Maharashtra Politics: अजित पवारांचे प्रदेशाध्यक्ष पदासाठी दबाव तंत्र ? देवगिरी निवासस्थानी राष्ट्रवादीच्या नेत्यांची दोन तासांपासून बैठक

अजित पवार यांनी पक्षातील संघटनात्मक जबाबदारीसाठी आता जोरदार लॉबिंग सुरू केली आहे. त्यांच्या देवगिरीतील बंगल्यात समर्थक नेत्यांसह राष्ट्रवादीतील मातब्बर नेते बैठकीत सहभागी झाले आहेत. त्यामुळे राष्ट्रवादीत प्रदेशाध्यक्षपदाबाबत काय निर्णय होतो, हे पाहणे महत्त्वाचे ठरणार आहे.

मुंबई: राष्ट्रवादी काँग्रेस पक्षाच्या वर्धापन दिनाच्या कार्यक्रमादरम्यान विरोधी पक्ष नेते अजित पवार यांनी पक्ष संघटनेची जबाबदारी माझ्यावर द्यावी विरोधी पक्ष पदावरून मला मुक्त करावे, असे आवाहन करून अप्रत्यक्षपणे प्रदेशाध्यक्ष पदाची मागणी केली. त्यादृष्टीने आज हालचालींना वेग आला असून अजित पवारांच्या निवासस्थानी बैठकीसाठी आमदार आणि नेते यांची बैठक सुरू आहे.

छोटेखानी कार्यक्रम? राष्ट्रवादीतील आमदार मुंबईतील देवगिरी बंगल्यावर दाखल झाले आहेत. राष्ट्रवादीतील काही आमदार आणि जिल्हाध्यक्ष यांनी अजित पवारांची भेट घेतली आहे. राष्ट्रवादी प्रदेशाध्यक्षपदाबाबत अजूनही निर्णय न झाल्याने ही बैठक घेतल्याची माहिती समोर येत आहे. अजित पवार यांनी राष्ट्रवादीच्या वर्धापनदिनी प्रदेशाध्यक्ष पदाबाबत सूतोवाच करून देखील अद्याप निर्णय नाही. देवगिरी शासकीय बंगल्यावर छोटेखानी खासगी कार्यक्रमाचे आयोजन देखील करण्यात आले असल्याचे समजते.



मुख्यमंत्री पदाचे दावेदार असू शकतात - अजित पवार यांच्या निवासस्थानी आतापर्यंत राष्ट्रवादी काँग्रेस पार्टीच्या कार्याध्यक्ष सुप्रिया सुळे, प्रफुल्ल पटेल, हसन मुश्रीफ, दिलीप वळसे पाटील, अमोल कोल्हे, धनंजय मुंडे, धनंजय मुंडे,आमदार किरण लहामाटे, दौलत दरोडा,आदिती तटकरे अतुल बेनके, रामराजे निंबाळकर पोहोचले आहेत. मात्र प्रदेशाध्यक्ष जयंत पाटील या बैठकीला नसल्याचे समोर येत आहे.
राष्ट्रवादी काँग्रेस प्रदेशाध्यक्ष पद अजित पवारांना बहाल केले तर, 2024 च्या निवडणुकीमध्ये राष्ट्रवादी काँग्रेस पक्षाला यश मिळू शकते, असा त्यांच्या समर्थकांचा दावा आहे. त्यानंतर यशाचे श्रेय सगळे अजित पवारांना जाईल. नकळतच ते मुख्यमंत्री पदाचे दावेदार असतील. त्यामुळे पक्षाचे प्रदेशाध्यक्ष पद खूप महत्त्वाचे आहे. त्यामुळे पदावर अजित पवार यांचा डोळा असल्याचे बोलले जात आहे.

प्रदेशाध्यक्ष पदासाठी रस्सीखेच- येत्या काळामध्ये राज्यातील विधानसभा लोकसभा आणि महापालिकांच्या निवडणुका होणार आहे. त्या अनुषंगाने तिकीट वाटप वाटपाबाबतचा निर्णय हा सर्वस्वी प्रदेशाध्यक्षांच्या हाती असतो. त्यामुळे प्रदेशाध्यक्ष पद खूप महत्त्वाचे आहे. ते पद मिळवण्यासाठी पक्षात रस्सीखेच पाहायला मिळत आहे. माजी मंत्री छगन भुजबळ यांनीदेखील प्रदेशाध्यक्षपद मिळावी, अशी जाहीर अपेक्षा व्यक्त केली आहे. जयंत पाटील हे सध्या प्रदेशाध्यक्ष पदावर विराजमान आहेत. अजित पवार आणि त्यांच्यात सध्या सख्य नसल्याचे बोलले जात आहे. त्यामुळे तिकीट वाटप संदर्भातील अधिकार आपल्याकडे यासाठी अजित पवार यांची धडपड सुरू असल्याचे देखील बोलले जात आहे. राष्ट्रवादी काँग्रेसचे अध्यक्ष शरद पवार यांनी नगर येथील आपला नियोजित दौरा रद्द केला आहे.

प्रदेशाध्यक्ष पदावर अजित पवारांची वर्णी लागेल? पक्षाची संघटनात्मक जबाबदारी अजित पवार यांच्याकडे देणार का, याबाबत विचारले असता यापूर्वी राष्ट्रवादीचे अध्यक्ष शरद पवार यांनी भूमिका स्पष्ट केली होती. पक्षातील निर्णय मी एकटाच घेत नसतो, असे पवार म्हणाले होते. राष्ट्रवादीचे प्रदेशाध्यक्ष जयंत पाटील हे त्यांची भेट घेण्यासाठी पुण्याकडे निघाल्याची माहिती समोर येत आहे. विरोधी पक्ष नेते अजित पवार यांनी अशा प्रकारची बैठकीच आयोजन करून एक प्रकारे पक्षावर दबाव तंत्र आणण्याचे काम केले का? पक्षाच्या प्रदेशाध्यक्ष पदावर अजित पवारांची वर्णी लागेल का? हे पाहणे महत्वाचे ठरणार आहे.

अजित पवारांना विरोधी पक्षनेते पद नको : घटनात्मक पदापेक्षा पक्ष विस्ताराचे काम करण्याची इच्छा असल्याची भूमिका अजित पवार यांनी पक्षाकडे मांडली आहे. अजित पवार यांच्या या भूमिकेला पक्षातील अनेक आमदारांनी अप्रत्यक्ष पाठिंबा दिल्याने पक्षाचे राष्ट्रीय अध्यक्ष शरद पवार व राष्ट्रीय कार्याध्यक्ष सुप्रिया सुळे यांच्यावर दडपण आले. राज्य विधिमंडळाचे पावसाळी अधिवेशन येत्या 17 जुलैपासून होणार आहे, त्यापूर्वी अजित पवारांच्या मागणीबाबत निर्णय होण्याची दाट शक्यता आहे.

हेही वाचा-

1. Maharashtra Politics : शरद पवारांच्या गुगलीवर कोण झाले बोल्ड? संजय राऊतांनी थेटच सांगितले....