मुंबई : आंब्यांचा हंगाम सुरू झाला आहे. आंबा हे सर्वांच्या आवडीचे फळ आहे. लालबाग परळ परिसरातून मोठ्या प्रमाणावर कोकणात जाण्यासाठी खासगी बसेस सुटतात. या खासगी बसेसमधूनच त्या विक्रेत्यांच्या आंब्याच्या पेट्या कोकणातून मुंबईत येतात. सिंधुदुर्ग जिल्ह्यातील देवगड तालुक्यातील आंब्यांना मोठ्या प्रमाणावर मागणी आहे. तसेच या आंब्यांना पसंती देखील आहे. लालबागमधील मोरे यांच्या आंब्याच्या दुकानातून दररोज 40 ते 50 पेट्या विक्री होत असल्याची माहिती विजय यांनी दिली. फळाच्या आकाराप्रमाणे रत्नागिरी हापूस आंबा सहाशे, सातशे, आठशे तर देवगडचा हापूस आंबा सातशे, आठशे, नऊशे, एक हजार प्रति डझन अशा दराने विक्रीसाठी आहे.
हापूस आंबा मुंबईत आयात : 22 जूनपर्यंत लालबागच्या गणेश टॉकीज येथे आंबे उपलब्ध असतात, अशी माहिती आंबे विक्रेता अबू सालम यांनी ईटीव्ही भारतशी बोलताना दिली. कोकणपट्ट्यातून अनेक ट्रॅव्हल्सच्या खासगी बसेस रत्नागिरी आणि देवगड हापूस आंबा मुंबईत आयात करतात. कोकणातील अनेक हापूस आंब्याचे बागायतदार मुंबईत आंबा पाठवतात. मग त्यांची मुंबईत विक्री केली जाते. पाच डझन हापूस आंब्याची पेटी तीन ते साडेतीन हजार रुपयांना उपलब्ध आहे.
हापूस आंब्याची ऑनलाईन विक्री : पुण्याप्रमाणे मुंबईत देखील ईएमआयवर हापूस आंब्याची पेटी उपलब्ध करून दिली जाणार का? या प्रश्नावर उत्तर देताना आंबा विक्रेता विजय यांनी सांगितले की, इएमआयची सोय ऑनलाईन देखील आहे. सध्या ऑनलाइन देखील हापूस आंब्याची विक्री केली जात आहे. मात्र, लालबागमध्ये आंबा खरेदी करण्यासाठी डोंबिवली ठाणे विरार येथून येणाऱ्या ग्राहकांनी रोख पैसे देऊन आंबे खरेदी करण्यास पसंती दिली आहे. कोकणचा राजा असलेल्या हापूस आंब्याला गिरण गावात मोठी मागणी आहे. तेथे कोकणी माणूस मोठ्या प्रमाणावर राहतो. हापूस आंब्याच्या नावाखाली अनेकदा आपण ग्राहकांची फसवणूक झाल्याचे देखील ऐकतो. यंदा अवकाळी पावसाचा आंब्याला फटका बसला आहे.
हेही वाचा : Hapus Mangoes : हापूस आंब्याच्या नावाखाली ग्राहकांची फसवणूक; 'असा' ओळखा ओरिजनल हापूस
