई, पुणे या ठिकाणी आत्तापर्यंत 700 ते 800 कोटी रुपयांचं ड्रग्ज जप्त करण्यात आलंय. यावर राज्याच्या गृहमंत्र्यांनी बोलावं. ललित पाटील हा एक मोहरा आहे. त्याच्या नावाचा गैरवापर राज्याचे उपमुख्यमंत्री गृहमंत्री राजकरणासाठी करताय. शुक्रवारी ड्रग्जच्या विरोधात शिवसेनेचा (ठाकरे गट) नाशिकमध्ये मोर्चा आहे. या मोर्चात विविध सामाजिक संघटना, शाळांचे शिक्षक, विद्यार्थी आणि नागरिक सहभागी होणार आहेत. महाराष्ट्रात येणारे ड्रग्ज हे गुजरातमधून येतोय. हे देवेंद्र फडणवीस यांना माहित आहे का? असा खोचक सवाल राऊतांनी केला.

उपमुख्यमंत्री आहात तर त्यासारखं वागा : पुढं ते म्हणाले की, जे ड्रग्ज पकडलं गेलं नाही. ते महाराष्ट्रात पाठवून महाराष्ट्राला उडता पंजाब करून नशेच्या आहारी टाकण्याचं काम केलं जातंय. हे फडणवीसांना माहीत नसेल तर त्यांनी खुशाल याचं राजकारण करत राहावं. महाराष्ट्राला खड्ड्यात जाताना पहावं. माझी हात जोडून त्यांना विनंती आहे की, तुम्ही उपमुख्यमंत्री आहात तर त्यासारखं वागा आणि बोला. तसंच नाना पटोले यांनी दोन कॅबिनेट मंत्र्यांची नावं सांगितली होती. या दोन मंत्र्यांचे राजीनामे घ्यावे. त्यावर चौकशी नेमावी. मिस्टर फडणवीस ज्यांच्यावर आरोप आहेत हिम्मत असेल तर त्यांना अटक करून दाखवा, असं ओपन चॅलेंज राऊतांनी फडणवीसांना केलं.

देवेंद्र फडणवीसांचं डोकं ठिकाणावर आहे का? : भाजपनं 2024 ची बॉर्डर लाईन लक्षात ठेवावी. 2024 ला तुम्ही आहात आणि आम्ही आहोत. या विषयावर एक आरोपी म्हणतो की, मला पळवलं आहे. मग मंत्र्यांच्या आदेशानं त्याची तिकडं पूर्ण व्यवस्था झाली. हे तो माफिया सांगत आहे. गृहमंत्री म्हणून देवेंद्र फडणवीसांचं डोकं ठिकाणावर आहे का? की त्यांना नैराश्याने ग्रासलंय?, असा टोलाही राऊतांनी लगावला.

तुम्ही एका महिलेला घाबरताय : बुधवारी रश्मी ठाकरे यांनी ठाण्यातील टेंभी नाक्याच्या आनंद दिघे यांच्या मानाच्या देवीचे दर्शन घेतले. यावेळी रश्मी ठाकरे आल्यानंतर मंडळातील पंखे एसी आणि स्पीकर बंद केल्याचा आरोप स्थानिक शिवसैनिकांनी केला आहे. यावर बोलताना राऊत म्हणाले, ही सगळी भीती आणि पोटदुखी आहे. जळफळाट आहे. देवाच्या दारात तुम्ही असं कृत्य करता. तुम्ही स्वतःला हिंदुत्ववादी समजता मग रश्मी ठाकरे तेथे आल्यावर तुम्ही पंखे बंद करता? देव पाहतो आहे. तुम्ही स्वतःला हिंदुत्ववादी म्हणता म्हणून सांगतोय, तुम्ही एका महिलेला घाबरत आहात.

हेही वाचा -