मुंबई : मागच्यावर्षी माजी मुख्यमंत्री उद्धव ठाकरे यांच्या घरासमोर जबरदस्तीने हनुमान चालीसा म्हणणारच असा शड्डू ठोकल्यामुळे कायदा सुव्यवस्थेचा प्रश्न निर्माण झाला होता. त्या प्रकरणात मुंबई पोलिसांनी राणा दाम्पत्यावर गुन्हे नोंदवण्यात आले आहेत. मात्र 'या गुन्ह्यातून त्यांना दोषमुक्त करावे' असा अर्ज त्यांनी केलेला आहे. आज या संदर्भात दोष मुक्ततेबाबत न्यायालयात सुनावणी झाली. मात्र न्यायालयाने खासदार नवनीत राणा सोबत नसल्याने आमदार आणि पती रवी राणा यांना सवाल केला. त्यावर रवी राणा यांनी खासदार लोक सेवक असल्याने त्यांना अत्यावश्यक कामासाठी गैरहजर राहण्याची सूट मिळावी, असा अर्ज सादर केल्याचे सांगितले. न्यायालयाने तो अर्ज मान्य करत सुनावणी 14 जुलै रोजी नक्की केली जाईल असे म्हटले.
थोडक्यात टळली अटक : हनुमान चालिसा प्रकरणात राणा दाम्पत्यापैकी रवी राणाची न्यायालयात हजेरी होती. अगदी वेळेत ते हजर झाले. अटक वॉरंट टाळण्यासाठी त्यांनी ही हजेरी लावली होती. दरम्यान सुनावणी सुरू होताच न्यायाधीशांनी त्यांना खासदार नवनीत राणाविषयी प्रश्न केला. नवनीत राणा कुठे आहेत? त्यावर पती रवी राणा यांनी उत्तर दिले. त्या लोकसेवक आहेत. जनतेच्या अत्यावश्यक कामासाठी त्या गैरहजर आहेत. त्यांना त्याबाबत सूट मिळावी, असा विनंती अर्ज दाखल केला असल्याचे त्यांनी न्यायालयात सांगितले. न्यायालयाने तुमच्यावरील आरोपांना दोषमुक्तता मिळण्यासाठी तुमचे अर्ज आहेत, तेव्हा दोन्ही व्यक्ती हजर राहणे जरुरी असल्याचे म्हणत पुढील सुनावणी 14 जुलै रोजी निश्चित केली आहे. परिणामी आज रवी राणा हजर झाल्याने न्यायालयाने त्यांच्या हजेरीची नोंद घेतली. त्यामुळे त्यांची आजची अटक टळली.
आधी पती गैरहजर आता पत्नी : मागील 15 दिवसांपूर्वी सुनावणीस पत्नी नवनीत राणा हजर होत्या. आता पत्नी गैरहजर होती. दरम्यान उशिरा आल्यामुळे नवनीत राणा यांना न्यायालयाने अक्षरशः सुनावले. 'ही काय कोर्टात यायची वेळ आहे का?' असे म्हणत "पुढच्या वेळेला वेळेत हजर व्हा " असे म्हणत न्यायालयाने त्यांना खडसावले. तसेच दुसरे आरोपी रवी राणा नाहीत का? असा प्रश्न देखील न्यायालयाने केला होता. याची जाणीव ठेवत आज मात्र वेळेत आमदार रवी राणा हजर राहिले.
काय आहे प्रकरण : माजी मुख्यमंत्री उद्धव ठाकरे यांच्या घरासमोर सक्तीने हनुमान चालीसा म्हटल्याप्रकरणी कायदा सुव्यवस्थेचा भंग केला गेला होता. त्यात नवनीत राणा या आरोपी आहेत. सातत्याने कोर्टात राणा दाम्पत्य सुनावणीसाठी हजर न राहिल्यामुळे न्यायालयाने मागील सुनावणीच्या वेळेस म्हटलेले आहे की, 19 जून रोजी व्यक्तिशः जर राणा दाम्पत्य कोर्टात हजर राहिले नाहीत तर त्यांच्या नावे वॉरंट काढावे लागेल. त्यामुळे आज ते कोर्टात हजर राहिले. त्यांच्या वकिलांनी रिझवान मर्चंट यांनी नवनीत राणा यांचा गैर हजर राहण्यासाठी अर्ज दाखल केला. त्यामुळे खासदार नवनीत राणा यांचे देखील वारंट टळले.
दाखल एफआयआर चुकीची : राणा दाम्पत्याने सत्र न्यायालयामध्ये अर्जदेखील केलेला आहे की त्यांना या आरोपामधून दोषमुक्ती मिळावी. त्यांच्यावर दाखल केलेले गुन्हे हे चुकीचे आहेत, असे त्यांचे म्हणणे आहे. पोलिसांनी त्यांच्यावर चुकीचा एफआयआर दाखल केलेला आहे. त्यामुळे हा गुन्हा रद्द करा, असे देखील त्यांचे म्हणणे होते. मात्र पोलिसांनी नवनीत राणा यांचा दावा हा मागच्या वेळीच प्रतिज्ञापत्रा आधारे फेटाळून लावला होता. उपलब्ध पुरावे आणि दस्तावेज पाहता राणा दाम्पत्याचा दावा पोलिसांनी फेटाळून लावला होता. त्यामुळे न्यायालयाने उलटपक्षी राणा दाम्पत्यानाच तुम्ही हजर राहत नाही. तसेच विसंगत विधाने करतात असे न्यायालयाने फटकारले होते. कोर्टाने फटकारल्यानंतर उपस्थित राहण्याची राणा दांपत्याने लेखी हमी दिली आहे. म्हणून दोघाना सक्तीने न्यायालयात हजर राहणे अपरिहार्य आहे.
हेही वाचा
