मुंबई: 17 वा मुंबई आंतरराष्ट्रीय चित्रपट महोत्सवाचा आजचा उद्घाटनाचा कार्यक्रम वरळी येथिल नेहरू केंद्रातल्या सभागृहात मान्यवरांच्या उपस्थितीत संध्याकाळी पाच वाजता होणार आहे. उद्घाटनाच्या मुख्य कार्यक्रमानंतर महोत्सवाच्या ओपनिंग फिल्म्स म्हणून तीन चित्रपट रसिकांना दाखवले जाणार आहेत. आयोजकांनी शुभारंभाच्या चित्रपटांसाठी तीन विविध प्रकारच्या चित्रपटांची निवड केली आहे. यात 'कास्ट अवे' हा फ्रान्सचा अँनिमेशनपट, जपानचा, 'शाबु शाबु स्पिरिट' हा लघुपट आणि भारतातला मणिपुरी माहितीपट 'मीरम- द फायरलाईन' दाखवले जाणार आहेत.
हा महोत्सव माहितीपट, लघुपट आणि अँनिमेशनपटाना समर्पित असतो, त्यामुळे शुभारंभाच्या चित्रपटांसाठी प्रत्येक प्रकारातून एका चित्रपटाची निवड करण्यात आली आहे. हे तिन्ही चित्रपट मिफ मध्ये नंतरही दाखवले जाणार आहेत. मिफमधे समाविष्ट चित्रपटांमधील, भाषा, आशय, विषय आणि पद्धती यांच्यातील वैविध्य या तीन चित्रपटातून रसिकांना दिसेल.
